Read ngando Matayo 2 Bible Online

Matayo 2 - ngando bible

Matayo 2

¹Eneki Yesu ootwaka ena Beteleme ena Yudea, en’esike eneki Elode oyalaka lifoka lina roi, lenda, bato bana bomwu baoya ena Yelusalema nk’en’ili bona Est;

²iy’ate, Ende onootwaki lifoka lina Ba-Yuda ayali meya? Lacin’oka tomen’ioto inande en’ili bona Est, ko tomoya oyokumy’ende.

³Eneki Elode lifoka lina roi ookaka yoi liho, aokandakanda bike, ende la baise Yelusalema bahatu.

⁴Ko aosusanya nkanga ina toome ihatu ko l’atengi ban’ekanda ban’ato, ko amaufola bili bon’otwa Masiya.

⁵Ko bamosumola, iy’ate, Ena Beteleme ena Yudea; lacina yoi limotengama la bosumoli yok’one, ate,

⁶Ko e, Beteleme, en’onyanga bona Yuda, Ofaleki bafoka bana Yudea l’isalisali; Lacina gouverneur onongotombanya bato’anami Yisalaele Angoya nk’enek’e.

⁷Nkwaho Elode aelela bato ban’omwu la lokuko, ko amaufola esike ntutuma eneki ioto oenyaka.

⁸Ko amatoma ena Beteleme, ate, Bocoak’oyufol’olotsi lacin’ena bon’oho, ko eneng’in’osungya, bonjele bosimo, lacina nje, njokumy’ende.

⁹Enek’iy’ookaka yoi lina lifoka lina roi, baocoa mboka eniyo; ko lenda, ioto inik’iy’oenaka en’ili bona Est yetaki en’oso’oniyo, yengoko iho yoyela en’edye eneki bona oyalaka, ko yemala nkwaho.

¹⁰Enem’iy’oena loto baonyangela l’enyanga bike mene.

¹¹Ko baotua en’otumba, ko baena bona la Malia nyango enande; bamoosamela, ko bamokumya, baosongola toma toniyo, ko baolekya nganji eneyal’ende ina wolo, la falankinsensa la mula.

¹²Ko enek’iy’olakamaka la Yakomba ena lilotua lacina bafutwa eneyali Elode, baocoa en’onyang’oniyoamene la mboka ekina.

¹³Enek’iy’oumaka, lenda, ekima ena Yawe eenya eneyali Yosefa ena lilotua, ate, Emala, ambola bonome ko la nyango enande, ko lota en’Ejipeto; omboyala meho yengoko lakosumola; lacina Elode angofona bon’one lacina aoyake.

¹⁴Ko aemala, aotamba bona ko la nyango enande l’oco, ko aocoa en’Ejipeto;

¹⁵aotonga nko meho yengoko bewedi bena Elode; lacina yoi liniki Yawe otendaka la bosumoli yilame, ate, Mbelelaki bon’onami nk’en’Ejipeto.

¹⁶Eneki Elode oenak’oka bato ban’omwu bamolonyeela, aolemwa la nkele mene, aotom’ato, ko aoyaka ban’ana mpame bahatu banayaakiena Beteleme ko l’en’onyang’oho bohotu, bana banakwa mbula ife ko l’iy’anatakwa mbul’ife, nk’iyatu, la lelelo lon’esike ntutuma eneki’nd’oufolaka bato ban’omwu.

¹⁷Nkwaho, yoi linaliki Yelemaya bosumoli otendaka yilamaki, ate,

¹⁸Lofoso lookana ena Lama Lilelo lina mposoli la befwi bena lilelo, Laele aolela ban’anande la mposoli; Ko atalanga lilombolama isei, lacin’oka ban’aho bafayali lakina tu.

¹⁹Koko eneki Elode owaka, lenda, ekima ena Yawe eenyaki eneyali Yosefa ena lilotua en’Ejipeto,

²⁰ate, Emala, ambola bonome ko la nyango enande, ko utwa en’onyanga bona Yisalaele; lacin’iyo banasokolanga bayake bon’one bamowa.

²¹Koko aemala, aambola bonome ko la nyango enande, ko aoya en’onyanga bona Yisalaele.

²²Koko enem’end’ooka mbo, Alukelao amokitanya bafango’onande Elode ena lifoka lina Yudea, atacoa meho, lacin’oka aangaki; ko aolakama la Yakomba ena lilotua, ko aeta en’ili bona Ngalilaya;

²³ko aoya oyotonga en’ongili bonotangama Nazaleta; lacina yoi linaliki bosumoli otendaka yilame, ate, Ende angotangama bise Nazaleta.