Read ngando Matayo 24 Bible Online

Matayo 24 - ngando bible

Matayo 24

¹Ko eneki Yesu ofolaka en’otumba bona Yakomba, ko aocoa, bakili’anande baoya oyotuma bifakelo bin’otumba bona Yakomba.

²Ko Yesu amalokwela, ate, Bofene bikambwa bine bihitu? Solosolo lakosumol’ino, efana lufe limoko linalingocikala linga likoyi ena liko ya lufe likina linalifafusamaki en’ase.

³Ko enem’end’okisase ena lingonji lina Bilaya, bakili baoy’eneyal’ende ena lokuko, iy’ate, Otosumole, baoyi’ane bangilama en’esik’eya? ko ndembi en’eyelo ene l’ena nsimbo en’esike eka nai?

⁴Yesu amakutwela, ate, Boongya lilenda, batokokungy’ino;

⁵lacina bato bike bangoya ena lina linami, ko bangila, Mbo emi Masiya; ko bangokungya bato bike.

⁶Ko bongoka besimo ben’ita ko la nkindo in’ita; noka, botakandakandake: ekoli lacina baoyi’ane bailame, koko esimbelo etayele isanga.

⁷Lacina bonyanga bongokana l’onyang’omoi, ko lifoka la lifoka limoi; en’ekala bemoi njoci ina njala ingata ko la bililelo bina loko.

⁸Baoyi’ane bahatu bayali yoka limatsako lin’efafo ena lonwa.

⁹Ko bangokoleky’ino lacina benyame bino, ko bangokoyak’ino; ko benyanga behetu bengokook’ino bowe lacin’ena lina linami.

¹⁰Ko bamoi bike bangokwa l’ekumbelo, ko bangangelana, ko bangokana bowe.

¹¹Ko basumoli bike bana mpoci bangemala, ko bangokungya bato bike.

¹²Ko nganji en’etema ben’ato bike engohola nko ncici, lacin’oka bowe boyasokwa nko nsokwa.

¹³Koko boto onocindelana locinji yengoko nsimbo, ende angikyama.

¹⁴Ko bosimo’one bona lifoka bongosekodyama ena loko lohalotu yoka ndembi eneyali baise benyanga behetu: ena mbus’eho esimbelo engoya.

¹⁵Lacin’eho, nk’en’oka eehedyo ena nsefo mene eneki Danyele bosumoli otendak’ale yoi aemali en’edye enekyama boeka (ende onanda aongya linonganya ncina),

¹⁶iy’anayali ena Yudea balotake ena bangonji;

¹⁷ko ende onoyali ena liko y’otumba atakitake oyumola toma en’otumb’onande;

¹⁸ko ende onoyali ena lisala atutwake la mbusa otamba bokoto’onande.

¹⁹Lokeseli lacin’en’iy’anangoyala l’aemi ko la beale banalomy’ana baele en’ina beho.

²⁰Boonda lacina elotelo enino etoyala en’esike ena lifia, yomb’en’ina bona Sabata;

²¹lacina bino mene bingenya en’esik’eho, yoka bokotua bonotenya biho ena limatsako lina loko yengoko esik’ene, ko bifenyaki lakina l’okotu’oho tu.

²²Yombo esik’eho etakokodyama, tumbe efan’oto onika nko tu; ohonde esik’eho engokokodyama lacin’ena banasonama.

²³Koko yombo boto akosumol’ino Mbo lenda, Masiya end’one, yombo Mbo, end’onyi, botimedyake;

²⁴lacina Bamasiya bana mpoci la basumoli bana mpoci bangemala, ko bangotuma bato ndembi in’ikolo ko l’ikambwa bina mpefa; yombo bainya, tumbe basokokungya basonami mene.

²⁵Lenda, mokosumol’ino kum’esike etayele.

²⁶Lacin’eho, yombo bakosumola, Mbo lenda, ayali ena sengelenge, botacoake; Mbo lenda, ayali ena lolu lona lokuko; botimedyake.

