Read ngando Matayo 26 Bible Online

Matayo 26 - ngando bible

Matayo 26

¹Eneki Yesu okadyaka litenda baoyi’ane bahatu, aosumola bakili’anande, ate,

²Ino bey’oka ena mbusa ena bin’efe elambedya en’Etelo eoya, ko Bon’on’oto angolekyama lacina ayakame en’ekulusu.

³Nkanga ina toome la bingambe bina bato baosusana en’otumba bona nkanga iyome mene onotangama Kayafa;

⁴ko baang’eango lacina baunde Yesu la longo, ko baoyake.

⁵Ko iy’ate, Ef’en’esike en’elambedya, bato batotom’etomoko.

⁶Eneki Yesu oyalaka ena Betania, en’otumba bona Simona on’ise’okenge,

⁷eneyakis’end’ase oyola toma, boyoto’omoi onoyaaki la likoko lina alabasitolo lin’auta bana mpimbo banaseki’otuya, aoy’eneyal’ende, ko aoutela baut’aho en’ote’onande.

⁸Eneki bakili oenaka yoi liho baolemwa, Mbo baut’ane baeha lanai?

⁹Baut’ane basokotekyama l’otuya bike, ko francs yofama eneyali bato beinda.

¹⁰Koko Yesu aofokola yoi liho liniyo, ko amasumola, ate, Bonyom’oyoto’one lacina nai? amonkambel’emi ekambwa en’olotsi;

¹¹lacina bato beinda bayali l’ino bisike bihitu, koko bofambat’emi l’ino bisike bihitu.

¹²Eneki’nd’outelaka baut’ane ena yonge linami, autelaki baho lacin’en’eku njelo enami.

¹³Solosolo, lakosumol’ino, bili l’ili beneng’iy’osekodya bosimo’one bon’olotsi ena loko lohalotu, bangosumol’ato yoi line nkoho linaliki boyoto’one oilaka, yoka liofwa linande.

¹⁴Nkwaho omoi ona jo l’afe onotangama Yudasa ona Keliota, aocoa eneyali nkanga ina toome,

¹⁵amaufola, ate, Ino bongomp’emi toma toka nai, njoleky’ende eneyal’ino? Bamokoedya mpata ntuk’isaso;

¹⁶nkwaho aofon’etelo oyoleky’ende eneyal’iyo.

¹⁷En’ina bon’oso bona mampa enefana nyango, bakili baoy’eneyali Yesu, bamoufola, iy’ate, Olanga tokokoedya lacina ole elambedya en’Etelo meya?

¹⁸Ate, Bocoaka en’onyanga eneyali boto botutuma, bosumole, Noka, Bolaki ate, esike enami eolama; emi l’akili’anami tongola elambedya en’Etelo enek’e.

¹⁹Ko bakili bailaki yok’onoki Yesu oatomaka, ko baokodya elambedya en’Etelo.

²⁰Ko eneki likolo oyelaka, aokisase ena mesa, ende l’akili jo l’afe.

²¹Nk’enem’iy’ola toma aila, ate, Solosolo, lakosumol’ino, omoi’onino angonjangela.

²²Ko iyo baoka lokeseli mene, ko baomatsa oyufol’ende omok’omoko, iy’ate, Nkolo, onyi emi?

²³Ende amakutwela, ate, Ende onilaki likasa linande l’emi ena salani, ende angonjangela.

²⁴Bon’on’oto angocoa yok’onoki yoi otengamaka lacin’enande; koko bino eneyali boto’oho onangela Bon’on’oto! Bolotsi eneyali boto’oho yombo ende atotwa.

²⁵Yudasa onomoangelaka aotenda, ate, Labi, onyi emi? Amosumola, ate, Nk’oko bonatend’e.

²⁶Enem’iy’ola toma, Yesu aotamba mampa, aosak’osako, ko aokes’eho, ko aofa bakili, ate, Botamba, bolaka; ene yonge linami.

²⁷Koko aotamb’ekala, aokanga Yakomba lokango, ko amafa, ate, Inatu bomela;

²⁸ene bakil’anami bana lisangya lina litoto banutelama lacin’en’ato bike lacin’en’etungwelo en’aoyi’owe.

