Read ngando Matayo 9 Bible Online

Matayo 9 - ngando bible

Matayo 9

¹Ko aoyokela en’atu, ko aoleka lose, ko aoya en’onyang’onandamene.

²Ko lenda, baoya l’oto on’ise nkangi ena nkenyenyala, aeci ena ntange; ko eneki Yesu oenaka imeedyo iniyo, aosumol’ende onowa nkangi ena nkenyenyala, ate, Bona, nyangela, omotungwa en’aoyi’owe’ane.

³Ko lenda, batengi’amoi ban’ekanda baotenda en’etem’eniyoamene, iy’ate, Boto’one asaiya Yakomba.

⁴Ko Yesu aeyaki nkanyi inik’iy’okanelaka, ko ate, Bokanela baoyi ban’owe ena nkanyi in’etem’enino lanai?

⁵La njila, Omotungwa en’aoyi’owe’ane, la njila, Etwa, ko kenda: l’ah’afe, yoi linalileki locili en’etendelo liya?

⁶Koko lacin’eho ino beye oka Bon’on’oto ayali la lifoka ena loko lacina atungole bato en’aoyi’owe (aosumol’oto on’ise nkangi ena nkenyenyala), Etwa, ambola itunda ine, ko coaka en’otumb’one.

⁷Ko ende aemala, aocoa en’otumb’onande.

⁸Eneki bato’aho bik’ike oenaka, baoka losomo, ko baokumya Yakomba onofaki bato locili lon’okotu’one.

⁹Ko eneki Yesu olindak’isisali, aena boto, lina linande lika Matayo, ayakisase en’efutelo ena mpuci; ko amosumola, ate, Onkil’emi. Ko ende aemala, ko amokila.

¹⁰Enema Yesu okisak’ase en’otumba, noka, basusanyi bana mpuci l’ato ban’owe bike baoya oyokisase l’ende ko l’akili’anande.

¹¹Eneki Bafalusi oenaka yoi liho, baufola bakili’anande, Mbo, bolaki’onino ala toma ende l’asusanyi bana mpuci l’ato ban’owe lacina nai?

¹²Koko eneki Yesu ookaka, amasumola, ate, Bato banakika locili bafalele mpanji: ohonde banawa nkangi.

¹³Bocoak’ononganya ncina en’aoyi’ane: Enalang’emi nk’isei, efa mbeka. Lacin’emi ntaya oyelela bato banakoli: moya oyelela bato ban’owe.

¹⁴Nkwaho bakili bana Yoane baoya eneyal’ende, iy’ate, Iso la Bafalusi tokila toma bekila bike, koko bakili’ane bafakile toma lanai?

¹⁵Yesu amasumola, ate, Bifili bina nsongi baoka nde lokeseli kum’ende ayakisase l’iyo? Koko bina bengoya benengi nsongi oumolama eneyal’iyo, ko bangokila toma en’esik’eho.

¹⁶Efan’oto onosola etate en’esenda ena ntoto en’esenda enekindaki; lacin’oka eho enosolamaka en’okole engokambola esenda lakina, ko bokole bongofula bokolo.

¹⁷Nk’osamb’oho, bato bafangole baana ban’atoto ena bikoto bin’alale, bikoto bitongoyodya, ko baana batongoyutsa, ko bikoto biehyama: baangolaka baana ban’atoto ena bikoto bin’itoto, ko yok’oho le baana le bikoto baomonyama.

¹⁸Enem’end’osumol’iyo baoyi’ane, lenda, chef emoi ena sunagoga aoya oyoosamela, ate, Bon’onami’on’oyoto amosilwa nk’isanga; koko yaka oyotadya likasa line eneyal’ende, ko angika.

¹⁹Ko Yesu aemala, amokila, ende l’akili’anande.

²⁰Ko lenda, boyoto’omoi onoyaaki la nkangi, bakil’anande baetaki mbula jo l’ife, aoya ena mbusa enande, ko aosuka boseleka bon’esenda enande;

²¹lacin’oka akanelaki en’otem’onande, ate, Nko lasuka bokoto’onande kei, tumbe nongika.

²²Koko Yesu aohalingwa, ko amena, ate, Bona, nyangela, imeedyo ine imokoikya. Ko boyoto aika nk’ena heure eho.

²³Eneki Yesu otuaka en’otumba bona chef ena sunagoga, ko aena bafomi bana tofonge, ko l’ato bike bayatome etomoko,

²⁴amasumola, ate, Buma, lacina bonome’one bon’oyoto atawu: aeci nk’en’ilo. Koko iyo baoseka nko tolo.

²⁵Eneki bato ofodyamaka, ende aotua, ko amosuka la likasa; ko bonome aetwa.

²⁶Koko lokumo lona yoi liho losekola en’onyang’oho bohotu.

²⁷Eneki Yesu oumaka meho, mpame ife banodyak’aiso bamokila, baololomwa, iy ate, Bon’ona Dawidi, otookamel’isei.

²⁸Koko eneki’nd’otuaka en’otumba, banodyak’aiso baoya eneyal’ende; ko Yesu amaufola, ate, Bimedya nde emi lakambisa ekambwa ene? Bamosumola, iy’ate, O, Nkolo.

²⁹Nkwaho aosuka baiso’ aniyo, ate, Yoi yilame eneyal’ ino yoka bosamb’on’imedy’ino.

³⁰Ko baiso’aniyo baolifwa. Ko Yesu amasumola, ate, Lenda, botasumolake boto’omoko yoi line tu.

³¹Koko iyo, enek’iy’ofolaka, baocoa osekodya lokumo lonande en’onyang’oho bohotu.

³²Ko enem’iy’ofola, lenda, baoy’eneyal’ende l’oto ona bokukuluku, onoyaaki la demona.

³³Ko eneki demona ofodyamaka, boto’ona bokukuluku aotenda; ko bik’ike bon’ato baofefa, iy’ate, Yengo tene yok’one ena Yisalaele.

³⁴Ohonde Bafalusi bailaki, iy’ate, Aofodya bademona la lifoka lina bademona.

³⁵Ko Yesu aeta en’engili behetu l’ena bicimo bihitu nselasela, ayalake bato ena basunagoga, ko ayasekodya bositno bon’olotsi bona lifoka, ko ayaiky’ato nkangi ina bekotua l’ekotua la tongitongi tona bekotua behetu.

³⁶Ko enem’end’oena bik’ike bon’ato, amaokamel’isei, lacin’oka baolemba ko baofalangasana yoka mpate inifana botombanyi.

³⁷Koko aosumola bakili’anande, ate, Enukwelo eseki bike, solosolo, koko basali bafan’ike.

³⁸Lacin’eho, boonda Nkolo en’enukwelo lacina atome basali en’enukwelo enande.