Read ngando Matayo 23 Bible Online

Matayo 23 - ngando bible

Matayo 23

¹Nkwaho Yesu aotenda l’ato bik’ike ko l’akili’anande,

²ate, Batengi ban’ekanda la Bafalusi baokisase ena nkici ena Mose;

³lacin’eho, baoyi bahatu banakosumol’iyo, bomonya baho, ko bokamba; ohonde botakambake yoka bosambo bonakamb’iyo bikambwa, lacin’oka iyo batenda koko bafakambe.

⁴Bakakela belito mene beneseki efafo ena ntola, ko batadya beho en’asoko ban’ato, koko iyoamene bafalange lilidya beho nko l’io iniyo imoko.

⁵Iyo bakamb’ikambw’iniyo bihitu nko lacina baenya eneyali bato; baofudya bokolo bona ndembi inalot’iyo ndota, ko baila beseleka ben’ekolo en’ekoto’eniyo;

⁶ko balanga bisanga binileki’olotsi ena bilambedya, ko la nkici inay’oso ena sunagoga;

⁷ko balanga baesame beeso ena bidye bina bisombe, ko balanga baelelame l’ato, Labi, Labi.

⁸Koko ino, botalangake bato bakotang’ino Labi, lacin’oka onoyali Bolaki’onino nk’omoko, nko Masiya, ko inatu boyali bifili.

⁹Ko botatangake boto onoyali ena loko bafango’onino, lacin’oka onoyali Bafango’onino nk’omoko, nk’Ende onoyali ena loola.

¹⁰Ko botatangamake banyangetuke, lacin’oka onoyali Nyangetuke enino nk’omoko, nko Masiya.

¹¹Ende onoleki eneyal’ino angoyala bosali’onino.

¹²Ko onongoyofefa, angokoiyama; koko onongoyofima, ende angiledyama.

¹³Bino eneyal’ino, batengi ban’ekanda l’afalusi! Ino besimo! lacin’ino bokombel’ato lifoka lina loola: inoamene bofatua, ko bofeky’iy’anasokotua, batongoyatua.

¹⁴(Bino eneyal’ino, batengi ban’ekanda l’afalusi, ino besimo! lacin’ino bokumol’ayato beweli betumb’eniyo, ko boonda beondo ben’etali l’okotua bona mpoci; lacin’eho, ino bongokoiyama l’ekwelo ena likambo eneleki.)

¹⁵Bino eneyal’ino batengi ban’ekanda l’afalusi, ino besimo I lacin’ino bolingamela lose l’okwa ko la loko lacina boate bokili’omoko; ko enem’end’oyalama bokili, ino bil’ende bon’ona Ngena onokolek’ino beleka befe.

¹⁶Bino eneyal’ino, balonji banodyak’aiso, banila, in’ate, Yomb’oto ateha l’otumba bona Yakomba, afana likambo; koko nde yomb’oto ateha la wolo bonoyali en’otumba bona Yakomba, eteho enande eciki, akambake.

¹⁷Ino tolemeleme la banodyak’aiso! la wolo, la botumba bona Yakomba bonekya wolo’oho en’oeka, onoleki oka nai?

¹⁸Ko ino bila, Mbo, yomb’oto ateha la mesa ena mbeka, afana likambo; koko nde yombo boto ateha la nganji enambi ena mesa eho, eteho enande eciki, akambake.

¹⁹Ino tolemeleme la banodyak’aiso! la nganji, la mesa enekya nganji eho en’oeka, eneleki eka nai?

²⁰Ende onoteha la mesa ena mbeka, aoteha l’eho ko la toma tonatoambi meho tohatotu.

²¹Ko ende onoteha l’otumba bona Yakomba, aoteha l’oho ko la Bomene onotonga meho.

²²Ko ende onoteha la loola, aoteha la leko ina Yakomba ko la Bomene onokisase meho.

²³Bino eneyal’ino Batengi ban’ekanda l’afalusi, ino besimo! lacin’oka ino bolekya nganji ina minti la anise la kumini, koko bomocika baoyi ban’asangya banaleki, nk’etendelo en’akambo la cilili, ko l’isei, ko l’imeedyo; akoli eneyal’ino bokambeela baoyi’ane, ko botacikake bakina nkoho.

²⁴Ino balonji banodyaki baiso, in’anasengola icingocingo, koko bomela ngamela!

²⁵Bino eneyal’ino, batengi ban’ekanda l’afalusi, ino besimo! lacin’oka ino bosonga mbiolo ena nkofo la salani, koko ena ntundulu baolola l’opomo ko la mposa inifafekyame.

²⁶E Bofalusi onody’aiso, en’oso songa ena ntundulu ena nkofo la salani, lacina bayalame soto ena mbiolo nkoho.

²⁷Bino eneyal’ino, batengi ban’ekanda l’afalusi, ino besimo! lacin’oka ino boyali yoka bekeci bena beduo benokyama mpembe, benenya bokoka mene ena mbiolo, koko ena ntundulu beolola la biuha bin’ato banawaki ko la nsefo ehatu.

²⁸Ino nkoho benya eneyali bato yoka bato bana mbongi, koko betem’enino beolola la mpoci la bowe.

²⁹Bino eneyal’ino, batengi ban’ekanda l’afalusi, ino besimo! lacin’oka bofaka bekeci ben’asumoli ko boongya nketa ina bato bana mbongi nko bokoka,

³⁰ko bila, Mbo, yomb’iso tomoyala meho ena bisike biniki bafango’aniso oyalaka, tumbe totaambana l’iyo en’eutsedyo en’akila ban’asumoli.

³¹La baoyi’aho ino bimedya oka inoamene boyali ban’aniy’anayakaki basumoli.

³²Ino bokokya lelelo lona bafango’anino.

³³Ino njua! Ino ban’ana nkonga! bongolotisa ekoiyelo ena likambo ena Ngena bosamb’oya?

³⁴Lacin’eho, lenda, lakotomel’ino basumoli, ko l’ato ban’omwu, ko l’atengi ban’ekanda. Bongoyaka bamoi’aniyo, ko bongaka bamoi ena bikulusu; bongofoma bamoi’aniyo mpomi ena basunagoga banino, ko bongaitanya en’onyanga l’onyanga;

³⁵lacina likambo lina bakila ban’ato bana mbongi bahatu banutsaki ena loko liyele nk’eneyal’ino: matsa l’akila bana Ebele ona mbongi, yengoko bakila bana Zekalaya bon’ona Belekaya, onok’in’oyakaka en’atenyi bana botumba bona Yakomba la mesa ena mbeka.

³⁶Solosolo lakosumol’ino, baoyi’ane bahatu bangokwela bato ban’eotwelo ene.

³⁷Yelusalema, Yelusalema, onoyaka basumoli ko onofusel’iy’anatomama eneyal’e baufe: nsokolanga mama lacina nsusanya ban’ane yoka bosamb’onasusanya nkoko ban’anande en’ase bana bafafu’anande, koko ino botalanga.

³⁸Noka, botumb’onino bociki eneyal’ino nko l’olengelenge;

³⁹lacin’emi lakosumol’ino, bofanjenaki lakina yengoko eneng’in’oila, Onoyayi ena lina lina Yawe aosakelama bosako.