Read ngando Matayo 4 Bible Online

Matayo 4 - ngando bible

Matayo 4

¹Nkwaho Yesu aotolama la Bolimo ena sengelenge lacina amekame la Satana.

²Koko eneki’nd’okilaka toma beco la biane ntuk’inei, ena mbus’eho aoka njala.

³Ko bomeki aoya oyolokwela, ate, Yombo oyali Bon’ona Yakomba, sumola baufe bane bahalingwa bekonga bena mata.

⁴Koko ende aokutola, ate, Yoi limotengama, Bot’ola afaike la mata kei: aika la baoyi bahatu banafola en’onyua bona Yakomba.

⁵Koko Satana amotola en’onyanga bon’oeka; ko amambya ena liko lin’otumba bona Yakomba, nk’ena nsoli;

⁶ko amosumola, ate, Yombo oyali Bon’ona Yakomba, oyofuse eamene en’ase; lacina yoi limotengama, Ende angotoma bikima binande lacin’ene, Ko bangokotola en’akas’aniyo, Lacina likaka line litofomana la lufe.

⁷Yesu amoutodya, ate, Yoi likina limotengama, Tamekake Yawe Yakomba ene.

⁸Lakina Satana amotola ena lingonji lina litale mene, ko amotuma bafoka bahatu bana benyanga behetu, ko la lokumo lona bafok’aho;

⁹ko amosumola, ate, Yomb’ombosamel’emi, ko onkumya, nongokofa toma tone tohatotu.

¹⁰Yesu amolokwela, ate, Uma, Satana; lacina yoi limotengama, Kumya Yawe Yakomba ene, ko okambele nk’ende kei.

¹¹Ko Satana amocika; ko lenda, bikima bina loola baoya oyokambya.

¹²Eneki Yesu ookak’oka Yoane amolundama, aumaki, ko aocoa ena Ngalilaya.

¹³Ko auma ena Nazaleta, ko aoya oyokisase ena Kapalanauma ena mbolimboli la lose, en’enyanga bena Zebulona la Napatali;

¹⁴lacina yoi linaliki Yesaya, bosumoli, otendaka yilame, ate,

¹⁵Bonyanga bona Zebulona, l’onyanga bona Napatali, Bonyanga bon’oli la lose, bili bona Yoladane, Naglilaya ena Befenda;

¹⁶Bato banakisak’ase ena luucu Baenaki fololo en’okolo; Ko fololo efetaki eneyal’iyo Banakisak’ase en’ili ko l’ena lilila lin’ewedi.

¹⁷En’esik’eho Yesu aomatsa osumol’ato bosimo, ate, Bumbela baoyi’owe, lacina lifoka lina loola yoolama.

¹⁸Ko enema Yesu oeta en’oseleka bona lose lona Ngalilaya, aena Simona onotangama Petelo la Andelo on’otwa l’ende en’ecimo, bayafuse lisangi ena lose, lacin’oka iyo bayaaki bakembi bana nse.

¹⁹Ko amasumola, ate, Bonkil’emi, ko nongokiil’ino boyalame bakembi ban’ato.

²⁰Isasanga baumbela basangi, ko bamokila.

²¹Ko enem’end’ocoa, aena bamoi bafe, nko Yakobo, bon’ona Zebedayo, la Yoane on’otwaki l’ende, bayaaki en’atu la Zebedayo bafango’oniyo, bayatele basangi’aniyo; ko amaelela.

²²Isasanga baocika boatu l’afango’oniyo, ko bamokila.

²³Ko Yesu aocoa ena bicimo bina Ngalilaya bihitu nselasela, ayalake ena basunagoga baniyo, ko ayasekodya bosimo bon’olotsi bona lifoka, ko ayaiky’ato nkangi ko la tongitongi bekotua l’ekotua.

²⁴Ko lokumo lonande lolinda en’onyanga bona Sulia bohotu; ko baoyelaki bato bahatu banayaaki la nkangi la bifafo bekotua l’ekotua, ko l’iy’anayaaki la bademona ko l’esinga, ko la nkangi ena nkenyenyala; ko amaikya.

²⁵Ko bik’ike bon’ato bamokila: bato bana Ngalilaya, l’ana Dekapoli, la Yelusalema, la Yudea, ko la bili bona Yoladane.