Read ngando Malako 15 Bible Online

Malako 15 - ngando bible

Malako 15

¹Isasanga l’okulu nkanga ina toome, la bingambe, la batengi ban’ekanda la likita lin’alimo lihalitu baoang’eango; ko baokakela Yesu, ko bamotola, ko bamolekya eneyali Pilato.

²Ko Pilato amuufola, ate, E oyali nde lifoka lina roi lina Ba-Yuda? Amokutwela, ate, Nk’oko bonatend’e.

³Ko nkanga ina toome bamoakola baoyi bike.

⁴Ko Pilato amuufola lakina, ate, Ofambe nde? Okaka baoyi bike banakoakol’iyo.

⁵Koko Yesu ataamba lakina; ko Pilato aofefa.

⁶Mbula la mbula en’esike en’elambedya amatungwela lisungu limoko linason’iyo.

⁷Ko boto’omoi ayaaki meho en’onyolo, ende l’iyo banambanaki l’ende en’ita binik’iy’ookanaka, ko bayakaki bato’amoi en’ita biho.

⁸Ko bato bike baololomwa, ko baomatsa oyufola Pilato lacina ailel’iyo bokotua bonoki’nd’oilelak’iyo ena bisike bihitu.

⁹Ko Pilato amakutwela, ate, Bolanga nde nkotungwel’ino Lifoka lina Roi lina Ba-Yuda?

¹⁰Lacina ende aeyaki’oka nkanga ina toome bamololekya lacin’en’ekuku.

¹¹Koko nkanga ina toome baosomya bato lacina Pilato atungwel’iyo nko Balaba.

¹²Pilato aotenda l’iyo lakina, amaufola, Mbo njile’oya l’ende onatang’ino Lifoka lina Roi lina Ba-Yuda?

¹³Iyo baololua lakina, iy’ate, Oyake en’ekulusu!

¹⁴Pilato amaufola, Iya, yoi lin’owe linaliki’nd’oilaka lika nai? Koko baokusa lilolua la locili mene, Oyake en’ekulusu!

¹⁵Ko Pilato amatungwela Balaba, lacin’oka alangaki aile nko yoi linaliki bato’aho bik’ike olangaka; ko eneki’nd’ofomaka Yesu lofomi, amolekya lacina baoyake en’ekulusu.

¹⁶Koko soldats bamotola en’etenyi emoi en’otumba enetangama Pretoire; ko baosusanya boloi bona soldats bohotu.

¹⁷Ko bamolotsa bokoto bona pourpre; ko baoloha likuka lina beenge, ko baokoiya liho en’ote’onande;

¹⁸ko baomatsa oyeesa, iy’ate, Lifoka lina Roi lina Ba-Yuda, Bote!

¹⁹Ko bamofoma en’ote l’okombi, ko bamuutela nsoi, ko bamuunela baongo, ko baosama en’oso’onande.

²⁰Ko enek’iy’okadyaka lisisedy’ende, bamolotola bokoto bona pourpre, ko bamolotsa bekoto benandamene, ko bamotola lacina baoyake en’ekulusu.

²¹Ko boto’omoi aoya ena basala, onotangama Simona, bise Kulene, nko bafango’ona Alesandulo la Lufu; ko baosengeny’ende lacina atole ekulusu ena Yesu.

²²Ko baoya l’ende en’edye enentangama Ngolongota—ncina ena Ngolongota nko Edye ena Lalika.

²³Ko bamofa vina enesangana l’onganga bon’ololo; koko atatamb’eho.

²⁴Bamoaka en’ekulusu; ko baokafa bisenda binande la mpusa ena lobese, lacina banonganya liondo linatamb’oto l’oto.

²⁵Esike enek’iy’oakak’ende en’ekulusu nko neuf heures l’okolu.

²⁶Etengelo ena likambo linande etengamaki ena liko, nko LIFOKA LINA ROI LINA BA-YUDA.

²⁷Ko baoaka baiya bafe ena bikulusu l’ende, omoi en’ili bona likasa y’ome, ko okina en’ili bona likasa linande y’ooli.

²⁸Ko etengelo ena Yakomba eilamaki, eka, Ende aandamaki la bafulunganyi bana beeka.

²⁹Ko iy’anetaki bamotanga lotango, ko baofokosa bete’eniyo, ko baila, Mbo e onehya botumba bona Yakomba, ko onofak’oho lakina en’ina besaso,

³⁰oyoiky’eamene, ko kitaka en’ekulusu!

³¹Nk’osamb’oho nkanga ina toome l’atengi ban’ekanda bamosisedya, ko baolokwelana, Mbo aikyaki bakin’ato: afayoikyis’endamene!

³²Masiya fo, Lifoka lina Roi lina Yisalaele, akitake isanga en’ekulusu, lacina tene ko timedya. Ko iy’anakamaki l’ende ena bikulusu bamosaiya nkoho.

³³Ko en’esike ena midi, liucu yokwela loko lohalotu yengoko trois heures.

³⁴Ko en’esike ena trois heures, Yesu aotenda la lofoso lona lokolo, ate, Eloi, Eloi, lama sabakatani?—ncina en’aoyi’aho, nko Yakomba enami, Yakomba enami, onjumbelaki lanai?

³⁵Bamoi’aniyo banemali meho, enek’iy’ookaka yoi liho, baila, iy’ate, Noka, aelel’Eliya.

³⁶Ko boto’omoi aocoa la laango, aotamba wusuwusu ko aila vinaigre ena boho, ko aongya boho en’okombi, ko amofa lacina amele, ate, Bocike, tofoena yombo Eliya angoya oyokitsa.

³⁷Yo Yesu aololua la yoi lina likolo, ko aofodya bolimo’onande.

³⁸Koko esenda ena ndelo en’otumba bona Yakomba eokambwa nk’ena liko yengoko en’ase.

³⁹Ko eneki capitaine ena soldats onemalaki en’oso bona Yesu oenaka bokotua bonoki’nd’owaka, aila, ate, Solosolo, boto’one ayaaki Bon’ona Yakomba.

⁴⁰Bayato’amoi nkoho baolenda en’osana; bamoi’aniyo nko Malia Mangandala, la Malia nyango ena Yakobo on’osali l’ena Yose, ko la Salome,

⁴¹(nk’iy’anokilaki ko banokambyaki kum’ayali ena Ngalilaya); iyo la bayato’amoi bike bayaaki meho banayaki ena Yelusalema l’ende la laanda lomoko.

⁴²Eneki likolo oyelaka—ko lacin’oka bin’oho boyaaki bina bona nkodya ena Sabata, noka Sabata eciki nko bin’omoko kei—

⁴³Yosefa ona Alimataya, onoyaaki la lokumo mene ena likita lina bingambe, ko alengedyaki lifoka lina Yakomba, ende aoya, ko aotua eneyali Pilato efan’ofolu, ko aolomb’oduo bona Yesu.

⁴⁴Pilato aokandakanda yombo amosilwa isanga solosolo; ko aelela capitaine, ko amuufola yombo amokinda liwa.

⁴⁵Ko eneki’nd’oeyaka yoi liho la capitaine, aofa Yosefa boduo.

⁴⁶Koko Yosefa aosomba esenda ena mbenza, ko amokitsa, ko amofuta l’esenda eho ena mbenza, ko amoambya ena nketa enecimamaki ena lufe; ko aokilimodya lufe lina likolo en’ofolo bona nketa.

⁴⁷Ko Malia Mangandala la Malia nyango ena Yose baena edye eneki’nd’omonyamaka.