Read ngando Malako 14 Bible Online

Malako 14 - ngando bible

Malako 14

¹En’esik’eho, bekolo benecikalaki en’oso bon’elambedya en’Etelo l’ena mampa enefana nyango nko befe kei; ko nkanga ina toome la batengi ban’ekanda bafonaki etelo lacina baunde Yesu la longo, lacina baoyake;

²koko iy’ate, Ef’en’ina ben’elambedya, lacina bato batonotom’etomoko.

³Eneki Yesu oyalaka ena Betania, en’otumba bona Simona on’okenge, kum’ayakisase oyole toma, boyoto’omoi onoyaaki la likoko lina alabasitolo lin’auta bana mpimbo en’olotsi, nko bauta ban’otuya mene, aoya eneyal’ende; ko aola likoko, ko autela bauta en’ote’onande.

⁴Koko bamoi banayaaki meho baolemwa, ko baolokwelana, Mbo baut’ane bamolehyama yok’one lacina nai?

⁵Nko boto asombyaki baho, tumbe amolata francs inileki mpata bekama besaso, lacina afe bato beinda. Ko baoninganinga lacin’ena boyoto’oho.

⁶Koko Yesu aila, ate, Bocike; ino bonyom’ende lanai? Amonkambel’emi ekambwa en’olotsi;

⁷lacina bato beinda bayali l’ino bisike bihitu, ko esike en’etaketaka enalang’ino bokolana oyakambel’iyo ekambwa en’isei; ohonde bofambat’emi l’ino bisike bihitu.

⁸Amokamb’ekambwa eniny’ende likambisa: amoya en’oso oyokya yonge linami bauta lacin’en’ekunjelo.

⁹Solosolo, lakosumol’ino, bili l’ili behetu benengi bosimo bon’olotsi osekodyama en’enyanga behetu, bangosumol’ato ekambwa eneki boyoto’one okambaka nkoho, yoka liofwa kinande.

¹⁰Koko Yudasa ona Keliota, onoyaaki omoi ona ba-jo l’afe, aocoa eneyali nkanga ina toome lacina alekya Yesu eneyal’iyo.

¹¹Koko enek’iy’ookaka yoi liho, boanyangela, ko bamosemby’esemba lacina bangof’ende francs. Ko aofon’etelo en’olotsi oyangel’ende.

¹²Ko en’ina bon’oso bona mampa enefana nyango, nko bina bonayak’iyo bon’ona mpate bon’Etelo, bakili’anande bamufola, iy’ate, Olanga tocu okodya lacina ola elambedya en’Etelo meya?

¹³Ko aotoma bakili’anande bafe, ko amasumola, ate, Bocoaka en’onyanga, ko bongukana l’oto onoyatole ekucu en’asi; bokile;

¹⁴ko enatu’ende en’otumba, bosumola mene’otumb’oho, Bolaki ate, Etenyi en’efenda eneng’emi l’akili’anami ola elambedya en’Etelo eyali meya?

¹⁵Ko angokotum’ino etenyi ena nkolo ena liko, emosila litandama ko eakolana; botokoedya nko meho.

¹⁶Ko bakili’anande baocoa, ko baoyela en’onyanga ko baosungya yok’onoki’nd’oasumolaka; ko baokodya elambedya en’Etelo.

¹⁷En’esike ena likolo aoya, ende l’akili jo l’afe.

¹⁸Ko enem’iy’okisase ena mesa, kuma bayale toma, Yesu aila, ate, Solosolo, lakosumol’ino, omoi’onino onola toma l’emi angonjangela.

¹⁹Ko baomatsa lioka lokeseli, ko bamufola omok’omoko, iy’ate, Onyi emi?

²⁰Amakutwela, ate, Ayali omoi ona jo l’afe banekela bakasa l’emi ena salani.

²¹Bon’on’oto angocoa, yok’onoki yoi otengamaka lacin’enande, koko bino eneyali boto’oho onangela Bon’on’oto! Bolotsi eneyali boto’oho yomb’ende atotwa!

²²Ko enem’iy’ola toma, Yesu aotamba mampa, aosak’osako, ko aokes’eho ko amafa, ate, Botamba, bolaka; ene nko yonge linami.

