Read ngando Matayo 27 Bible Online

Matayo 27 - ngando bible

Matayo 27

¹En’esike en’ekedyo ena bina, nkanga ina toome ihatu la bingambe bin’ato baangela Yesu eango lacina baoyake.

²Enek’iy’okakelaka, bamotola, ko bamolekya eneyali gouverneur, nko Pilato.

³Nkwaho Yudasa, onoangelaki, eneki’nd’oenak’oka Yesu amokoiyama, aoyokanya, ko aoya oyutodya mpata ntuk’isaso eneyali nkanga ina toome la bingambe,

⁴ate, Njilaki’owe eneki’m’olekyaka en’ewedi boto onofana nkwaka ena likambo. Koko iyo, Mbo likambo liniso? Likambo nko lineamene.

⁵Koko aofusa francs ena loko en’otumba bona Yakomba, ko auma, aocoa oyokom’endamene.

⁶Ko nkanga ina toome baotamba francs iho, taila, iy’ate, Efakolana til’iho en’emonyedyo ena toma tonatofama eneyali Yakomba, lacin’oka botuya bon’akila nd’iho.

⁷Enek’iy’oangak’eango, baosomba lisala lina bokengi’ona mpoke la francs iho, lacina bakunja befenda nko meho.

⁸Lacin’eho, lisala liho yotangama Lisala lina Bakila nko le bon’in’one.

⁹Yok’oho baoyi banaki Yelemaya bosumoli otendak’ale bailamaki, ate, Batambaki mpata ntuk’isaso, nk’otuya bon’oto onombukama l’otuya, onoki ban’amoi bana Yisalaele ombukaka botuya;

¹⁰ko balekyaki iho lacin’ena lisala lina bokengi’ona mpoke, yok’onoki Yawe onsumolaka.

¹¹Koko Yesu aemala en’oso bona gouverneur; ko gouverneur amoufola, ate, E oyali nde Lifoka lina Roi lina Ba-Yuda? Ko Yesu amoutodya, ate, Nk’oko bonatend’e.

¹²Eneki nkanga ina toome la bingambe oakolak’ende bakambo, ataamba tu.

¹³Nkwaho Pilato amolokwela, ate, Ofoke baoyi bike banakoakol’iyo?

¹⁴Koko atokutwela, efana nko le yoi limoko; ko gouverneur aofefa bike mene.

¹⁵Mbula la mbula en’esike en’elambedya, gouverneur atungwelaki bato lisungu limoko linalik’iy’osonaka.

¹⁶En’esik’eho baataki lisungu limoi oneyanaki bike, lina linande Balaba.

¹⁷Enek’iy’osolonganaka, Pilato amaufola, ate, Onalang’ino nkotungwel’ino oka nai? yombo Balaba, yombo Yesu onotangama Masiya?

¹⁸Lacin’ende aeyak’oka bamololekya lacin’en’ekuku.

¹⁹Nk’enem’end’okisase ena nkici en’etendelo en’akambo, booli’onande amotomela yoi, ate, Tilake yoi ena likambo lin’oto’oho ona mbongi, lacin’oka emi lenaka bino ena lilotua bon’in’one lacin’enande.

²⁰Koko nkanga ina toome la bingambe baosomya bato losomo lacina baufole Balaba, ko Yesu ayakame.

²¹Koko gouverneur amaufola, ate, L’iy’afe, onalang’ino nkotungwel’ino oka nai? Iy’ate, Balaba.

²²Pilato amaufola, ate, Iya Yesu, onotangama Masiya: njil’oya l’ende? Iyatu bamosumola, iy’ate, Aakamake en’ekulusu!

²³Gouverneur ate, Lanai? Yoi lin’owe linaliki’nd’oilaka lika nai? Koko iyo baokusa lilolua bike mene, Mbo, aakamake en’ekulusu!

²⁴Eneki Pilato oenak’oka bafoke baoyi’anande, koko baotom’etomoko, aotamb’asi, ko aosong’akasa en’oso bon’ato’aho bik’ike, ate, Emi mpoli ena likambo lin’oto’one ona mbongi; likambo lininoamene.

²⁵Ko bato bahatu baokutola, iy’ate, Bakila banande bayalamake likambo liniso la lina ban’aniso.

²⁶Nkwaho amatungwela Balaba; ko eneki’nd’ofomaka Yesu lofomi amolekya oyakama en’ekulusu.

²⁷Nkwaho soldats ina gouverneur baotola Yesu en’otumba bona gouverneur, ko baosusanya eneyal’ende boloi bona soldats bohotu.

²⁸Ko baumola beko to’enande, ko bamolotsa bokoto bon’écarlate.

²⁹Ko baoloha likuka lina beenge, ko baokoiya liho en’ote’onande, ko bamosukya bokombi ena likasa linande y’ome, ko baun’aongo en’oso’onande, bamosisedya, iy’ate, Mbote, Lifoka lina Roi lina Ba-Yuda!

³⁰Ko bamoutela nsoi, ko baotamba bokombi ko bamofoma en’ote.

³¹Enek’iy’okadyaka lisisedy’ende, baumola bokoto’oho, ko bamolotsa bisenda binandamene, ko bamotola oyoaka en’ekulusu.

³²Enem’iy’ofola, baosungya boto’ona Kulene, lina linande Simona; bamounda lacina atole ekulusu ena Yesu.

