Read ngando Matayo 6 Bible Online

Matayo 6 - ngando bible

Matayo 6

¹Boongya lilenda, botongoyila bikambwa binino bina mbongi en’oso bon’ato, lacin’iyo baene; yombo bila nd’oho, bofaate boluko eneyali Bafango’onino onoyali ena loola.

²Lacin’eho, enakaf’e nganji in’isei, tafomake bopate en’oso’one, yok’on’ila besimo ena basunagoga l’ena mboka, lacina baate lokumo eneyali bato. Solosolo, lakosumol’ino, iyo bamosila litamba boluko’oniyo.

³Koko enakaf’e nganji in’isei, talangake likasa line y’ooli yeye ekambwa enakamba likasa line y’ome;

⁴lacina nganji in’isei ifame ena lokuko; ko Bafango’one on’ena ena lokuko angokolukola.

⁵Ko en’ond’ino, botayalake l’okotua bon’esimo. Iyo balanga baemale ko baonde ena basunagoga l’en’atanu’a mboka, lacina baenya eneyali bato. Solosolo, lakosumol’ino, iyo bamosila litamba boluko’oniyo.

⁶Koko e, en’ond’e, tuaka en’etenyi ene ena lokuko, ko komb’otumba; koko meho onda Bafango’one onoyali ena lokuko, ko Bafango’one on’ena ena lokuko angokolukola.

⁷En’ond’ino, botaondake la baoyi bana njemba njemba, yoka bosamb’on’ond’iy’anafeya Yakomba: iyo bakanel’oka bangokana lacin’ena bitendelo biniyo bike.

⁸Lacin’eho, botayalake l’okotua’oniyo; lacina Bafango’onino ameya toma tonatoind’ino kum’ino botuufola.

⁹Lacin’eho, boonda yok’one: Bafango’oniso onoyali ena loola, lina line likumyame,

¹⁰lifoka line liye, eango ene eilame ena loko yoka bosamb’on’ilama eho ena loola.

¹¹Otofe toma toniso tona bina l’ina.

¹²Ko ototungole ena besilo beniso, yoka bosambo bonatungol’iso banayali l’esilo l’iso.

¹³Tatotolake ena lomeko, ohonde ototungole eneyali On’owe; lacina lifoka liyali line, ko mpamba eyali ene, ko lokumo loyali lone, bisike la bisike. Ndoho.

¹⁴Yomb’ino botungol’ato en’akambo’aniyo, Bafango onino onoyali ena loola angokotungol’ino.

¹⁵Koko yomb’ino bofatungol’ato en’akambo’aniyo, Bafango’onino afakotungolak’ino en’akambo’anino.

¹⁶Koko enakil’ino toma, botacingyake bilongi yoka bosamb’on’ila bato ban’esimo: iyo baehya bilongi biniyo lacina baenya eneyali bato yoka bakila toma. Solosolo, lakosumol’ino, iyo bamosila litamba boluko’oniyo.

¹⁷Koko e, enakil’e toma, okya bote’one bauta, ko song’elongi ene;

¹⁸lacina ofenya eneyali bato yoka okila toma: oenya nk’eneyali Bafango’one onoyali ena lokuko; koko Bafango’one on’ena ena lokuko angokolukola.

¹⁹Botayomonyedyake inoamene lituka ena loko en’eha liho la tocingocingo ko la mbakwako, ko enatua baiya oyiya lituka.

²⁰Boyomonyedyak’inoamene lituka ena loola, enefana tocingocingo la mbakwako oyehya, ko enefatua baiya oyiya lituka.

²¹Lacina enamonyama lituka line, botem’one bongoyala nkwaho.

²²Moinda ena yonge nko liso. Lacin’eho, yombo liso line liyali sengelele, yonge line lihalitu lingofolala.

²³Koko yombo liso line liyali nko bowe, yonge line lihalitu lingoyala bilima mene. Lacin’eho, yombo fololo eneyali ena ntoto ene eyali nko bilima, bilima boho boseki bike.

²⁴Efan’oto onokambelisa banyangetuke bafe: yombo angok’emoi bowe, ko angolang’ekina; yombo angundamel’emoi ko atembol’ekina. Ino bofakambelisa Yakomba ko la lituka.

²⁵Lacin’eho, lakosumol’ino, botakandakandake lacin’ena liiko lonino, lacin’ena toma tatong’in’ola la bimeelo bining’in’omela; koko botakandakandake lacin’ena yonge, lacin’ena bisenda bining’in’olota. Liiko lofaleki nde toma? ko yonge lifaleki nde bisenda?

²⁶Bolenda mpulu ina liko: iho ifafuse, ko ifanuke, ko ifasusanya toma ena betumba ben’emonyedyo: Bafango’onino onoyali ena loola amafa toma. Ino bofaleki nde mpulu?

²⁷Boto’onino onokolana lifudya botale’onande la bokandokando oka nai?

²⁸Ko bokandakanda lacin’ena bisenda lanai? Bokanela befusi beneyali ena lisala l’okotua bonamela beho: befusi befasale, ko befafom’isenda;

²⁹koko lakosumol’ino Solomona ena bokombe bonande bohotu atalotsama yoka bosamb’onoyali bofusi’one bomoko.

³⁰Ko yombo Yakomba aolotsa tolenge tona basala yok’osamb’oho, tolenge tonatomela bon’in’one, koko tookama loi en’etumbelo, in’anayali l’imeedyo nk’isisali kei, afaleki nde okolots’ino bisenda?

³¹Lacin’eho, botakandakandake, ko botilake mbo, Tongola nai? ko tongomela nai? ko tongolota nai?

³²Lacina banakemba toma tone tohatotu nko Befenda: Bafango’onino onoyali ena loola amey’oka ino boinda tome tone tohatotu.

³³Koko bokemba en’oso mene lifoka linande ko la mbongi enande; ko toma tone tohatotu tongokokokedyama.

³⁴Lacin’eho, botakandakandake lacin’ena loi; bin’ona loi bongokandakanda lacin’ena baoyi banandamene. Bowe bona bina l’ina bokoli la bin’oho.