²³Ko aotamb’ekala, ko eneki’nd’okangaka Yakomba lokango, amafa, ko iyatu baomela.

²⁴Ko amasumola, ate, Ene nko bakil’anami bana lisangya lina litoto, banutelama lacin’en’ato bike.

²⁵Solosolo, lakosumol’ino, emi mpamelaki lakina basi ban’emamo bena vina yengoko bina bonongi’m’omela baho ban’atoto ena lifoka lina Yakomba.

²⁶Ko enek’iy’oembaka lembo, baocoa ena lingonji lina Bilaya.

²⁷Ko Yesu amasumola, ate, Inatu bongonjumbela; lacina yoi limotengama: Nongoyaka botombanyi, ko mpate ingofanzafanzama.

²⁸Koko ena mbusa, enengi’m’oetwa en’ewedi, nongocoa en’oso’onino ena Ngalilaya.

²⁹Koko Petelo amosumola, ate, Kang’iyatu bakumbela, emi mpakumbelaki tu.

³⁰Ko Yesu amosumola, ate, Solosolo, lakosumol’e, loso lone, nko l’oco’one, eneteke nkoko ena mpame beeka befe, ongonjangana beangana besaso.

³¹Koko aokusa litenda la locili mene, ate, Kanga mbwu l’e, emi mpakanganaki tu. Ko iyatu baotenda nko yoi liho.

³²Ko baoya en’edye enetangama Ngetesemane; ko aosumola bakili’anande, ate, Bokisase mendo, emi locoa oyonda.

³³Ko aotola l’ende Petelo la Yakobo la Yoane, ko aomatsa lioka losomo mene ko aoka bolito bona lokeseli mene.

³⁴Ko amasumola, ate, Botem’onami bolola la lokeseli bike mene, yoka bewedi mene; ino boyala nko mendo, ko botombanyaka.

³⁵Ko eneki’nd’olindak’isisali, aokwa ena loko, ko aonda lacina, yombo yoi yilamisa, heure ene elekany’ende.

³⁶Aila, ate, Aba, Bafa, e oinya likambisa baoyi bahatu; umola ekala ene eneyal’emi. Ohonde, efa yoi linalang’emi: nko yoi linalang’e.

³⁷Ko aoya, ko amasungya kuma baeci, ko aosumola Petelo, ate, Simona oeci nde? Otatombanyisa nde heure emoko?

³⁸Botombanyaka ko boondaka, botoyatua ena losinganya; solosolo bolimo bolanga, koko yonge liyali nko boolu.

³⁹Ko aolinda lakina, ko aonda, nko baoyi banaki’oso.

⁴⁰Ko aoya, ko amasungya lakina kuma baeci, lacina baiso’aniyo baonyonga l’ilo, ko iyo bateya likutwel’ende yoi.

⁴¹Ko aoya boya bon’esaso, ko amasumola, ate, Bomboetama isanga, ko bofomya. Yoi limosila. Esike emoyela. Lenda, Bon’on’oto amolekyama en’akasa ban’ato ban’owe.

⁴²Bemala, tocu; lenda, ende ononjangela amololama.

⁴³Ko isasanga, nk’enem’end’otenda, Yudasa, omoi on’oloi bona jo l’afe, aoya, ende la bik’ike bon’ato, bayasuke nkula l’enganza, baoya nk’eneyali nkanga ina toome, ko l’eneyali batengi ban’ekanda la bingambe.

⁴⁴Ko ende onangelaki Yesu acikelak’iyo ndembi, ate, Boto onongi’m’oleya bolumba, end’oho; bounde, ko botole nko ntungama la locili.

⁴⁵Ko eneki’nd’oyaka, isasanga aocoa eneyali Yesu, ko aila, ate, Labi! ko amosangela la bolumba.

⁴⁶Ko bato baosuka Yesu l’akasa ko bamuunda.

⁴⁷Koko boto’omoi oniyo banemalaki meho aosomola lokula lonande lon’ita, ko aoka boombo bona nkanga iyome, ko aokesa litoi linande pa.

⁴⁸Ko Yesu aotenda l’iyo, ate, Bomoya l’enganza ko la nkula lacina bombund’emi, yoka bato banunda boto’ona liya!

