Read ngando Malako 11 Bible Online

Malako 11 - ngando bible

Malako 11

¹Ko enek’iy’oolamaka la Yelusalema, ko baoyela mbolimboli la Betefange la Betania, nk’ena lingonji lina Bilaya, Yesu aotoma bakili’anande bafe,

²amasumola, ate, Bocoaka en’ongili bonoyali meho en’oso’onino; ko eneng’in’otua meho, isasanga bongosungya bon’ona mpunda etungi, enetatalame boto; botungole, ko boyaka l’eho.

³Ko yomb’oto’omoi akufol’ino, ate, Bil’one lanai? bosumole, Mbo Nkolo alanga mpunda ene; ko isasanga angotom’eho mendo.

⁴Ko iyo baocoa, ko baosungya bon’ona mpunda, etungi ena fololo, nk’en’anza, en’atano’a mboka; ko bamotungola.

⁵Ko bamoi’aniyo banemalaki meho bamaufola, iy’ate, Nakamb’ino? Botungola bon’ona mpunda lanai?

⁶Ko baokutola yok’onoki Yesu oasumolaka; ko bamaf’etelo.

⁷Ko baoya l’on’ona mpunda eneyali Yesu; ko baotanda bekoto’eniyo en’okunju bona mpunda; ko aotalamel’eho.

⁸Ko bike bon’ato baotanda bekoto’eniyo ena mboka, ko bamoi baokesa bitange bina bete, ko baotanda biho ena mboka.

⁹Ko iy’anetaki en’oso ko l’iy’anokilaki en’otungu baosombola, iy’ate, Hosana! ende onoya ena lina lina Yawe aosakelama bosako!

¹⁰Lifoka linalingoya, nko lina bafango’oniso Dawidi, yosakelama bosako! Hosana en’edye eneleki ena liko!

¹¹Ko Yesu aotua ena Yelusalema l’en’otumba bona Yakomba; ko eneki’nd’osisolaka baoyi bahatu, la likolo aofola ko aocoa Betania, ende l’akili jo l’afe.

¹²Ko en’ina bona loi, enek’iy’ocikaka Betania, aoka njala.

¹³Ko eneki’nd’oenaka bote bona liteli en’osana, ko boyaaki la nkase, aoya lacina aene, yombo angosungya bemamo meho; koko eneki’nd’oyelaka meho, atasungy’iyema yengoko nkase kei lacina esik’eho etayala esike en’ateli.

¹⁴Ko Yesu aosumola bote, ate, Boto atalake bemamo bene lakina bisike bihitu! Ko bakili baoka yoi liho.

¹⁵Ko baoya ena Yelusalema; ko eneki Yesu otuaka en’otumba bona Yakomba, aomatsa lifodya iy’anasombyaki baongwa ko l’iy’anasombaki en’otumba bona Yakomba, ko aokukumya mesa iniyo banengisolaki francs ko la nkici iniyo banatekyaki bikoso.

¹⁶Ko atimedy’oka boto atianya botumba bona Yakomba l’iyema ntola.

¹⁷Ko amalaka, ate, Yoi litatengama nde, Botumb’onami bongotangama botumba’bona beondo lacin’en’enyanga behetu? Ohonde ino bomil’oho nk’esusanelo ena baiya.

¹⁸Ko batengi ban’ekanda la nkanga ina toome baoka yoi liho, ko baofon’etelo lacina baoyake; lacin’oka baoangak ende, lacina bato bahatu bafefaki la lilako linande.

¹⁹Ko en’esike ena likolo aofola en’onyanga.

²⁰Ko l’okulu, enem’iy’oeta, baena bote bona liteli bomonyelala nk’ena beluo mene.

²¹Ko eneki Petelo okanedyaka, aosumola Yesu, ate, Labi, lenda, bote bona liteli bonok’omomaka bomonyelala.

²²Ko Yesu amokutwela, ate, Boongya liyala l’imeedyo ina Yakomba;

²³solosolo, lakosumol’ino, nko boto asumola lingonji line, ate, Oyoambole, ko oyofuse ena lose l’okwa; ko afakandakanda en’otem’onande, ohonde aimedya ate yoi linatend’ende lingilama: angena yoi liho yilama.

²⁴La ncina ene, lakosumol’ino, baoyi bahatu banufol’ino ena beondo, bimedy’oka bomosila litamba baho, ko bongata baho.

²⁵Ko enemal’ino lacina boonde, yombo boyali la likambo l’oto’omoi, biikya, lacina Bafango’onino onoyali ena loola akiiky’ino en’aoyi’owe’anino nkoho.

²⁶(Koko yomb’ino bofiky’ato, tumbe Bafango’onino onoyali ena loola afakiikyak’ino en’aoyi’owe’anino.)

²⁷Ko baoya lakina ena Yelusalema; ko enem’end’oselasela en’otumba bona Yakomba, nkanga ina toome l’atengi ban’ekanda la bingambe baoya eneyal’ende;

²⁸ko bamufola, iy’ate, Oila baoyi’ane la lifoka lina nai? ko onokofaki lifoka lacina okambe baoyi’ane oka nai?

²⁹Yesu amakutwela, ate, Emi nkoho nongokufol’ino yoi limoko; bonkutwela yoi liho, ko nongokosumol’ino lifoka linakamb’emi baoyi’ane:

³⁰inelo eneki Yoane oinak’ato—eho eyaki ena loola, yombo enek’ato? Bonsumole.

³¹Ko baotendelana, Mbo yomb’is’ate, Eyaki ena loola, tumbe ende angotila, Mbo ino botimedy’ende lacina nai?

³²Koko yombo is’ate, Enek’ato fo…; baangaki bato, lacin’oka bato bahatu batangaki Yoane nko bosumoli.

³³Ko baokutwela Yesu, iy’ate, Iso tofeya; ko Yesu amasumola, ate, Ko l’emi mpakosumol’ino lifoka linakamb’emi baoyi’ane.