Read ngando Matayo 28 Bible Online

Matayo 28 - ngando bible

Matayo 28

¹Ena mbus’ena Sabata, ena limatsako lin’ekedyo ena bina bon’oso bon’eyenga, Malia Mangandala la Malia emoi baoya oyolenda nketa.

²Ko lenda, loko lolilaki bike mene, lacin’oka ekima ena Yawe akitaki ena loola, ko aohalingola lufe, ko aokisase ena lufe.

³Elongi enande eyaaki yoka lihalihali, ko bisenda binande telele yoka mpembe;

⁴ko batombanyi bailima nko mbilima lacin’ena losomo lonande, ko baoyalama yoka bato banowaka.

⁵Ekima ena loola aolokwela bayato, ate, Botaangake; emi leya ino boyakembe Yesu onakamaki en’ekulusu.

⁶Ende afayali mendo, lacin’oka amoletwa en’ewedi, yok’onoki’nd’otendaka. Boyaka, boyene edye eneki Nkolo oetamaka.

⁷Koko bocoaka yaya, boyosumole bakili’anande, in’ate, Amoletwa en’ewedi. Ko lenda, ende ayacu en’oso’onino ena Ngalilaya; bongen’ende meho. Lenda, mokosumol’ino.

⁸Ko bauma ena nketa la mbango, nko la mbanga ko l’ekiko mene, ko baocoa la laango lacina basumole bakili’anande.

⁹Ko enem’iy’ocoa, lenda, Yesu aoukana l’iyo, amaesa, ate, Bonyangelaka. Iyo baolama, baunda bakak’anande, ko bamokumya.

¹⁰Ko Yesu amasumola, ate, Botaangake; bocoaka, boyosumole bakune’anami baete ena Ngalilaya, ko bangonjena meho.

¹¹Enem’iy’ocoa, lenda, bamoi ban’atombanyi baoya en’onyanga, ko baosumola nkanga ina toome baoyi banilamaka bahatu.

¹²Enek’iy’osusanaka la bingambe oyanga eango, baofa soldats nyongo ena nkolo,

¹³iy’ate, Ino bilaka, Mbo enem’is’otot ilo bakili’anande baoya oyongola boduo’onande l’oco.

¹⁴Ko yombo gouverneur aoka yoi line, iso tongokadya likambo l’ende: ino botakandakandake.

¹⁵Ko lyo, enek’iy’otambaka nyongo, bailaki yok’onok’iy’olakamaka. Ko yoi line lisekolaki eneyali Ba-Yuda, ko liyali nko le bon’in’one.

¹⁶Koko bakili jo l’omoko baocoa ena Ngalilaya, ena lingonji linaliki Yesu oasumolaka.

¹⁷Enek’iy’oenak’ende bamokumya; koko bamoi baokandakanda.

¹⁸Koko Yesu aoy’eneyal’iyo, aotenda l’iyo, ate, Lifoka lihalitu limofam’emi l’ena loola l’ena loko.

¹⁹Lacin’eho, bocoaka, bolake’ato en’enyanga behetu, bayalame bakili’anami; baine en’asi ena lina lin’afango, ko lina Bona, ko lina Bolimo bon’olotsi;

²⁰balake lacina bamonya baoyi banaki’m’okolakak’ino bahatu. Ko lenda, emi njali l’ino bina behetu, yengoko esimbelo en’esike.