Read ngando Malako 3 Bible Online

Malako 3 - ngando bible

Malako 3

¹Koko atuaki lakina ena sunagoga; ko boto’omoi ayaaki meho onoyaaki la likasa lineyonyelala.

²Ko bamotakamela, yombo angikya boto’oho en’in’ona Sabata, lacina baat’etelo lifot’ende likambo.

³Ko aosumola boto onoyaaki la likasa lineyonyelala, ate, Emala ena ntoto.

⁴Ko amaufola, ate, La njila en’olotsi en’in’ona Sabata, la njila en’owe; la mbikya la njaka: ekambwa enekoli la boeka bona Sabata eya? Koko iyo baoyala nko mwi.

⁵Amalenda la nkele, lacin’oka aokaki lokeseli lacin’ena bocilingitano bon’etem’eniyo, ko aosumola boto’oho, ate, Nanola likasa line. Ende aonanola liho, ko likasa linande yoika, ko yoyalama yok’onoki limoi oyalaka.

⁶Koko Bafalusi baofola, ko isasanga iyo la Ba-Elode baocoa ena lokuko, ko bamoangel’eango, bokotua bonong’iy’oyak’ende.

⁷Koko Yesu aumaki, ende l’akili’anande, ko baocoa ena lose; ko bik’ike bon’ato bana Ngalilaya bamokila nko meho; koko bik’ike bon’ato bana Yudea,

⁸l’ana Yelusalema, l’ana Edome, l’an’ili bona Yoladane, ko l’amoi bana Tula la Sidona, enek’iy’ookaka bikambwa biniki’nd’okambaka, baoy’eneyal’ende.

⁹Ko aosumola bakili’anande baonde mbolimboli la boatu bon’osali, lacina bato batokama ekami eneyal’ende.

¹⁰Ende aikyaki bato bike; ko la ncin’eho iyatu banayaaki la nkangi baokama eneyal’ende lacina baosuke.

¹¹Ko bafoi bana nsefo enek’iy’oenak’ende baokwa en’oso’onande, ko baololua, iy’ate, E oyali Bon’ona Yakomba.

¹²Koko amafekya la locili mene, bateeyanyake l’ato.

¹³Ko ailela ena lingonji, ko aelela eneyal’ende banaki’nd’olangaka, ko baocoa eneyal’ende.

¹⁴Ko aosona jo l’afe, lacina bayale l’ende, ko lacina atome bacu osekodya bosimo,

¹⁵ko baate locili lacina bafodya bademona.

¹⁶Bane jo l’afe nko Simona, onoki’nd’ofaka lina lika Petelo;

¹⁷ko Yakobo bon’ona Zebedayo, la Yoane onotwaki l’ende; amaf’iy’afe lina lika Boanelenge, nko Ban’ana Likungola;

¹⁸ko la Andelo, la Filipo, la Balutolomayo, la Matayo, la Toma, la Yakobo bon’ona Alafayo, la Tadayo, la Simona Zelote,

¹⁹la Yudasa ona Keliota onoangelaki. Ko baoya en’otumba.

²⁰Ko bik’ike bon’ato baosolongana lakina, ko lacin’eho, bataata nko l’elelo ena toma.

²¹Eneki bifili binande ookaka, baoya oyounda, lacin’oka baila, iy’ate, Aolowa.

²²Ko batengi’aho ban’ekanda banayaki ena Yelusalema baila, iy’ate, Ayali la Balazebuba, ko ayafodya bademona nko la locili lona lifoka lina bademona.

²³Koko amaelela eneyal’ende, ko amasumola l’asai, ate, Satana afodyisa Satana bosamb’oya?

²⁴Ko yombo lifoka yokambwana liho mene, lifoka liho lifalingalinga likwa;

²⁵ko yombo bomboi bokambwana boho mene, bomboi’oho bofalingalinga lisila.

²⁶Yombo Satana aokan’ita l’endamene, endamene amoyokambola, ko afalingalinga likwa: aosila nkwaho.

²⁷Efan’oto onoyokela en’otumba bon’oto’ona locili oyehya toma tonande, yengoko akakela boto’ona locili en’oso; amokakela, ko ena mbusa aehya toma tonande.

²⁸Solosolo lakosumol’ino, bato bangikyama en’aoyi’owe bahatu, ko l’ena besao benasaiy’iyo;

²⁹ohonde onongosaiya Bolimo’on’olotsi afatungwaki ena yoi liho bisike bihitu: ayali nk’en’ekoiyelo ena likambo bisike bihitu.

³⁰Atendaki baoyi’ane lacin’enek’iy’oilaka, iy’ate, Ayali la lifoi lina nsefo.

³¹Ko nyango enande l’akune’anande baoya; baemala en’anza, ko bamotomela yoi, bameelela.

³²Ko bik’ike bon’ato bamosambanya, nko nkisase, ko bamosumola, iy’ate, Lenda, nyango ene l’akune’ane bayali en’anza, bayakofon’e.

³³Ende amakutwela, ate, Onoyali boyango’onami oka nai? ko bakune’anami baka nai?

³⁴Ko eneki’nd’olendaka baho banosambanyaki, aila, ate, Lenda, boyango’onami l’akune’anami bah’ane.

³⁵Boto l’oto onongila baoyi banalanga Yakomba, ende ayali bakune’onami, la mbangela enami, l’oyango’onami.