²⁹Koko lakommol’ino, emi mpamelaki lakina basi’ane ban’emamo bena vina, yengoko bin’oho bonongi’m’omela baho ban’atoto, emi l’ino, ena lifoka lin’afango’onami.

³⁰Ko enek’iy’oembaka lembo, baocoa ena lingonji lina Bilaya.

³¹Nkwaho Yesu amasumola, ate, Inatu bongonjumbela l’oco’one; lacina yoi limotengama, Nongofoma botombanyi, ko mpate in’ondongo ingofanzolama.

³²Koko enengi’m’oetwa en’ewedi, nongocoa en’oso’onino ena Ngalilaya.

³³Koko Petelo amosumola, ate, Kang’iyatu bakumbela, emi mpakumbelaki tu.

³⁴Yesu amosumola, ate, Solosolo, lakosumol’e, l’oco’one kuma nkoko ena mpame eteke, ongonjangan’emi beangana besaso.

³⁵Petelo amolokwela, ate, Kanga mbwu l’e, mpakanganaki tu. Bakili bahatu bailaki yok’osamb’oho.

³⁶Nkwaho Yesu aoya l’iyo en’edye enetangama Ngetesemane, ko aosumola bakili’anande, ate, Bokisase mendo, yengoko emi locoa oyonda mei.

³⁷Ko aotamba Petelo ko l’an’ana Zebedayo bafe, ko aomatsa lioka lokeseli mene, nko bolito mene bona lokeseli.

³⁸Amasumola, ate, Botem’onami booka lokeseli bike, yoka bewedi mene; ino bomboyala mendo, botombanyaka l’emi.

³⁹Ko enem’end’olinda isisali, aokwa en’elongi enande mbosama, kum’ayaonde, ate, Bafango’onami, yombo yoi yilamisa, il’ekala ene eume eneyal’emi; ohonde efa yoi linalang’emi, nko yoi linalang’e.

⁴⁰Ko aoya eneyali bakili, ko amasungya kuma baotot’ilo, ko aosumola Petelo, ate, Botakolana nde litombanya l’emi heure emoko?

⁴¹Botombanyaka, ko boondaka, botoyatua ena losinganya. Bolimo bofafedya, solosolo; koko yonge liyali nko boolu.

⁴²Ko aocoa lakina bocoa bon’efe, aonda, ate, Bafango’onami, yombo ekal’ene efumis’eneyal’emi yengoko lamel’eho, eango ene eilame.

⁴³Ko enem’end’oya, amasungya lakina kuma baeci, baiso’aniyo baonyonga l’ilo.

⁴⁴Ko amacika, ko aocoa, ko aonda boonda bon’esaso, nko baoyi’aho lakina

⁴⁵Nkwaho aoya eneyali bakili’anande, ko amasumola, ate, Bombotota isanga, ko bofomya lifomya; lenda, heure eolama, ko Bon’on’oto angolekyama en’akasa ban’ato ban’owe.

⁴⁶Bemala, tocu. Lenda, ende ononjangela aolama.

⁴⁷Nk’enem’end’otenda, lenda, Yudasa, onoyaaki ena boloi bona jo l’afe, aoya, ende l’ato bike la nkula l’enganza, baotomama la nkanga ina toome ko l’ingambe bin’ato.

⁴⁸Ende onomoangelaka acikelak’iyo ndembi, ate, Boto onongi’m’oleya bolumba ayali nk’ende, bounde.

⁴⁹Isasanga aoya eneyali Yesu, ate, Mbote, Bolaki! ko amoleya bolumba.

⁵⁰Yesu amosumola, ate, Efili, Ila yoi linaliki oyaka oyila. Nkwaho baosuka Yesu l’akasa ko bamounda.

⁵¹Koko omoi’oniyo banayaaki la Yesu aonanola likasa linande, ko aosomola lokula lonande lon’ita, aooka boombo’ona nkanga iyome, ko aokesa litoi linande pa.

⁵²Yesu amosumola, ate, Utodya lokula lone ena ntoto; lacin’iyatu banatamba lokula lon’ita, bangowa nko la lokula lon’ita.

