Read ngando Matayo 8 Bible Online

Matayo 8 - ngando bible

Matayo 8

¹Eneki’nd’okitaka ena lingonji, bik’ike bon’ato bamokila.

²Ko lenda, boto onoyaaki la nkangi en’okenge aoya oyoosamela, ate, Nkolo, yombo olanga nd’oho, onsongisa.

³Ko Yesu aociedya likasa linande, amosuka, ate, Lalanga, songwaka. Isasanga aosongwa ena nkangi enande en’okenge.

⁴Yesu amosumola, ate, Lenda, tasumolake boto’omoko; coaka mboka ene, oyotume eneyali nkanga, ko lekya toma tatoki Mose okodyaka yoka ndembi eneyal’iyo.

⁵Eneki Yesu ofolaka Kapalanauma, capitaine emoi aoya eneyal’ende, ko amoonda,

⁶ate, Nkolo, bosali’onami aeci en’ola la nkangi ena nkenyenyala, ko aok’efafo mene.

⁷Ko Yesu amosumola, ate, Nongoya oyoikya.

⁸Capitaine amokutwela, ate, Nkolo, mpakoli lacin’e otua en’otumb’onami: tenda nko yoi kei, ko bosali’onami angika.

⁹Lacin’emi nkoho, kang’ato’amoi bayali ena liko linami, emamene nde nde la soldats ena lifoka linami; lasumol’one, Coaka, ko aocoa; ko lasumol’okina, Yaka, ko aoya; ko lasumola boombo’onami, Ila yok’one, ko aila.

¹⁰Eneki Yesu ookaka, aofefa, ko aosumol’iyo banokilaki, ate, Solosolo, lakosumol’ino, ena Yisalaele mene ntene imeedyo inileki ine tu.

¹¹Ko lakosumol’ino, bato bike bangoya ena Est l’ena Ouest, ko bangokisase la Abalayama la Isaka la Yakobo ena lifoka lina loola;

¹²ohonde ban’ana lifoka bangofusama en’ilima en’anza; bilelo bina mposoli la nkenyanya en’aino bangoyala meho.

¹³Koko Yesu aosumola capitaine, ate, Ombocoa, yoi yilame I’e yok’onok’oimedyaka. Ko bosali’onande aikyama nk’ena heure eho.

¹⁴Eneki Yesu otuaka en’otumba bona Petelo, aena nyango en’ooli bona Petelo aeci la nkangi en’efefe.

¹⁵Ko aosuka likasa linand, ko nkangi en’efefe emocika, ko ende aetwa, ko amasaela.

¹⁶Koko la likolo baoya l’ato bike banayaaki la bademona; ko ende aofodya bademona la yoi lina ntenda, ko amaiky’iyatu banayaaki la nkangi;

¹⁷lacina yoi linaliki Yesaya, bosumoli, otendaka yilame, ate, Endamene aotamba tongitongi toniso, ko aotola nkangi iniso.

¹⁸Eneki Yesu oenaka bik’ike bon’ato baosusana eneyali ende, ailaki, ate baleke lose.

¹⁹Ko botengi’omoi bon’ekanda aoya oyosumola, ate, Bolaki, nongokokila bili bon’etaketaka bonaco’e.

²⁰Yesu amosumola, ate, Bembanga beyali l’ekole beniyo, ko mpulu ina liko iyali l’aocu; ohonde Bon’on’oto afan’edye en’amby’ende bote’onande.

²¹Ko omoi bon’akili’anande amolokwela, ate, Nkolo, ompe etelo ncu oyokunja bafango’onami en’oso.

²²Koko Yesu amosumola, ate, Onkile, cikela ban’ewedi bakunje ban’ewedi baniyoamene.

²³Eneki’nd’oyokelaka en’atu, bakili’anande bamokila nko meho.

²⁴Ko lenda, lofongo lona lokolo mene lokumba ena lose, ko boatu bomatsa yina l’afukumo bana lose; koko ende aeci l’ilo.

²⁵Ko bakili’anande baoy’eneyal’ende bamoetola, Mbo, Nkolo, otoikya, towa!

²⁶Ko amalokwela, ate, In’anayali l’imeedyo nk’isisali kei, bok’ofolu lanai? Enem’end’oetwa, aofekya lofongo ko l’asi bana lose, ko baoyalama mwi nkwaho.

²⁷Koko bato’aho baofefa, iy’ate, Boto’one and’oya? Lofongo la basi bana lose bamimedy’ende!

²⁸Eneki’nd’olekaka en’ili bona lose, aoyela en’onyanga bona Ba-Ngandala, ko bato’afe banayaaki la bademona baukana l’ende, baoya nk’ena nketa, bato bana bolema mene, efan’oto onetisa ena mboka eho.

²⁹Ko lenda, baololomwa, Mbo, Iso l’e, Bon ona Yakomba, tond’oya? Omoya nde oyotoenya bino kuma esike etayele?

³⁰Koko botonga bona nsombo bon’okolo boyaaki meho en’osana, iyale toma.

³¹Ko bademona bamoonda, iy’ate, Yomb’otofodya, ototome en’otonga bona nsombo.

³²Ende amasumola, ate, Bombocoa. Ko baofola, ko baotua ena nsombo; ko lenda, botonga bona nsombo bohotu bokita lingonji la mbango, bokwela lose, ko nsombo yowa ena lose.

³³Ko iy’analeyaki nsombo toma baolota, ko baocoa mboka iniyo en’onyanga, baosumol’ato baoyi bahatu, ko la yoi lin’ilamaki eneyali bato’aho banayaaki la bademona.

³⁴Ko lenda, bonyanga bohotu baofola oyukana la Yesu; ko enem’iy’oen’ende, bamoonda lacina aume en’onyang’oniyo.