Read ngando Matayo 20 Bible Online

Matayo 20 - ngando bible

Matayo 20

¹Lacina lifoka lina loola liyali yoka bosamb’onoyali boto’omoi, mene’otumba onofolaki l’okulu oyelela basali lacina basale ena lisala linande lina bekoli bena vina.

²Ko eneki’nd’oimedyaka lacina afe basali bina l’ina denier emoko, amatoma ena lisala linande lina bekoli bena vina.

³Ko yok’en’esike ena neuf heures aofola, ko aena bato’amoi bayemale en’edye en’esombe, efan’osala;

⁴ko amasumola, ate, Ino nkoho, bocoaka ena lisala, ko nongokof’ino mpuci inakolana.

⁵Ko baocoa. Ko lakina aofola en’esike ena midi, l’ena trois heures, ko aila yok’osamb’oho.

⁶Ko yok’esike ena cinq heures aofola lakina, ko aosungya bato’amoi baemali; ko amalokwela, ate, Ino bomemala mendo bina tu, efan’osala, lacina nai?

⁷Iy’ate, Efana nko l’oto onoteelela en’osala. Amasumola, Mbo, ino nkoho bocoaka ena lisala lin’ekoli bena vina.

⁸Eneki likolo oyelaka, nyangetuke ena lisala aosumola kapita enande, ate, Elela basali, ko oafute mpuci iniyo; matsa l’oloi bona mbusa yengoko osimba l’iy’an’oso.

⁹Ko enek’iy’anelelamaki ena cinq heures oyaka, baotamba boto l’oto denier emoko.

¹⁰Koko eneki basali ban’oso oyaka, baokanel’oka bangemba mpuci inileki. Koko iyo nkoho baemba boto l’oto nko denier emoko.

¹¹Koko enek’iy’otambaka boto’omoko denier emoko yok’oho, baoningelaningela mene’otumba,

¹²Mbo bato’ane bana mbusa baosalaka heure nk’emoko kei, koko iso tosalaka bina tu, toyene bino l’ane mene; ko omotokody’iso l’iyo nko kocu.

¹³Koko aokutwel’omoi’oniyo, ate, Mango, ntakilel’e bowe; otimedya nde lacina otamba denier emoko?

¹⁴Ambola eho ene, ko ombocoa; lalanga njofe boto’one ona mbusa yoka bosamb’onakof’emi.

¹⁵Mpile nde bokotua bonalang’emamene la toma tonamamene? Liso line liyali nde bowe lacin’oka emi njali bolotsi?

¹⁶Lacin’eho, ban’otungu bangoyala en’oso, ko ban’oso bangoyala ena mbusa.

¹⁷Enema Yesu ocu ena Yelusalema, aotola bakili jo l’afe ena lokuko, ko amasumola eneyacu iyo ena mboka, ate,

¹⁸Lenda, toyacu ena Yelusalema; ko Bon’on’oto angolekyama eneyali nkanga ina toome ko l’eneyali batengi ban’ekanda. Ko iyo bangakol’ende likambo lin’ewedi lacina awu;

¹⁹ko bangolekya eneyali Befenda lacina baosisedya, ko baofome lofomi, ko lacina baande en’ekulusu; ko en’ina bon’esaso angetwa en’ewedi.

²⁰Koko nyango ena ban’ana Zebedayo bana mpame aoya la ban’anande, amoosamela, ko amoufola yoi.

²¹Ko Yesu amoufola, ate, Na lang’e? Ende ate, Ila ban’ane banami bafe bakisase, omoi en’ili bona likasa line y’ome ko okina en’ili bona likasa line y’ooli ena lifoka line.

²²Koko Yesu aokutola, ate, Ino bofeya yoi linufol’ino. Ino bomelisa nde nkofo enengi m’omela? Ko binamisa nde l’inamelo eninam’emi? Iy’ate, Tinya nde.

²³Ko amasumola, ate, Bongomela nkofo enami, solosolo; ko bonginama l’inamelo en’inam’emi; ohonde ekisel’ase en’ili bona likasa linami y’ome l’en’ili bona likasa linami y’ooli ef’enami lacina njofe boto: eho engofama eneyal’iyo banaki Bafango’onami okoedyak’eho.

²⁴Eneki bakili’amoi jo ookaka baoyi’ane, baok’owe lacin’eniyo’afe.

²⁵Ko Yesu amaelela eneyal’ende, ko aila, ate, Ino bey’oka bafoka bana Befenda baotumanya bato’aniyo; ko banaleki la lifoka bamatomeela ntomo.

²⁶Koko eneyal’ino efayalamaki yok’oho; koko onongolanga ayale en’oso’onino, akoli eneyal’ende ayalame bosali’onino;

²⁷ko onongolanga ayale boto’on’oso eneyal’ino, ayalamake boombo’onino;

²⁸yoka bosamb’onoyali Bon’on’oto: ataya lacina bato baosaele: ayaki oyosaela bato, ko lacina alekya liiko lonande mbiko lacin’ena bato bike.

²⁹Eneki’nd’ocikaka Yeliko, bik’ike bon’ato bamokila.

³⁰Ko lenda, bato’afe banodyak’aiso baokisase en’okenge bona mboka; ko enek’iy’ookak’oka Yesu ayete, baololomwa, Mbo Nkolo, bon’ona Dawidi, otookamel’isei.

³¹Ko bamoi ban’ato bike bamafekya lacina bambya lofoso, ohonde baokusalilolua ndolua mene. Nkolo, bon’ona Dawidi otookamel’isei.

³²Yesu aemala, ko amaelela, ate, Yoi linalang’ino nkilel’ino lika nai?

³³Bamosumola, Mbo Nkolo, tolanga baiso’aniso balifwa.

³⁴Ko Yesu amaokamel’isei, ko aosuka baiso’aniyo la likasa. Isasanga baena, ko bamokila.