³³Enek’iy’oyelaka en’edye enetangama Ngolongota, nko Edye ena Lalika

³⁴bamofa vina nko nsanganya l’onganga bon’ololo; koko eneki’nd’omekak’eho, atalanga limela.

³⁵Koko enek’iy’oakak’ende en’ekulusu, baokafa bekoto’enande la mpusa ena lobese; lacina yoi linaliki bosumoli otendak’ale yilame, ate, Bakafaki bisenda binami eneyal’iyoamene, ko bakafaki bokoto’onami la mpusa ena lobese.

³⁶Ko baokisase, ko bamotombanya meho.

³⁷Ko baila etengelo ena likambo linande ena liko lin’ote’onande, ONE NKO YESU, LIFOKA LINA ROI LINA BA-YUDA.

³⁸Koko baiya bafe baakama l’ende ena bikulusu: omoi en’ili bona likasa linande y’ome, omoi ena likasa y’ooli.

³⁹Ko iy’aneta meho bamosaiya, baofukusa bete’eniyo,

⁴⁰Mbo e onehya botumba bona Yakomba ko onofak’oho lakina en’in’esaso, oyoiky’eamene; yomb’oyali Bon’ona Yakomba, kita en’ekulusu.

⁴¹Koko nkanga ina toome l’atengi ban’ekanda la bingambe bamosisedya nk’osamb’oho, iy’ate,

⁴²Ende aikyaki bakin’ato, afayoikyis’endamene. Yomb’ayali Lifoka lina Roi lina Yisalaele, akite en’ekulusu isanga, ko tongiimedya.

⁴³Ailaki botema eneyali Yakomba: yombo Yakomba amololanga, ayoloikya isanga; lacin’oka atendaki, ate, Emi njali nko Bon’ona Yakomba.

⁴⁴Ko baiya banakamaki l’ende ena bikulusu bamosaiya nk’osamb’oho.

⁴⁵Ko bilima bokwela loko lohalotu ena midi yengoko trois heures.

⁴⁶Ko yoka ena trois heures Yesu aololua la lofoso lona lokolo, ate, Eli, Eli, lama, sabakatani? ncina en’aoyi’aho nko, Yakomba enami, Ya komba enami, onjumbelak’emi lanai?

⁴⁷Eneki bamoi banemali meho ookaka baoyi’aho, baila, iy’ate, Aelela Eliya.

⁴⁸Ko isasanga omoi’oniyo aocoa la laango, ko aotamba wusuwusu, aila vinaigre ena boho, ko aak’oho en’okombi, ko amofa lacina amele.

⁴⁹Koko bamoi baila, Mbo bocike, toyoena yombo Eliya angoya oyoikya.

⁵⁰Eneki Yesu ololuaka lakina la lofoso lona lokolo, aolisa bolimo’onande.

⁵¹Ko lenda, esenda en’otumba bona Yakomba eokambwa l’ena liko l’en’ase, bitate bife; ko loko lolila, ko baufe baokambwa;

⁵²ko nketa yokombwa, ko beduo ben’ato bana Yakomba banakunji bike beetwa en’ewedi.

⁵³Enek’iy’ofolaka ena nketa ena mbusa en’eetwelo enande en’ewedi, baotua en’onyanga bon’oeka, ko baenya eneyali bato bike.

⁵⁴Koko capitaine l’iy’anayaaki l’ende banatombanyaki Yesu, enem’iy’oena elilelo ena loko, ko la baoyi banilama, baanga bike mene, iy’ate, Solosolo, one ayaaki nko Bon’ona Yakomba.

⁵⁵Ko bayato bike banakilaki Yesu nk’ena Ngalilaya ko banokambyaki, bayaaki meho, bayalende en’osana;

⁵⁶bamoi’aniyo nko Malia Mangandala, la Malia nyango ena Yakobo la Yose, ko la nyango ena ban’ana Zebedayo.

⁵⁷Eneki likolo oyelaka, boto’omoi ntuki ena toma, lina linande Yosefa, on’onyanga bona Alimataya, onoyaaki endamene bokili’ona Yesu, aoya.

⁵⁸Ko aocoa eneyali Pilato, ko aolomba boduo bona Yesu. Ko Pilato aotom’onyua bayofe boduo.

⁵⁹Yosefa aotamb’oduo, ko aofuta boho l’esenda ena soto;

⁶⁰aamby’oho ena nketa enandamene ena ntoto eneki’nd’ocimaka ena lufe, ko aokilimodya lufe lina likolo mene en’ofolo bona nketa, ko aocoa.

⁶¹Malia Mangandala la Malia emoi bayaaki meho, bayakisase en’ili bona nketa.

⁶²En’ina bona loi, nko bina bonoya ena mbusa ena bina bon’ekoedyo, nkanga ina toome la Bafalusi baosolongana eneyali Pilato,

⁶³iy’ate, Nyangetuke, tomokanedya yoi linaliki bofoci’oho oilaka kum’atawu, ate, Nko bin’esaso beosila, emi nongetwa en’ewedi.

⁶⁴Lacin’eho, toma yoi lacina baake nketa la locili yengoko bina bon’esaso, bakili’anande batongoyiya boduo, ko basumol’ato, Mbo amoletwa en’ewedi, ko liunga lina mbusa litoleka liho lin’oso.

⁶⁵Pilato amasumola, ate, Boyali l’oloi bona batombanyi: bombocoa, boake la locili, bosamb’on’iny’ino.

⁶⁶Ko baocoa, baaka nketa la locili, ko baaka ndembi ena lufe, iyo l’oloi bona batombanyi.