²⁷Lacina, yoka bosamb’onoyali lihalihali, yaala en’ili bona Est, ko yenana nk’en’ili bona Ouest; eyelo ena Bon’on’oto engoyala fik’oho.

²⁸Enambi ekoke, mponongoli ingosusana nko meho.

²⁹Koko isasanga ena mbusa ena bino bin’isik’iho, bina bongoyala ficifici, ko ngondo efalolomaki, ko tooto tongokwa ena loola, ko mpamba ina loola ingolidyama;

³⁰nkwaho ndembi ena Bon’on’oto engenya ena loola; ko beloi ben’ato behetu bena loko lohalotu bangofoma befwi, ko bangena Bon’on’oto ayayi ena bailo bana loola la mpamba la bokonde mene.

³¹Ko ende angotoma bikima binande la lofoso lona bopate lona lokolo mene; ko iyo bangosusanya basonami banande en’ili bena mpongo ih’inei, l’ena nsimbo ina Toola ih’ife.

³²Koko bolakamaka l’ekolanya ena bote bona liteli: enayalama bitange binande boolu, ko tokasekase tomatsa limela, ino beya esike ena biane eolama.

³³Nk’osamb’oho, eneng’in’oena baoyi’ane bahatu, bongey’oka ende aolama, ayali nk’en’efolo.

³⁴Solosolo, lakosumol’ino, eotwelo ene efumaki yengoko baoyi’ane bahatu bailama.

³⁵Loola la loko banguma, koko baoyi’anami bafumaki tu.

³⁶Koko ena likambo lina bin’oho la heure eho, efana nko l’oto oneya: la bikima bina loola, la Bona, efan’oneya yengoko Bafango kei.

³⁷Eyelo ena Bon’on’oto engoyala yok’esike eneki Noa.

³⁸En’esik’eho, en’oso bon’efela, balaki toma, ko bamelaki, ko basonganaki, ko balekyaki bana ena baala, yengoko bina bonoki Noa otalamaka en’atu,

³⁹ko iyo bateya, yengoko eneki efela oyaka ko eumolak’iyatu bwo; eyelo ena Bon’on’oto engoyala nkoho.

⁴⁰Bato’afe bangoyala ena lisala: omoi angotolama, ko okina angocikala.

⁴¹Bayato’afe bangominyaminya basongu en’eminyedyo: omoi angotolama, ko okina angocikala.

⁴²Lacin’eho, botombanyaka, lacin’oka ino bofeya bina bonongi Nkolo enino oya.

⁴³Koko boongya linonganya yoi line: yombo mene’otumba aeyaki heure en’eyelo ena liya, tumbe atombanyaki ko atit’ocika botumb’onande boolame mbola.

⁴⁴Lacin’eho, boongyaka likolana, lacina Bon’on’oto angoya ena heure enefakanel’ino.

⁴⁵Onoyali boombo’ona solosolo la bomwu oka nai? onoki nyangetuke enande oilaka botombanyi bona boloi’onande, lacina af’iyo toma toniyo en’esike enakolana.

⁴⁶Enengi nyangetuke enande oya, ko asungya boombo ayaile yok’oho, boombo’oho akik’ekiko.

⁴⁷Solosolo, lakosumol’ino, angil’ende botombanyi bona toma tonatoat’ende tohatotu.

⁴⁸Koko yombo boombo’oho and’owe, ko aila en’otem’onande, ate, Nyangetuke enami ataye isanga;

⁴⁹ko aomatsa lifoma baombo banasala l’ende, ko ayale ko ayamele l’iy’analangwa;

⁵⁰nyangetuke ena boombo’oho angoya en’ina bonotakanedy’ende, ko l’ena heure enefey’ende;

⁵¹ko angofoma mpomi, ko angofa liondo linande l’ato ban’esimo: meho engata nko lilelo lina mposoli la nkenyanya en’aino.