Read ngando Malako 13 Bible Online

Malako 13 - ngando bible

Malako 13

¹Ko enem’end’ofola en’otumba bona Yakomba, omoi ona bakili’anande amosumola, ate, Bolaki, lenda, bokotua bona baufe, ko l’okotua bon’etumba!

²Koko Yesu amokutwela, ate, Oena nde betumb’ene ben’ekolo? Efaataki linga lufe limoi ena liko ya lufe likina linalifafusamaki en’ase!

³Enem’end’okisase ena lingonji lina Bilaya, nko ndendana l’otumba bona Yakomba en’ili’ol’ei, Petelo, la Yakobo, la Yoane la Andelo bamufola ena lokuko, iy’ate,

⁴Otosumole, esike enengi baoyi’ane oilama eka nai? ko ndembi en’esike enengi baoyi’ane bahatu oolama yenya eka nai?

⁵Ko Yesu aomatsa oyasumola, ate, Boongya lilenda, lacina batokokungy’ino;

⁶lacina bato bike bangoya ena lina linami, ko bangila, Mbo emi nk’ende; ko bangokungya bato bike.

⁷Ko eneng’in’ooka besimo ben’ita ko la nkindo in’ita, botakandakandake: ekoli lacina baoyi’ane bailame; koko esimbelo efa meho.

⁸Bonyanga bonokan’ita l’onyang’omoi, ko lifoka la lifoka; bililelo bina loko bingata en’ili’emoi; ko njoci ina njala ko la bino bangoya nkoho: baoyi’ane bayali yoka limatsako lina lonwa.

⁹Koko boyolendak’inoamene; lacina bangokoleky’ino ena bakita ban’alimo; ko bongofomama mpomi ena basunagoga; ko bongemala en’oso bona gouverneurs ko l’afoka bana rois lacin’enami, yoka ndembi eneyal’iyo.

¹⁰Koko ekoli lacina bosimo bon’olotsi bosekodyame eneyali benyanga behetu en’oso.

¹¹Koko yombo bakotol’ino en’etendelo en’akambo, botakandakandake en’oso lacin’ena baoyi banang’in’otenda: bongotenda nko baoyi banangofam’ino en’in’oho; lacina onotenda ef’ino: Bolimo bon’olotsi kongoatenda.

¹²Botoolo angolekya bakune en’ewedi, ko bafango angolekya bon’onande; ko bana bangangela bafango la nyango, ko bangatoma en’ewedi.

¹³Ko bato bahatu bangokook’ino bowe lacin’ena lina linami; ohonde onongocindelana la locinji yengoko nsimbo, ende angika.

¹⁴Lacin’eho, eneng’in’oena eehedyo ena nsefo mene eemali en’edye enefakoli l’ende oyemala—ende onanda aongyake linonganya ncina en’aoyi’ane—iyo banayali ena Yudea balotake en’angonji;

¹⁵ko ende onoyali ena liko y’otumba atakitake, ko atatuake en’otumba oyumola iyema meho;

¹⁶ko ende onoyali ena lisala atutwake la mbusa lacina atambe bokoto’onande.

¹⁷Lokeseli mene eneyal’iyo banayali la baemi ko l’eneyali beale en’ina beho!

¹⁸Ko boonda lacina elotelo enino efilame en’esike ena lifia.

¹⁹Lacina bina beho bengoyala esike ena bino mene—bino bitaate yok’oho en’oso, ena limatsako mene lin’enunwelo eneki Yakomba onunolaka, yengoko esik’ene, ko bifaataki lakina yok’oho tu.

²⁰Yombo Nkolo atakokodya bina beho, tumbe efan’oto onosokoika tu. Ohonde ende amokokodya bina beho lacin’ena basonami banaki’nd’oyosonelak’endamene.

²¹En’esik’eho, yombo boto akosumol’ino, ate, Lenda, Masiya ayali mendo, yombo, Lenda, ayali meho, botimedyake;

²²lacina Ba-Masiya bana mpoci la basumoli bana mpoci bangemala, ko bangotuma ndembi ko l’ikambwa bina mpefa, lacina, yombo bainya, bakungya basonami mene.

²³Koko ino, boongya litombanya. Lenda, mokosumol’ino baoyi bahatu nk’en’oso.

²⁴Ko en’ina beho, ena mbusa ena bino biho, bina bongocoa fici, ko ngondo efalolomaki,

²⁵ko tooto tona loola tongokwa, ko bikambwa biniyali ena loola bingolidyama.

²⁶Nkwaho bangena Bon’on’oto ayayi ena bailo bana loola la mpamba mene ko l’okonde.

²⁷Koko angotoma bikima binande lacina basusanya basonami banande nk’ena mpongo ih’inei, nk’ena nsimbo mene ena loko yengoko ena nsimbo mene ena loola.

²⁸Ko bolakamaka l’ekolanya ena bote bona liteli: enacoa bitange bolu’olu, ko tokasekase tomatsa limela, ino bey’oka esike ena luma eolama.

²⁹Nk’osamb’oho, eneng’in’oena baoyi’ane bayilame, bey’oka Ende aolama, ayali nk’en’efolo.

³⁰Solosolo lakosumol’ino, eotwelo ene efumaki yengoko baoyi’ane bahatu bailama.

³¹Loola la loko banguma; koko baoyi’anami bafuinaki tu.

³²Koko efan’oto oneya bin’oho ko la heure eho; la bikima bina loola, la Bona, efan’oneya, yengoko Bafango kei.

³³Bolendaka, botombanyaka, ko boondaka, lacin’ino bofeya esik’eho.

³⁴Eyali yoka boto onocoa bokita en’onyang’omoi; ko aocik’otumb’onande, ko aofa baombo’anande bosala, boto l’oto ekambwa enande ntutuma, ko aosumola botombanyi aongya litombanya.

³⁵Ino botombanyaka, lacina bofeya esike enengi mene’otumba oya—yombo la likolo, yombo ena kelekele en’oco, yombo enakel’ina, yombo l’okulu;

³⁶lacina atongoya sasimo, ko atokosungy’ino kuma beci.

³⁷Yoi linakosumol’emi lasumola bahatu, Botombanyaka.