Read ngando Matayo 25 Bible Online

Matayo 25 - ngando bible

Matayo 25

¹En’esik’eho lifoka lina loola lingokolana l’ayato jo banatasongana la mpame, banambolaki mwinda iniyo, ko baocoa oyukana la nsongi ena booli.

²Bamoi’atano bayaaki la bomwu, ko bamoi’atano baindaki bomwu.

³Banindaki bomwu baotola mwinda iniyo, koko batatol’auta;

⁴koko bana bomwu baotola bauta ena mpoke iniyo l’ena mwinda iniyo.

⁵Koko enetaya nsongi isanga, baiso’an’iyatu baonyonga l’ilo, ko baotota.

⁶Ko ena kelekele en’oco leele lookana, Lenda, nsongi aoya, bofola, boyukane l’ende.

⁷Nkwaho bayato’aho bahatu baemala, ko baongya mwinda iniyo.

⁸Ko iy’anindaki bomwu baila iy’an’omwu, iy’ate, Botofe bauta banino bamoi, lacina mwinda iniso yolama lilimala.

⁹Koko bana bomwu bamakutwela, Mbo yombo bafakokaki l’iso ko l’ino! Bocoaka eneyal’iy’anateky’auta, boyosombel’inoamene.

¹⁰Nk’enem’iy’ocu osomba, nsongi aoya; ko iy’anakolana baotua l’ende en’elambedya ena nsongana; ko lokombo lokomoama.

¹¹Ena mbusa bayato’aho bamoi baoya, Mbo Nyangetuke, Nyangetuke, otokombwele.

¹²Koko amakutwela, ate, Solosolo, lakosumol’ino mpakey’ino.

¹³Lacin’eho, botombanyaka, lacin’ino bofeya bina ko la heure.

¹⁴Engoyala yoka bosamb’onoyali boto onocoa bokita en’onyang’omoi, aelelaki baombo’anande, ko amacikela toma tonande.

¹⁵Aocikel’omoi talento itano, ko omoi talento ife, ko omoi talento emoko: boto l’oto nko toma tonatokoli l’ende; ko aocoa bokit’onande.

¹⁶Ko ende onotambaki talento itano aocoa, aotekya baongwa l’iho, ko aokitanya imoi talento itano.

¹⁷Nk’osamb’oho ende onotambaki talento ife aokitanya imoi ife.

¹⁸Koko ende onotambaki talento emoko aocoa, aocima lifoku ena loko, ko aofisa talento ena nyangetuke enande.

¹⁹Eneki elela oetaka, nyangetuke ena baombo’aho aoya, ko aala botuya bona toma l’iyo.

²⁰Ende onotambaki talento itano aoya, aoya l’imoi talento itano, ate, Nyangetuke, oncikelaki talento itano; lenda, lokitanyaka imoi talento itano nkoho.

²¹Nyangetuke enande amosumola, ate, Yok’oho bolotsi e boombo bon’olotsi l’ona solosolo; omokamb’olotsi l’isisali ina toma, nongokoil’e ena lifoka lina toma bike; tuaka en’enyanga ena nyangetuke ene.

²²Koko ende onotambaki talento ife aoya, ate, Nyangetuke, oncikelaki talento ife; lenda, lokitanyaka imoi talento ife nkoho.

²³Nyangetuke enande amosumola, ate, Yok’oho bolotsi, e boombo bon’olotsi l’ona solosolo; omokamb’olotsi l’isisali ina toma, nongokoil’e ena lifoka lina toma bike; tuaka en’enyanga ena nyangetuke ene.

²⁴Koko ende onotambaki talento emoko aoya, ate, Nyangetuke, nkeyak’oka oyali boto’ona locili, ononukola enetafus’e, ko onosusanya en’edye enetafanzafanz’e;

²⁵koko nkoangaki, ko ncoaki oyofisa talento ene ena loko; ndaka, toma toneamene.

²⁶Ko nyangetuke enande amokutwela, ate, E boombo bon’owe l’ona mponya, oeyak’oka emi lanukola en’edye enetafus’emi, ko lasusanya enetafanzafanz’emi;

²⁷tumbe oilaki toma tonami ena banque, lacin’eho en’eyelo enami ntambe toma tonamamene la mpudya.

²⁸Lacin’eho, bokumole talento eho, ko bof’ende onoyali la talento jo.

²⁹Bamoi bangofama eneyali boto l’oto onata, ko angata bike la mpudya; ohonde onofaate, bangokumol’ende nko baho banat’ende.

³⁰Koko bofusa boombo oninda nkita en’ilima en’anza. Meho engata nko lilelo lina mposoli la nkenyanya en’aino.

³¹Enengi Bon’on’oto oya l’okonde’onande, ende la bikima binande bihitu, angokisase en’ieko ina bokonde’onande.

³²Ko bato ban’enyanga behetu bangosusanyama en’oso’onande; ko angakambwanya, yoka bosamb’onakambwanya botombanyi mpate la nta;

³³ko angila mpate en’ili bona likasa linande y’ome, koko nta en’ili bona likasa y’ooli.

³⁴Koko lifoka lina roi angilel’iyo banayali en’ili bona likasa y’ome, ate, In’anasakelama bosako bon’afango’onami, boyaka boyosangole lifoka linalikodyamaki eneyal’ino nk’en’enunwelo ena loko;

³⁵lacin’emi njokaki njala, ko bompaki toma; njokaki mposa, ko bompaki basi; njaaki bofenda, ko bontueyaki;

³⁶njaaki bolumbulumbu, ko bondotsaki; mbwaki nkangi, ko bonkambyaki; njaaki en’otumba bon’enyolo, ko boyaki eneyal’emi.

³⁷Koko bana mbongi bangokutwela, iy’ate, Nkolo, tokenak’e kum’oyoke njala ko tokofaki toma, ko oyoke mposa ko tokofaki basi, esik’eya?

³⁸Tokenak’e bofenda ko tokotueyaki, ko bolumbulumbu ko tokolotsaki, esik’eya?

³⁹Tokenak’e kum’oyawu nkangi ko l’en’otumba bon’enyolo ko toyaki eneyal’e, esik’eya?

⁴⁰Lifoka lina roi angakutwela, ate, Solosolo, lakosumol’ino, yok’onok’in’oilelaka omoi’ona bakune’ane banami oninda lokumo, nk’osamb’oho bonjilelak’emi.

⁴¹Nkwaho angilela iy’anayali en’ili bona likasa y’ooli, ate, In’anamomama bomomo, buma eneyal’emi, bocoaka ena nkoi inifalimale tu inikodyama lacin’ena Satana ko la bikima binande.

⁴²Lacin’emi njokaki njala, ko botampa toma; njokaki mposa, ko botampa basi;

⁴³njaaki bofenda, ko botantueya; njaaki bolumbulumbu, ko botandotsa; mbwaki nkangi, ko njaaki en’otumba bon’enyolo, ko botanjengya.

⁴⁴Nkwaho iyo bangamba, iy’ate, Nkolo, tokenak’e kum’oyawu njala la mposa, ko l’ofenda, ko l’olumbulumbu, ko la nkangi, ko l’en’otumba bon’enyolo, ko totakokambya, esik’eya?

⁴⁵Ko ende angakutwela, ate, Solosolo, lakosumol mo, yok’ino botilel’omoi ona bato’ane, nk’oninda lokumo, nk’osamb’oho botanjilel’emi.

⁴⁶Bane bangocoa ena nsisodya enefasile; koko bana mbongi bangocoa ena liiko lonelofasile.