Read ngando Matayo 5 Bible Online

Matayo 5 - ngando bible

Matayo 5

¹Eneki’nd’oenaka bik’ike bon’ato, aanda ena lingonji; ko eneki’nd’okisak’ase bakili’anande baoy’eneyal’ende;

²ko aomumola bonyua bonande, ko amalaka, ate,

³Iy’anayali biinda en’olimo bakik’ekiko; lacina lifoka lina loola liyali liniyo.

⁴Iy’an’oka lokeseli bakik’ekiko; lacin’iyo bangolombolama lokeseli.

⁵Bana mwi bakik’ekiko; lacin’iyo bangosangola loko.

⁶Iy’anoka baoyi bana mbongi njala la mposa bakik’ekiko; lacin’iyo bangokinda.

⁷Iy’anokamel’ato isei bakik’ekiko; lacin’isei inguta eneyal’iyo.

⁸Iy’anayali l’etema bena soto bakik’ekiko; lacin’iyo bangena Yakomba.

⁹Iy’an’ambany’ato en’efili bakik’ekiko; lacin’iyo bangotangama ban’ana Yakomba.

¹⁰Iy’an’enyama bino lacin’ena mbongi bakik’ekiko; lacina lifoka lina loola liyali liniyo.

¹¹Enengi bato okotang’ino lotango ko bakoeny’ino bino, ko bakofot’ino bowe bon’ekotua behetu lacin’enami, ino bokik’ekiko.

¹²Bonyangelaka ko bokikak’ekiko bike, lacina nkita enino eyali bokolo ena loola, lacin’oka iyo baenyaki basumoli banayaaki en’oso’onino bino nk’osamb’oho.

¹³Ino boyali bokwa bona loko; koko yombo bokwa bosila bolotsi, bongata bolotsi lakina ineya? Boho bofayonge lakina tu: ekoli lacina boho bookame, ko bato baikamel’oho l’akaka.

¹⁴Ino boyali fololo en’enyanga. Bonyanga bonoyali ena lingonji bofafisamisa.

¹⁵Bato bafafetsa moinda lacina baile eho en’ase ban’ifondo; bail’eho en’eilelo ena moinda, ko eofeta eneyali bato bahatu banayali en’otumba.

¹⁶Nk’osamb’oho bila fololo enino efete en’oso bon’ato, lacina baene bikambwa binino bin’olotsi, ko bakumya Bafango’onino onoyali ena loola.

¹⁷Botakanelake oka njaki oyehya basangya ko l’aoyi banaki basumoli otendaka. Ntaya oyehya: njaki lacina baoyi’aho bailame.

¹⁸Solosolo, emi lakosumol’ino, yengoko loola la loko bauma, efana yoi limoko ko efana indembindembi imoko ininguma ena basangya, yengoko baoyi bahatu bailama.

¹⁹Lacin’eho, boto onotembola boek’omoi bona beeka bene beneleki tosalisali, ko alak’ato yok’oho, angotangama isalisali mene ena lifoka lina toola; ohonde boto on’ila beek’eho, ko alak’ato beho, ende angotangama ona lokumo ena lifoka lina loola.

²⁰Emi lakosumol’ino, yombo mbongi enino efaleki mbongi ena batengi ban’ekanda l’ena Bafalusi, bofatuaki ena lifoka lina loola tu.

²¹Ino bomoka baoyi banak’iy’osumolaka bato en’alale, iy’ate, Botayakake’oto; ko onongoyak’oto angokolana l’ekwelo ena likambo.

²²Koko emi lakosumol’ino, boto l’oto onoka efili enande nkele angokolana l’ekwelo ena likambo; ko boto l’oto onila efili enande, ate, E ilemeleme! angokolana l’ekwelo ena likambo la likita lina balimo; ko boto onila, ate, E bolole! ende angokolana la Ngena ena nkoi.

²³Lacin’eho, yombo olekya nganji ene ena mesa ena mbeka, ko enayel’e meho okanedy’oka e l’efili ene boyali la likambo,

²⁴cika nganji ene en’oso bona mesa ena mbeka, ko coaka oyosimbane k’efili ene en’oso, ko omboya oyolekya nganji ene.

