Read ngando Matayo 3 Bible Online

Matayo 3 - ngando bible

Matayo 3

¹En’esik’eho Yoane Bini aoya, ayasumole bosimo ena sengelenge ena Yudea,

²ate, Boyosume en’aoyi’owe, lacina lifoka lina loola yoolama.

³One nko boto onoki Yesaya, bosumoli, otendelak’ale yoi, ate, Lofoso lon’oto’omoi onololomwa ena sengelenge, Boongya mboka ena Yawe, Bonanola mboka inande cilili.

⁴Yoane mene aolota bisenda bina besa bena ngamela, ko l’okoli bon’ekoto ena nyama ena litenaka linande; ko toma tonande tona ndaka nko mpalika la bohe.

⁵Ko baise Yelusalema la baise Yudea bahatu, la baise bengili ben’oli la Yoladane bahatu baocoa eneyali ende;

⁶ko bainama l’ende ena lose lona Yoladane, bayafisole baoyi’owe’aniyo.

⁷Koko eneki’nd’oenaka bike bona Bafalusi la Basadoke baoya en’inelo enande, amasumola, ate, Ino ban’ana njua, onokolakak’ino lacina bolote bolema bonongoya oka nai?

⁸Boot’emamo benekoli l’eumbelo en’aoyi’owe.

⁹Ko botakanelake oyila en’etem’enino, Mbo iso toyali l’afango’oniso oka Abalayama; lacin’oka emi lakosumol’ino, Yakomba anunolisa ban’ana Abalayama nk’ena baufe bane.

¹⁰En’esik’ene liswa yilama en’eulu ena bete; lacin’eho, bote l’ote bonofote bemamo ben’olotsi bokotama, ko bookama ena nkoi.

¹¹Solosolo, emi lakin’ino en’asi lacin’en’eumbelo en’aoyi’owe; koko ende onoya ena mbusa enami andek’emi la mpamba, emi mpakoli lacina ntole sapata inande: Ende angokin’ino ena Bolimo bon’olotsi ko l’ena nkoi;

¹²lifofo linande liyali ena likasa linande, ko angomba botumba bonafifedy’ende bopunga nko njomba mene; ko angosusanya bopunga bonande en’otumba bon’emonyedyo; ohonde angotumba mposo la nkoi inifalime tu.

¹³En’esik’eho Yesu aumaki ena Ngalilaya, aoya ena Yoladane eneyali Yoane oyinama l’ende.

¹⁴Koko Yoane amosimba, ate, Emi lalela njiname l’e, ko oya nde eneyal’emi?

¹⁵Koko Yesu amolokwela, ate, Omboila; akoli eneyal’iso tile baoyi bana mbongi bahatu yok’osamb’one. Ko aimedya.

¹⁶Koko eneki’nd’oinamaka, Yesu aotefwa isasanga en’asi; ko lenda, loola lokombwa eneyal’ende, ko aena Bolimo bona Yakomba ayakite yok’ekoso, ko aoya eneyal’ende;

¹⁷ko lenda, lofoso lookana ena loola, Mbo one Bon’onami ona nganji, onombatel’emi enyanga mene.