Read ngando Malako 10 Bible Online

Malako 10 - ngando bible

Malako 10

¹Koko eneki’nd’oemwaka meho, aoya en’onyanga bona Yudea, nk’en’ili bona Yoladane. Ko bik’ike bon’ato baosusana lakina eneyal’ende; ko amalaka lakina yoka bosamb’onalakeel’ende.

²Ko Bafalusi baoy’eneyal’ende, bamomeka la njufola, iy’ate, Yomb’oto aumola booli’onande, afulunganya nde beeka?

³Ko amakutwela, ate, Boeka bonoki Mose okeekedyaka boka nai?

⁴Iy’ate, Mose aimedyaki’oka totenge bokanda bona njaka ena liala, ko tumole booli.

⁵Ko Yesu amakutwela, ate, Akotengelak’ino boeka bone lacin’ena bocilingitano bon’etem’enino.

⁶Ohonde ena limatsako lin’enunwelo Yakomba anunolaki mpame l’oyoto.

⁷La ncina ene boto angocika bafango’onande la nyango enande, ko angambana l’ooli’onande;

⁸ko iy’afe bangoyala yonge limoko; bafayalaki lakina bato’afe: bangoyala nko yonge limoko.

⁹Lacin’eho, boto ataambolake baho banaki Yakomba oambanyaka.

¹⁰Koko enem’iy’oyala en’otumba, bakili’anande bamuufola lakina ena likambo liho.

¹¹Ko amasumola, ate, Boto l’oto onumola booli’onande, ko aosong’okina, aotata likele;

¹²ko yombo booli auma eneyali bome’onande, ko aosongana l’okina, aotata likele.

¹³Ko baoya la banatome eneyal’ende, lacina ayasuke. Ko bakili baofekya iy’anayaki l’iyo.

¹⁴Koko eneki Yesu oenaka yoi liho, aolemwa, ko amasumola, ate, Bacike, banatome bayoya eneyal’emi; botafekyake, lacin’oka baise lifoka lina Yakomba bayali yok’iyo.

¹⁵Solosolo lakosumol’ino, boto l’oto onofatambe lifoka lina Yakomba yok’onome, afatuaki meho.

¹⁶Ko amahama ena beyo benande, ko aotadya bakasa eneyal’iyo, ko amasakela bosako.

¹⁷Eneki’nd’opusolaka ena mboka, boto’omoi aoya eneyali ende la laango, amoosamela, ko amuufola, ate, Bolaki’on’olotsi, njil’oya lacina nsangole liiko lonelofakale?

¹⁸Ko Yesu amokutwela, ate, Ontang’emi bolotsi lanai? Onoyali bolotsi nk’omoko kei, nko Yakomba.

¹⁹Omeya beeka: Tayakake boto, Tatatake likele, Tiyake, Tafotake boto, Tatungyake boto, Fika bafango’one ko l’oyango’one.

²⁰Ko amokutwela, ate, Bolaki, momonya baoyi’ane bahatu nko l’olenge’onami.

²¹Ko eneki Yesu olendak’ende, amookamela nganji; ko amosumola, ate, Oinda nko yoi limoko: coaka, sombya toma tonatoat’e tohatotu, ko faka bato beinda, ko ongata lituka ena loola; ko yaka, onkile.

²²Koko enem’end’ookaka yoi liho, aocingy’elongi, ko aocoa la lokeseli, lacin’oka aataki lituka mene lina toma.

²³Ko Yesu aolengalenga, ko aosumola bakili’anande, ate, Etuelo enatua batuki bana toma ena lifoka lina Yakomba eseki locili.

²⁴Ko bakili baofefa bike mene l’aoyi’ane. Koko Yesu aotenda l’iyo lakina, ate, Bana, etuelo ena lifoka lina Yakomba eniyo banil’etema ena lituka eseki locili.

²⁵La ngamela atianya bokole bona ntonga, la ntuki atua ena lifoka lina Yakomba, onoleki locili nk’etuelo enatua ntuki ena toma.

²⁶Ko iyo baofefa bike mene, ko baoufolana, Mbo onokolana yikyamisa oka nai?

²⁷Yesu amatakamela, ko aila, ate, Yoi line lifilamisa l’ato, ohonde efa yok’oho la Yakomba; lacina Yakomba akambisa baoyi bahatu.

²⁸Ko Petelo aomatsa litenda l’ende, ate, Lenda, iso tomumbela toma tohatotu, ko tomokokil’e.

