Read ngando Malako 16 Bible Online

Malako 16 - ngando bible

Malako 16

¹Eneki bina bona Sabata osilaka, Malia Mangandala, la Malia nyango ena Yakobo, la Salome baosomba toumba, lacina bayi oyokya boduo la toho.

²Ko l’okulu mene en’ina bon’oso bon’eyenga, nko l’ekedyo ena bina, baoya ena nketa.

³Ko baoufolana, iy’ate, Onongotokilimwedya lufe en’ofolo bona nketa oka nai

⁴Koko enek’iy’oenolak’aiso’aniyo, baen’oka lufe limosila yumolama; lufe liho liyaaki bokolo mene.

⁵Ko enek’iy’otuaka ena nketa, baena bofenga ayakisase en’ili bona lo l’ome, ayalote bokoto bona telele bon’otale; ko iyo baoka losomo.

⁶Ende amasumola, ate, Botokake losomo; ino bokemba Yesu ona Nazaleta, onowaki en’ekulusu. Ende amoletwa en’ewedi, afayali mendo; lenda, edye enek’iy’oambyaka eh’ene!

⁷Koko bocoaka, bosumole bakili’anande ko la Petelo, in’ate, E nde ayete en’oso’onino ena Ngalilaya; bongen’ende nko meho, yok’onoki’nd’okosumolak’ino.

⁸Ko baofola ena nketa, ko baolota la mbango; lacin’oka baofefa ko bailima; ko batasumol’oto yoi limoko, lacin’oka baanga nko mbanga.

⁹Eneki Yesu oetwaka en’ewedi en’ina bon’oso bon’eyenga, nko l’okulu mene, aenyaki en’oso eneyali Malia Mangandala, onoki’nd’ofodyak’ale bademona nsambo.

¹⁰Ende aocoa osumol’iy’anayaaki’ale la Yesu, enem’iy’ooka lokeseli ko bayalele.

¹¹Koko iyo, enek’iy’ookak’oka Yesu amolika, ko amenya eneyali Malia, batimedya.

¹²Ena mbusa, aenya l’okotu’okina eneyali bafe’aniyo enem’iy’ocoa ena mboka en’asala.

¹³Iyo baocoa osumola ban’amoi; ohonde batimedya nko le yoi liniyo.

¹⁴Koko ena mbusa aenya eneyali ba-jo l’omoko enem’iy’okisase oyola toma; ko amafela lacin’ena biinda boniyo bon’imeedyo ko la bocilingitano bon’etem’eniyo, lacin’oka batimedya iy’aneenaki eneki’nd’oetwaka en’ewedi.

¹⁵Koko amasumola, ate, Bocoaka en’enyanga behetu, bosumole bato bahatu bosimo bon’olotsi.

¹⁶Ende onimedya ko ainama en’asi angika; koko ende onofimedya angokoiyama likambo.

¹⁷Ndembi ine ingenya l’iyo banimedya: bangofodya bademona ena lina linami; bangotenda la mposo in’itoto;

¹⁸bangambola njua l’akasa; ko kanga bamel’iyema inaw’ato, iho ifayakaki; ko bangotadya bakasa eneyali bato banawa nkangi, ko iyo bangika.

¹⁹Ko Nkolo Yesu, eneki’nd’okadyaka litenda l’iyo, aotambama ena loola, ko aokisase en’ili bona likasa y’ome lina Yakomba.

²⁰Ko iyo baocoa, ko baosekodya bosimo bon’olotsi en’ili behetu, ko Nkolo aokamba l’iyo, ko aokikya yoi la bikambwa bina mpefa en’ili bona liho. Ndoho.