Read ngando Matayo 7 Bible Online

Matayo 7 - ngando bible

Matayo 7

¹Botakoedyake bato baoyi, botokoedyama inoamene baoyi.

²Lacina bangokokoedy’ino nko l’okotua bonakody’ino; ko bangokeledy’ino nko la lelelo lon’eledy’inoamene.

³Ko olenda ifumbufumbu iniyali ena liso lin’efili ene, ko ofakanele botondo bonoyali ena liso lineamene lanai?

⁴E onoyali l’otondo ena liso lineamene, ongosumola efili ene, ate, Nkofoedya ifumbufumbu iniyali ena liso line, yok’osamb’oya?

⁵Ebosimo! fodya botondo ena liso lineamene en’oso, ko ombena fololo lacina ofodya ifumbufumbu ena liso lina efili ene.

⁶Botafake mbwa toma tonatoekyama en’oeka; ko botafusake perles en’oso’ona nsombo, itongoyikamel’iho, ko itohalingwa oyokook’ino mpota.

⁷Bufola, ko engofama eneyal’ino; bofona, ko bongosungya; bofomela, ko lokombo longokombolama eneyal’ino.

⁸Lacina boto l’oto onufola aotamba, ko boto l’oto onofona aena, ko lokombo lokombolama eneyal’ende onofomela.

⁹Yombo bona bon’oto’omoi’onino alomb’afango lomata, boto’onino onongofa lufe oka nai?

¹⁰Yombo bona alomba nse, angofa njua?

¹¹Yomb’ino bato ban’owe beya lifa ban’anino nganji in’olotsi, Bafango’onino onoyali ena loola afaleki nde yaf’iyo banalomb’ende toma ton’olotsi?

¹²Lacin’eho, baoyi ban’etaketaka banalang’ino bato bakilel’ino, bilela bato nko baoyi’aho; lacina bokotua bon’aoyi ban’asangya l’an’asumoli bahatu nd’oho.

¹³Botuaka en’ofolo bona nkaka; lacina mboka eneyacu en’eehedyo eyali fololo mene, ko bofolo bona mboka eho bond’okolo, ko iy’anatua meho band’ike.

¹⁴Koko mboka eneyacu ena liiko eyali nko nkaka, ko bofolo bona mboka eho bond’isisali, ko iy’anasungy’eho bafan’ike.

¹⁵Boongya lilenda basumoli bana mpoci banay’eneyal’ino yoka mpate, koko en’etem’eniyo bayali yoka nkoi in’olema9

¹⁶Bongaeya l’emamo’eniyo. Bato banuka nde bemamo bena vina ena beenge? yombo bateli ena bafengolankoi?

¹⁷Nk’osamb’oho bote l’otebon’olotsi boot’emamo ben’olotsi; koko bote bon’owe boot’emamo ben’owe.

¹⁸Bote bon’olotsi bofotisa bemamo ben’owe; ko bote bon’owe bofotisa bemamo ben’olotsi.

¹⁹Bote l’ote bonofote bemamo ben’olotsi bokotama, ko bookama ena nkoi.

²⁰Lacin’eho, bongaeya nko l’emamo’eniyo.

²¹Ef’iyatu banansumol’emi Nkolo, Nkolo, bangotua linga ena lifoka lina loola: onotu’olo nk’ende onila eango ena Bafango’onami onoyali ena loola.

²²Bato bike bangonsumol’emi en’in’oho, iy’ate, Nkolo, Nkolo, iso totasumola nd’ato baoyi ena lina line? totafodya nde bafoi ena lina line? totakamba nde bikambwa bina mpefa bike ena lina line?

²³Ko nongasumola, emite, Ntake-y’ino tu, in’anil’owe, bum’eneyal’emi.

²⁴Lacin’eho, boto l’oto onoka baoyi’ane’anami, ko ail’aho, akolana la boto ona bomwu onofakak’otumba ena lufe.

²⁵Ko mbula eolwa, ko lofongo lokumba, ko lofom’otumb’oho; ko botakwa, lacin’oka boho bofakamaki ena lufe.

²⁶Koko boto l’oto onoka baoyi’ane’anami, ko afile’aho, akolana l’oto oninda bomwu onofakak’otumb’onande en’edye ena longewu.

²⁷Ko mbula eolwa, ko efela eoyela, ko lofongo lokumba, ko lofom’otumb’oho, ko bokwa, ko ekwelo en’otumb’oho eyaaki bik’ike.

²⁸Koko eneki Yesu okadyaka baoyi’ane, bik’ike bon’ato baofefa la lilako linande,

²⁹lacin’ende alakak’iyo l’okotua bon’oto onoyali la lifoka, efa yoka batengi’aniyo ban’ekanda.