Read ngando Matayo 22 Bible Online

Matayo 22 - ngando bible

Matayo 22

¹Ko aotenda, amasumola lakina l’asai, ate,

²Lifoka lina loola yakolana la lifoka limoi onofumbak’elambedya ena nsongana lacin’ena bon’onande ona mpame;

³ko aotoma baombo’anande oyelela iy’an’elelamaki en’elambedya ena nsongana; koko iyo batalanga liya.

⁴Lakina aotoma baombo’amoi, ate, Bosumol’iy’an’elelamaka, Lenda, mokodya elambedya enami, ngombo inami la nyama inami iney’itamo imoyakama, toma tohatotu tomokolana: boyaka en’elambedya ena nsongana.

⁵Koko baofedya, ko baocoa mboka iniyo; omoi aocoa ena lisala linande, omoi aocoa ena baongwa banateky’ende;

⁶ko ban’amoi baunda baombo’anande, ko bamaenya bino, ko bamayaka tutu.

⁷Ko eneki lifoka ookaka, aolemwa, ko aotoma soldats inande, ko aotenyatenya bayaki’aho ban’ato, ko aotumba bonyang’oniyo la nkoi.

⁸Koko aosumola baombo’anande, ate, Elambedya ena nsongana emokolana, koko iy’an’elelamaki batakolana.

⁹Lacin’eho, bacoaka en’aatano’a mboka, ko belela bato banang’in’osungya bahatu, bayi en’elambedya ena nsongana.

¹⁰Ko baombo’aho baocoa ena mboka, ko baosolonganya bato bahatu banak’iy’osungyaka, le bato ban’owe le bato ban’olotsi; ko botumba bon’elambedya ena nsongana bolola l’ato ban’elambedya.

¹¹Eneki lifoka lina roi otuaka lacina alende bato ban’elambedya, aena boto’omoi meho onotalota bokoto bon’elambedya.

¹²Ko amoufola, ate, Mango, otuaka mendo kum’ofana bokoto bon’elambedya ena nsongana bosamb’oya? Ko ende ataata ekutwelo tu.

¹³Nkwaho lifoka lina roi aosumola basali, ate, Bokakele l’akasa l’akaka, ko bofuse en’ilima en’anza; meho engata nko lilelo lina mposoli la nkenyanya en’aino.

¹⁴Lacina banelelama band’ike, koko banasonama bafan’ike.

¹⁵Nkwaho Bafalusi baocoa oyang’eango bokotua bonong’iy’oong’ende longo la baoyi’anande.

¹⁶Ko baotomel’ende bakili’aniyo ko la Ba-Elode, iy’ate, Bolaki, iso tey’oka oyali ona solosolo, ko olak’ato mboka ena Yakomba la solosolo, ko ofakanel’oto tu, lacin’oka ofalende bilongi bin’ato.

¹⁷Lacin’eho, otosumole, nakanel’e? enafut’iso Kaisala mpuci, yoi liho likoli, yombo lifakoli?

¹⁸Koko Yesu aofokola bowe’oniyo, ko aila, ate, Ino besimo! bomek’emi lacina nai?

¹⁹Bontume franc ena mpuci. Ko bamoyela denier emoi.

²⁰Ko amaufola, ate, Efoya ene l’etengelo ene ena nai?

²¹Iy’ate, Ena Kaisala. Ko amasumola, ate, Bofaka Kaisala toma tona Kaisala, ko bofaka Yakomba toma tona Yakomba.

²²Enek’iy’ookaka baoyi’aho baofefa, ko bamocika, ko baocoa mboka iniyo.

²³En’in’oho Basadoke (nk’iy’an’ila, iy’ate efan’eetwelo en’ewedi) baoy’eneyal’ende, ko bamoufola, iy’ate,

²⁴Bolaki, Mose ailaki ate yombo boto aowa kum’atot’ona, bakune’onande atambake booli’onande onociki, ko aotele botoolo’onande bana.

²⁵Mpame nsambo iyaaki enek’iso, botoolo l’akune. On’oso aosonga booli, ko aowa kum’atot’ona, ko aocikela bakune’onande booli;

²⁶nk’osamb’oho l’on’afe, l’on’asaso, l’iyatu nsambo.

²⁷Ena mbusa en’iyatu boyoto aowa.

²⁸En’eetwelo en’ewedi, angoyala booli’ona nai? lacin’oka iyatu baosongaki.

²⁹Koko Yesu amalokwela, ate, Ino bounga nko mbunga, enefey’ino bekanda bena Yakomba, ko bofeya mpamba ena Yakomba.

³⁰En’eetwelo lakina en’ewedi, bato bafatambe baali, ko bafatomama liala: bayali yoka bosamb’onoyali bikima bina Yakomba ena loola.

³¹Ko ena likambo lin’eetwelo en’ewedi, ino botaanda nde baoyi banaki Yakomba okosumolak’ino, ate,

³²Emi njali Yakomba ena Abalayama la Yakomba ena Yisaka ko la Yakomba ena Yakoba? Yakomba afayali Yakomba ena banawaki: ayali nko Yakomba ena banayaike.

³³Eneki bik’ike bon’ato ooaka yoi liho, baofefa la lilako linande.

³⁴Koko Bafalusi, enek’iy’ookak’oka Yesu amokoiya Basadoke, iyo baosolongana eneyal’ende.

³⁵Ko omoi’oniyo, bosakitoli bona basangya, amomeka la bufo, ate,

³⁶Bolaki, lisangya linalileki bahatu lika nai?

³⁷Yesu amosumola, ate, Oka Yawe Yakomba ene nganji l’otem’one bohotu, ko l’olimo’one bohotu, ko la lokanyi lone lohalotu:

³⁸boeka bon’oso la bonoleki nk’one.

³⁹Ko boeka bon’efe bosangi l’oho: Ok’on’oli l’e nganji yoka bosambo bonayook’e eamene nganji.

⁴⁰Licina mene lina basangya bahatu la balako ban’asumoli nko beeka bene befe.

⁴¹Ko eneki Bafalusi osoionganaka, Yesu amaufola, ate,

⁴²Nakanel’ino lacin’ena Masiya? Ayali bon’ona nai? Iy’ate, Ona Dawidi.

⁴³Amasumola, ate, Noka, Dawidi, enem’end’otenda ena Bolimo, amotanga Nkolo bosamb’oya? ate,

⁴⁴Yawe ailaki Nkolo enami, Kisase en’ili bona likasa linami y’ome, Yengoko enengi’m’oila baokyi’owe’ane limbolongo lin’akak’ane.

⁴⁵Yombo Dawidi amotanga Nkolo, ayali bon’onande yok’osamb’oya?

⁴⁶Koko etaata boto onomokutwelisa yoi limoko, ko ena mbusa ena bin’oho efana nko le boto onomoufolaka bufo, lacin’oka baangaki.