⁴⁹Njaaki l’ino bina l’ina, ndakaki en’otumba bona Yakomba, koko bota mbunda. Koko baoyi’ane bayakambame lacina bitengelo bina Yakomba biilame.

⁵⁰Ko iyatu bamumbela, ko baolota.

⁵¹Koko bofeng’omoi amokila, onokundaki bolumbulumbu bonande nko l’esenda ena mbenza. Bato bamuunda,

⁵²koko ende aocika esenda eho ena mbenza, ko aolota nko bolumbulumbu.

⁵³Koko baotola Yesu eneyali nkanga iyome mene; ko nkanga ina toome ihatu, la bingambe, la batengi ban’ekanda baosolongana eneyal’ende.

⁵⁴Petelo amokila en’osana, ko aotua en’otumba bona nkanga iyome mene, ko aokisase la police, ko aokala nkoi meho.

⁵⁵Ko nkanga ina toome la likita lin’alimo lihalitu baofona temoins banangaka Yesu likambo, lacina baoyake; koko batasungya;

⁵⁶lacin’oka bato bike baofotaki bakambo bana mpoci, koko beloko beniyo betakolana yoka bokotu’omoko tu.

⁵⁷Koko bato’amoi baemala, ko bamofota likambo lina mpoci, iy’ate,

⁵⁸Isoamene tokaki eneki’nd’otendaka, ate, Nongehya botumb’one bonofakamaki l’akasa, ko en’ina besaso nongofak’okina bonofafakamaki l’akasa.

⁵⁹Koko ena yoi line nkoho beloko’eniyo betakolana bokotu’omoko.

⁶⁰Koko nkanga iyome mene aemala ena ntoto eniyo, ko aufola Yesu, ate, Ofambe tu? Yoi line linakoakola bato’ane liyali’oya?

⁶¹Koko ende aoyala mwi, atakutola tu. Nkanga iyome amuufola lakina, ate, E oyali nde Masiya, Bon’onande Onosakelama Bosako?

⁶²Ko Yesu ate, Emi nk’ende; ko ino bongena Bon’on’oto kuma akisase en’ili bona likasa y’ome lina mpamba ena Yakomba, ko ayayi ena bailo bana loola.

⁶³Koko nkanga iyome aokambola bekoto benande, aila, ate, Tokemba ikin’iyako oyakol’ende lacina nai?

⁶⁴Ino bomoka bosao bonasaiy’ende Yakomba. Nakanel’ino? Ko iyatu bamokoiya likambo, iy’ate akoli l’ewedi.

⁶⁵Bamoi baomatsa yutel’ende nsoi; ko baokund’aiso’anande, ko bamofoma, ko bamila, Mbo otosumole. Ko police bamofoma nsoola.

⁶⁶Petelo ayaaki en’etenyi emoi ena mbiolo; ko bosali’omoi bon’oyoto bona nkanga iyome aoya.

⁶⁷Ko eneki’nd’oenaka Petelo ayakale nkoi, amolenda ta, ko aila, ate, E nkoho oyaaki la Yesu ona Nazaleta.

⁶⁸Koko ende aangana, ate, Ei mpeya, ko mpanonganya yoi linatend’e. Ko aofola yoka ena mbalasai; ko nkoko ena mpame eeka.

⁶⁹Ko bosali’oho bon’oyoto amena lakina, ko aomatsa lisumol’iyo banemalaki mbolimboli, ate, One and’omoi oniyo.

⁷⁰Ko aangana lakina. Efan’olingolingo iy’anemali meho baosumola Petelo, Mbo, solosolo e ond’omoi’oniyo, lacin’oka onde bise Ngalilaya.

⁷¹Ko aomatsa lisaiya besao, ko aoteha biteho, ate, Ei mpeya boto’one onatend’ino.

⁷²Ko nkwaho nkoko ena mpame eeka boeka bon’efe. Ko Petelo aokanedya yoi linaliki Yesu osumolaka, ate, Eneteke nkoko ena mpame beeka befe, ongonjangan’emi beangana besaso. Ko eneki’nd’okanedyaka yoi liho aolela la mposoli.