Read ngando Malako 2 Bible Online

Malako 2 - ngando bible

Malako 2

¹Eneki bina bemoi oetaka, aoya lakina ena Kapalanauma, ko yoi yokana ayali nk’en’otumba.

²Ko bato bik’ike baosolongana, nko ekami mene, efana nko l’emaelo en’ofolo bon’otumba; ko ende amasumola yoi.

³Ko baoy’eneyal’ende l’oto onowa nkangi ena nkenyenyala, ayakumbame l’ato’anei.

⁴Ko enetaat’iyo etelo eneyal’ende lacin’ena nkaka en’ato, baotohola nsamba ena liko y’esanga eneki Yesu oyalaka, ko enek’iy’ofudyaka bokole ena nsamba, baokitsa ntange eneki boto onowa nkangi ena nkenyenyala oetamaka.

⁵Ko eneki Yesu oenaka imeedyo iniyo, aosumola boto onowa nkangi ena nkenyenyala, ate, Bona, omotungwa en’aoyi’owe’ane.

⁶Koko bamoi ban’atengi ban’ekanda baokisase meho, bayakandakanda en’etem’eniyo,

⁷Mbo boto’one atenda baoyi’ane lacina nai? Atembola Yakomba. Yomb’efana Yakomba, okina onotungol’ato en’aoyi’owe oka nai?

⁸Isasanga, eneki Yesu oeyaka en’olimo’onande baokandakanda yok’one en’etem’eniyo, amaufola, ate, Bokandakanda la baoyi’ane en’etem’enino lacina nai?

⁹Yombo lasumola boto onowa nkangi ena nkenyenyala, Omotungwa en’aoyi’owe’ane; yombo lomosumola, Etwa, ambola ntange ene, ko kenda: la baoyi bah’afe, yoi linalileki locili ena ntenda lika nai?

¹⁰Koko lacin’eho ino beye Bon’on’oto ayali la lifoka ena loko lacina atungole bato en’aoyi’owe (aosumol’oto onowa nkangi ena nkenyenyala, ate,)

¹¹Lakosumol’e, etwa, ambola ntange ene, ko coaka en’otumb’one.

¹²Isasanga aemala, ko aambola ntange, ko aofola en’oso’on’iyatu; ko iyatu baofefa, ko baokumya Yakomba, iy’ate, Yengo tene bokotu’one.

¹³Ko aofola lakina en’oseleka bona lose; ko bik’ike bon’ato baosolongana eneyal’ende, ko amalaka.

¹⁴Ko enem’end’oeta aena Lewi, bon’ona Alafayo, ayakisase en’edye enafut’iyo mpuci; ko amosumola, ate, Onkile. Ko aemala, ko amokila.

¹⁵Ko eneki Yesu okisak’ase oyola toma en’otumb’onande, basusanyi bana mpuci la bato ban’owe bike baokisase la Yesu ko l’akili’anande, lacin’oka iyo bayaaki bike, ko bamokila.

¹⁶Eneki batengi ban’ekanda la Bafalusi oenaka ayale toma, ende l’asusanyi bana mpuci ko l’ato ban’owe, baoufola bakili’anande, iyate, Ende ala toma ko amela, ende l’asusanyi bana mpuci l’ato ban’owe lacina nai?

¹⁷Koko eneki Yesu ookaka yoi liho, amasumola, ate, Bato bana locili bafalele bonganga: banolela nk’iy’anawa nkangi; emi ntaya oyelela bato bana, mbongi: moya oyelela bato ban’owe.

¹⁸Bakili bana Yoane la Bafalusi bakilaki toma; ko baoya oyufol’ende, iy’ate, Bakili bana Yoane l’ana Bafalusi bakila toma, koko bakili’ane bafakile toma ncina eka nai?

¹⁹Yesu amalokwela, ate, Bifili bina nsongi en’ooli bakolana likilisa nde toma kuma nsongi ayali l’iyo? Eneyakisase nsongi l’iyo bafakilisa toma.

²⁰Koko esike engoya enengi nsongi oumolama eneyal’iyo: bangokila toma nk’en’esik’eho.

²¹Efan’oto onosola etate en’esenda ena ntoto nk’en’esenda enekindaki; yombo ail’oho, esenda enosolamaka eokambola esenda enekindaki, ko bokole bosokwa Dokolo.

²²Koko efan’oto onangola baana ban’atoto ena bikoto bin’alale, lacina baana ban’atoto batoyola bikoto, ko baana batoyutsa, ko bikoto bitoyehyama. Baana ban’atoto bailama ena bikoto bin’itoto.

²³Koko aotianya basala ban’asongu en’ina bona Sabata; enem’iy’oeta meho bakili’anande baomatsa linukola basongu.

²⁴Bafalusi baotenda l’ende, iy’ate, Lenda, iyo bayakambe yoi linalifakolana la boeka bona Sabata lacina nai?

²⁵Amakutwela, ate, Ino botaanda nde yoi linaliki Dawidi okambaka, eneki’nd’oelingitanaka, ko aokaki njala, ende l’iyo banayaaki l’ende?

²⁶Nko bokotua bonoki’nd’otuaka en’otumba bona Yakomba (en’esike eneki Abiatala oyalaka nkanga en’iyome mene), ko alaki mampa ina boeka, inifalama l’ato, yengoko la nkanga kei, ko bokotua bonoki’nd’ofak’iyo banayaaki l’ende?

²⁷Ko amasumola, ate, Bina bona Sabata boilamaki lacin’en’ato, efa bato lacin’ena bin’ona Sabata.

²⁸Lacin’eho, Bon’on’oto ayali Nkolo en’in’ona Sabata nkoho.