²⁵Enaco’e la bookyi’owe’one ena mboka, ongya lisimbana l’ende isanga, lacina bookyi’owe’one atokotola eneyali juge, ko juge atokolekya eneyali police, ko otofusama en’otumba bon’enyolo.

²⁶Solosolo lakosumola, ofafole meho yengoko olekya toma tohatotu, efana nko le centime emoko eneciki tu.

²⁷Bomoka yoi lin’ilamaki’ale, Tatatake likele;

²⁸koko emi lakosumol’ino, boto l’oto onolend’oyota la mposa ena ntata ena likele l’ende, amosila litata likele l’oyoto’oko en’otem’onande.

²⁹Yombo liso line y’ome yokokumba, kuma liho, ko oka liho nko mboka; bolotsi eneyal’e lacina elama ena emoko eehyame, yonge line lihalitu litofusama ena Ngena.

³⁰Ko yombo likasa line y’ome yokokumba, kesa liho nko pa, ko oka liho mboka; bolotsi eneyal’e lacina elama ene emoko eehyame, yonge line lihalitu litofusama ena Ngena.

³¹Koko yoi yilamaki’ale, Onongumola booli’onande, ayofe bokanda bona njaka ena liala;

³²koko emi lakosumol’ino, onongumola booli’onande kuma booli ataata likambo lina likele, amil’ende boyoto’ona lisamba; koko boto onosonga booli onoki bome’omoi oumolaka, atata nko likele.

³³Lakina, bomoka yoi lin’ilamaki eneyali bato ban’alale, Tatehake eteho ena mpoci; koko ilela Yawe bisemba binik’otehaka.

³⁴Koko emi lakosumol’ino, Botatehake tu; botatehake la loola, lacina loho loyali nk’ieko ina Yakomba;

³⁵botatehake la loko, lacina loho loyali nko limbolongo lin’akak’anande; botatehake la Yelusalema, lacina boho boyali bonyanga bona Lifoka lin’okolo lina Roi;

³⁶tatehake l’ote’one, lacin’e ofilisa bese bomoko bona lifo line telele yombo tukulu.

³⁷Yoi linino liyalamake nko O, O; la Efana, Efana; lacina baoyi banaleki baho baoya nk’eneyali Boto’oho on’owe.

³⁸Bomoka yoi lin’ilamaki’ale, Liso licindanake la liso, koko lino la lino;

³⁹koko emi lakosumol’ino, Botasimbake on’owe. Ohonde yombo boto akofoma losoola ena litama line y’ome, ohalingwele litama limoi.

⁴⁰Yombo boto alanga akotole en’etendelo en’akambo, ko asokotamba bokoto’one bona ntundulu, imedya lacina atambe bokoto’one bona liko nkoho.

⁴¹Ko yombo boto akosomya losomo lacina ocu l’ende kilometre emoko, coaka l’ende kilometres ife.

⁴²Faka boto onokolomba, ko tatumelake boto onolanga asombe eneyal’e mbusa.

⁴³Bomoka yoi lin’ilamaki’ale, Ok’on’oli l’e nganji, koko oka bookyi’owe’one bowe;

⁴⁴koko emi lakosumol’ino, boka baokyi’owe’anino nganji, bosakel’iy’anakosaiy’ino bosako, bilel’iyo banakook’ino bowe bolotsi, ko boondel’iy’anakonyom’ino ko bakoeny’ino bino;

⁴⁵lacin’ino boyale ban’ana Bafango’onino onoyali ena loola; lacin’oka ende akedya bato ban’owe la bato ban’olotsi bina bonande, ko alweya banakoli l’anafakoli mbula.

⁴⁶Yombo bato bakook’ino nganji, ko ino boka nko bato’aho nganji, bosokokolana l’oluko boka nai? iya, basusanyi bana mpuci bafile yok’osamb’oho?

⁴⁷Ko yomb’ino beesa banotwa l’ino kei, boleki bato’akina bokotua’oya? Befenda bafile nde yok’osamb’oho?

⁴⁸Lacin’eho, boyalamaka la mbongi enakolana, yoka bosamb’onoyali Bafango’onino onoyali ena loola la mbongi enakolana.