²⁹Yesu amokutwela, ate, Solosolo, lakosumol’ino, efan’oto onumbelaki botumba, yombo batoolo yomb’akune, yombo bambangela, yomb’afango, yombo nyango, yomb’ooli, yomb’ana, yomb’asala, lacin’enami ko lacin’en’osimo bon’olotsi,

³⁰onofatambaki yok’okam’okama isanga en’esik’ene, betumba, l’atoolo l’akune, l’ambangela, l’anyango, l’ana, l’asala, ko la njen’ino; ko, en’esike enengoya angotamba nko liiko lonelofakale.

³¹Bike’oniyo banayali en’oso bangoyala ena mbusa; ko banayali en’otungu bangoyala en’oso.

³²Ko bayaaki ena mboka enem’iy’ocoa ena Yelusalema; ko Yesu aeta en’oso’oniyo; ko baofefa, ko iy’anokilaki baanga nko mbanga. Ko aotamba lakina ba-jo l’afe, ko aomatsa yasumola baoyi banangilama eneyal’ende.

³³Ate, Lenda, toyacu Yelusalema; ko Bon’on’oto angolekyama eneyali nkanga ina toome, ko l’eneyali batengi ban’ekanda, ko bangokoiy’ende likambo lacina awu, ko bangoleky’ende eneyali Befenda;

³⁴ko iyo bangonyeel’ende, ko bangutel’ende nsoi, ko bangofoma la mpomi, ko bangoyaka; ko en’ina bon’esaso angetwa lakina en’ewedi.

³⁵Ko Yakobo la Yoane, ban’ana Zebedayo bana mpame, baoy’eneyal’ende, iy’ate, Bolaki, tolanga otilel’iso yoi linakufol’iso.

³⁶Amasumola, ate, Yoi linalang’ino nkilel’ino lika nai?

³⁷Iy’ate, Otof’iso ekisel’ase, omoi en’ili bona likasa line y’ome, ko omoi ena likasa line y’ooli ena lifoka line,

³⁸Yesu amalokwela, ate, Ino bofanonganya yoi lineyufol’ino. Ino bomelisa nde ekala enamel’emi? Ko binamisa nde l’inelo eninam’emi?

³⁹Bamosumola, iy’ate, Tinya. Yesu amasumola, ate, Bongomela ekala enamel’emi solosolo, ko bonginama l’inelo eninam’emi;

⁴⁰ohonde ekisel’ase en’ili bona likasa linami y’ome la likasa linami y’ooli ef’enami lacina njofe boto: eho engofam’iyo banaki eho okoedyamaka.

⁴¹Eneki bakili’amoi jo ookaka, baomatsa lilemwa lacina Yakobo la Yoane;

⁴²koko Yesu amaelela eneyal’ende, ko amasumola, ate, Ino bey’oka iy’anatangama bafoka ban’efenda baotumanya bato’aniyo; ko banaleki la lifoka bamatomeela ntomo.

⁴³Ohonde afa yok’oho eneyal’ino: koko onosokolanga ayale boto’on’okolo eneyal’ino, ende angoyala bosali’onino;

⁴⁴ko onosokolanga ayalame boto’on’oso, angoyala boombo bon’inatu.

⁴⁵Lacina Bon’on’oto ataya lacina bato baosael’ende: ayaki lacina asaele bato, ko lacina alekya liiko lonande mbiko lacin’en’ato bike.

⁴⁶Koko baoyela Yeliko; ko enem’end’ouma ena Yeliko, ende l’akili’anande la bik’ike bon’ato, Balatimayo, bon’ona Timayo ona mpame, onodyaki’aiso, aokisase en’oseleka bona mboka ayalombe toma.

⁴⁷Ko eneki’nd’ookak’oka Yesu ona Nazaleta ayali, aomatsa yelela, ate, Yesu, Bon’ona Dawidi, onjokamel’emi isei!

⁴⁸Ko bato bike bamofekya, atatendake; ohonde aofudya yelela la locili mene, ate, Bon’ona Dawidi, onjokamel’emi isei!

⁴⁹Ko Yesu aemala, ko aila, ate, Beelele. Ko baelela boto onodyaki’aiso, ko bamosumola, Mbo kikaka, emala, akelela.

⁵⁰Ko ende aoka bokoto bonande mboka, ko aemala, ko aoya eneyali Yesu.

⁵¹Yesu amufola ate, Ekambwa enalang’e nkilel’e eka nai? Boto onodyaki’aiso amosumola, ate, Laboni, lalanga njene lakina.

⁵²Yesu amosumola, ate, Ombocoa, imeedyo ine imokiikya. Isasanga baiso’anande baolifwa, ko aokila Yesu ena mboka.