Read ngando Malako 4 Bible Online

Malako 4 - ngando bible

Malako 4

¹Ko amatsaki lilak’ato lakina en’oseleka bona lose; ko bik’ike bon’ato baosusana eneyal’ende; ko la ncina eho aoyokela en’atu, ko aokisase nko meho ena lose, ko bato bahatu bayaaki en’okili en’oseleka bona lose.

²Ko amalaka baoyi bike nko l’asai; ko amasumola ena lilako linande, ate,

³Bolofaka; noka, bofusi aocoa oyofusa beona;

⁴ko enem’end’ofusaka, beona bemoi beokwa nk’ena mboka, ko mpulu ina liko yoya ko yotona beho.

⁵Ko bemoi beokwa en’edye ena baufe, ko betaata bekongo bike meho; isasanga beho beomela, lacina enetaata beho bekongo bena nginda;

⁶koko eneki bina oalaka, beho beonyelala, ko beofanga, lacina enetaata beho beluo.

⁷Ko bemoi beokwa ena ntoto ena beenge; ko beenge beomela, ko beoyaka beona la nkaka, ko betoota bemamo.

⁸Ko bemoi beokwa en’ekongo bena lilemwa, ko beota bemamo; beomela ko beofula, ko beota bemoi ntuk’isaso isaso, bemoi ntuk’otoa ntuk’otoa, ko bemoi bokam’okama.

⁹Ko amasumola, ate, Onoyali l’atoi lacina aoke, aongya lilofa.

¹⁰Ko eneki’nd’oyalaka nk’ende kei, iy’anosambanyaki l’akili jo l’afe bamoufola ncina ena basai baho.

¹¹Ko amasumola, ate, Bofisafisa bona lifoka lina Yakomba bomokofam’ino; ohonde eneyal’iyo banayali en’anza baoyi bahatu bailama nko l’asai;

¹²lacina Balendeela nko ndenda, ko bafene; Balofamela nko ndofamela, ko bafanonganya ncina; Batongokengwa, ko batongoyikyama en’aoyi’owe’aniyo.

¹³Koko amalokwela, ate, Botanonganya nde lisai line? Bongononganya basai bahatu bosamb’oya?

¹⁴Bofusi aofusa yoi.

¹⁵Bane nk’iyo banayali ena mboka enafusama yoi; koko enem’iy’ookaka, Satana aoya isasanga oyakumol’iyo yoi linalifusi en’etem’eniyo.

¹⁶Nk’osamb’oho, banafusama en’edye ena baufe bah’ane: en’ok’iyo yoi, isasanga batamba liho l’ekiko;

¹⁷koko bafana boluo eneyal’iyoamene, ko bafalingalinga bike; koko ena mbusa, enaya bino la binyomelo lacin’ena yoi, isasanga baokumba.

¹⁸Ban’amoi baofusama ena ntoto ena beenge. Baho nk’iy’anoka yoi,

¹⁹ko bekandokando ben’akambo bana loko lone, la losinganya lona lituka, la mposa ina baoyi’akina, baotua, ko baehya yoi la nkaka, ko lifote bemamo.

²⁰Koko ban’amoi banafusama en’ekongo bena lilemwa nk’iy’anoka yoi, ko batamba liho, ko baot’emamo, omoi yoka ntuk’isaso ntuk’isaso, omoi ntuk’otoa ntuk’otoa, ko omoi bokam’okama.

²¹Ko amalokwela, ate, Noka, boto aoya nde la moinda lacina amony’eho en’ase’a litungu? yombo en’ase’a ntange? Efa nde lacina amony’eho en’ilelo ena moinda?

²²Efana yoi linalifisi linalifafiswaki linga; ko efana yoi lin’ofisafisa linalifenyaki fololo linga.

²³Yomb’oto ayali l’atoi lacina aoke, aongya lilofa.

²⁴Ko amasumola, ate, Boongya lisisola baoyi ban’ok’ino. Lelelo lonakody’ino longokodyama eneyal’ino lakina, ko bangokofuedy’ino loho.

²⁵Bamoi bangofam’ende onata; koko bangokumol’ende onofaate nko baho banat’ende.

²⁶Koko ailaki, ate, Lifoka lina Yakomba liyali yoka boto onofusa beona en’ekongo;

²⁷kang’aetama, kang’aetwa, l’oco l’ane, beona beomela, ko beofula, kang’endamene afanonganya bokotua bonamela beho.

²⁸Loko mene loot’emamo: En’oso nko lokase, ena mbusa nko bayeye, ko ena mbusa nko bemamo ena bayeye.

²⁹Koko enatunda bemamo, isasanga aotoma bongwangwa meho, lacina esike en’enukwelo emoyela.

³⁰Koko ailaki, ate, Tongokolanya lifoka lina Yakomba la nai? ekolanya enakolana la liho eka nai?

³¹Liyali yoka boona bona sinapi: enafusama boho ena loko, boho boyali nko iyonona inileki beona behetu beneyali ena loko l’isalisali;

³²koko enafusam’oho, boho bomela, ko boleki ndunda ihatu l’okolo, ko bomela bitange bin’okolo; ko mpulu ina liko yoya oyotonga ena ncici ena sinapi eho.

³³Ko amasumola yoi nko l’asai bike ban’okotu’oho, nko lilako linakolana l’iyo lacina baoke.

³⁴Amalaka l’asai kei; koko aosakitwela bakili’anande baoyi bahatu, nk’ende l’iyo kei.

³⁵Nko bin’oho, eneki likolo oyelaka, amasumola, ate, Toleke lose.

³⁶Enek’iy’otongolaka bato’aho bik’ike, bamotola nk’en’atu bonoki’nd’oyalaka. Ko biatu bimoi biyaaki l’ende nkoho.

³⁷Ko ngembe ena nkolo mene eokumba, ko bafukumo ban’akolo baofoma boatu, ko boho bomatsa lilola l’asi.

³⁸Endamene ayaaki en’otungu bon’atu, ayetame en’iyonga; ko bameetola, bamosumola, iy’ate, Bolaki, toyawu: ofoke nde lokeseli?

³⁹Koko enem’end’oetwa, aofekya lofongo, ko aosumola lose, ate, Ambya, yala mwi. Lofongo losilaki nkaho, ko lose loyala nko mwi mene.

⁴⁰Ko amaufola, ate, Ino boanga lanai? Bofan’imeedyo lacina nai?

⁴¹Ko baoka losomo mene, ko baufolana, Mbo boto’one and’oya? Le lofongo le lose baimedya nk’ende.