⁵³Okanela nde mpaondisa Bafango’onami isanga, ko afantomele isasanga beloi bena bikima bina loola beneleki jo la befe?

⁵⁴Koko yombo yok’oho, tumbe bitengelo biilama bosamb’oya? nko biho bin’il’oka ekoli lacina baoyi’ane bailame?

⁵⁵Nkwaho Yesu ailaki bato’aho bik’ike, ate, Boya nde oyombund’emi nko la nkula l’enganza, yok’ato banangunda boto’ona liya? Nkisaki’ase en’otumba bona Yakomba bina l’ina oyolaka bato, ko botambunda.

⁵⁶Koko baoyi’ane bahatu bamilama lacina bitengelo biniki basumoli otengak’ale biilame. Nkwaho bakili bahatu baoumbelaki, ko balotaki.

⁵⁷Koko iy’anundaki Yesu bamotola eneyali Kayafa, nkanga iyome mene, eneki batengi ban’ekanda la bingambe osolonganaka.

⁵⁸Koko Petelo amokila en’osana; aotua en’etenyi emoi en’otumba bona nkanga iyome, ko aokisase la police lacina aene esimbelo ena likambo line.

⁵⁹Nkanga ina toome la bingambe la likita lina balimo lihalitu baokemba bato banangakola Yesu likambo lina mpoci, lacina baoyake;

⁶⁰koko batasungya iyako ina mpoci, kanga bafoci bike bayaki. Koko ena mbusa bafoci bafe baoya,

⁶¹iy’ate, Boto’one ailaki, ate, Emi lehyisa botumba bona Yakomba, ko lafakisa boho en’in’esaso.

⁶²Ko nkanga iyome mene aemala, amolokwela, ate, Ofakutole nde tu? Yoi linakoakola bato’ane lika nai?

⁶³Koko Yesu aoyala mwi. Ko nkanga iyome amolokwela, ate, Ena lina lina Yakomba eneyaike, lakotehy’e eteho, otosumole yomb’oyali Masiya, Bon’ona Yakomba.

⁶⁴Yesu amosumola, ate, Nk’oko bonatend’e; koko lakosumola, ena mbusa bongena Bon’on’oto ayakisase en’ili bona likasa y’ome lina mpamba ena Yakomba, ko ayayi en’ailo bana loola.

⁶⁵Nkwaho nkanga iyome aokambola bekoto’enande, ate, Amosaiya Yakomba! tokembe lakina baakoli lacina nai? ino bomoka besao benasaiy’ende Yakomba;

⁶⁶nakanel’ino? Bamokutwela, Mbo akoli l’ewedi.

⁶⁷Nkwaho bamoutela nsoi en’elongi, ko bamofoma; ko bamoi bamofoma nsoola, iy’ate,

⁶⁸Otosumole, e Masiya, onokofomaka oka nai?

⁶⁹Koko Petelo aokisase en’etenyi emoi en’anza; ko bosali’omoi bon’oyoto aoy’eneyal’ende, ate, E oyaaki la Yesu ona Ngalilaya.

⁷⁰Ko aangana en’oso bon’iyatu, ate, Ei mpeya yoi linatend’e.

⁷¹Enem’end’ofola ena mbalasai, boyoto’omoi amena, ko aosumol’iy’anayaaki meho, ate, Ko boto’one ayaaki la Yesu ona Nazaleta.

⁷²Ko aangana lakina la nteha, ate, Ei mpeya boto’oho.

⁷³Efan olingolingo iy’anemali meho baoy’eneyali Petelo, iy’ate, Solosolo oyali omoi’oniyo; iso tokey’e l’efodya en’etendelo ene.

⁷⁴Nkwaho Petelo aomatsa litenda la besao ko la nteha, ate, Mpeya boto’oho. Ko isasanga nkoko ena mpame eekaki.

⁷⁵Ko Petelo aokanedya yoi linaliki Yesu osumolak’ende, ate, Nk’eneteke nkoko ena mpame, ongonjangana beangana besaso. Ko aofola, ko aolela lilelo mene lina mposoli, lina lokeseli mene.