Read ngando Malako 5 Bible Online

Malako 5 - ngando bible

Malako 5

¹Koko baoyela en’ili bona Lose, en’onyanga bona Ba-Ngandala.

²Eneki’nd’otefwaka en’atu, isasanga boto onoyaaki la lifoi lina nsefo aoya ena nketa oyukana l’ende.

³Aataki litonga linande nk’en’edye ena nketa, ko efan’oto oninya litungyis’ende, efana nko l’enyolo bena locili mene;

⁴lacin’oka baokakelaki’ale la bifoke ko l’enyolo bekakela bike, koko akesaki benyolo pa, ko aolaki bifoke nko mbola, ko efan’oninyaki licicimody’ende tu.

⁵Koko bina l’ina, l’ane l’oco, ayaaki en’angonji l’ena nketa, ayalolua ko ayokot’endamene l’aufe.

⁶Koko eneki’nd’oenaka Yesu en’osana, aocoa la laango, ko amoosamela,

⁷ko aololua la lofoso lona lokolo, ate, Emi l’e, Bon’ona Yakomba Eneleki nko Ndeka, tond’oya? Lakoonda ena lina lina Yakomba tanjenyake bino!

⁸Lacin’oka Yesu aosumolaki, ate, E lifoi lina nsefo, fola eneyali boto’one.

⁹Ko amoufola, ate, Lina line lika nai? Amokutwela, ate, Lina linami lika Bik’ike, lacin’iso tond’ike.

¹⁰Ko amoonda mbonda mene ataumolake en’onyang’oho.

¹¹Botonga bona nsombo bon’okolo mene boyaaki meho ena lingonji, iyale toma.

¹²Ko bademona bahatu bameelela mbila, Mbo ototome eneyali nsombo, tatua eneyal’iyo.

¹³Koko Yesu amafa etelo; ko enek’iy’ofolaka, bafoi bana nsefo baotua eneyali nsombo, ko botonga bokilimwa ena lingonji la mbango, ko bokwela lose; nsombo iyaaki yombo nkoto ife, ko yowa ena lose.

¹⁴Ko iy’analeyaki nsombo toma baolota, ko baosekodya yoi liho en’ongili ko l’en’onyang’oniyo bohotu. Ko baoya oyena yoi linilamaki.

¹⁵Ko baoy’eneyali Yesu, ko baena boto onoyaaki l’ademona bike, ayakisase, ayalote bisenda, ko lokanyi lonande lomonongana nk’olotsi; ko iyo baoka losomo.

¹⁶Ko iy’anenaki ekambwa enekambamaki bamasumola bokotua bonoki yoi oilamaka eneyali boto onoyaaki l’ademona bike, ko la yoi lina nsombo nkoho.

¹⁷Ko baomatsa yond’ende lacina aume en’onyang’oniyo.

¹⁸Ko enem’end’otalama en’atu, boto onoyaaki l’ademona amoonda lacina ayale nko l’ende.

¹⁹Koko Yesu atimedya yoi liho: amosumola, ate, Omboco’ola eneyali bato baneamene, asumole ekambwa ena nkolo mene eneki Nkolo okokambelak’e, ko l’isei iniki’nd’okookamelaka.

²⁰Ko ende aocoa, aomatsa lisekodya ena Dekapoli ekambwa ena nkolo mene eneki Yesu okambelak’ende. Ko bato bahatu baofefa nko mpefa.

²¹Eneki Yesu olekaka lakina en’atu bili’ol’ei, bato bike baosolongana eneyal’ende; ayaaki nk’en’oseleka bona lose.

²²Ko lenda, chef emoi ena sunagoga, lina linande lika Yailo, aoya; ko eneki’nd’oenaka Yesu, aokwa en’akak’anande,

²³ko amoonda nko mbonda mene, ate, Bon’onami on’oyoto on’isisali aolama l’ewedi; lakoonda, yak’oyotadya bakas’ane eneyal’ende oyiky’ende, ko angika.

²⁴Yesu aocoa l’ende. Ko bik’ike bon ato bamokila, ko baokama eneyal’ende.

²⁵Ko boyoto’omoi onoyaaki la nkangi, bakil’anande baetaki mbula jo l’ife kali,

²⁶ko aenaki bino mene la mpanji bike, ko akafaki toma tonande tohatotu, koko nkangi enande etasila: eosokwa nde nko nsokwa;

²⁷eneki boyoto’oko ookaka lokumo lona Yesu, aambana la bik’ike bon’ato ena mbusa enande, ko aosuka bokoto’onande.

²⁸Lacin’oka ailaki, ate, Yombo lasuka bekoto benande kei, tumbe nongika.

²⁹Isasanga etelo en’akil’anande eosila, ko aeyaki ena yonge linande ate amolika ena nkangi enande.

³⁰Ko isasanga Yesu aofokola en’otem’onande mpamba emofola eneyali ende, ko aohalingwa ena ntoto en’ato’aho bik’ike, ko aufola, ate, Ononsukaka bekoto’enami oka nai

³¹Koko bakili’anande bamosumola, iy’ate, Oena bato bik’ike bacindana l’e, ko oit’oufola nde ate, Ononsukaka?

³²Koko ende aolengalenga oyena boto onilak’oho.

³³Koko boyoto aoka losomo, ko ailima, lacin’oka aeyaki ekambwa enilamaki eneyal’ende, ko aoya, aokwa en’oso’onande, ko amosumola yoi lihalitu fololo.

³⁴Ko Yesu amosumola, ate, Bona, imeedyo ine imokiikya; ombocoa la mwi, ikaka ena nkangi ene.

³⁵Nk’enem’end’otenda, bato’amoi baoya en’otumba bona chef ena sunagoga, baila, iy’ate, Bon’one on’oyoto amowa; osengenya Bolaki lakina lacina nai?

³⁶Koko eneki Yesu ookaka yoi linalik’iy’otendaka, aosumola chef ena sunagoga, ate, Taangake; yala nko l’imeedyo.

³⁷Koko atimedya bato’amoi baokile, yengoko Petelo, la Yakobo, la Yoane onotwa l’ende, nk’iyo kei.

³⁸Ko baoyela en’otumba bona chef ena sunagoga; ko aosungya etomoko mene meho, bato bike banayalele ko bayafome befwi.

³⁹Eneki’nd’otuaka, amasumola, ate, Ino botom’etomoko, ko bolela, lacina nai? Bonome atawu: aotota nk’ilo.

⁴⁰Ko iyo bamoseka nko tolo. Koko eneki’nd’afodyaka, iyatu, aotamb’afango la nyango en’onome, ko l’iy’anayaaki l’ende, ko aotua en’etenyi en’eci bonome.

⁴¹Ko aosuka bonome ena likasa, ko amosumola, ate, Talita kumi, yoi linaliyali yoka, Bonome on’oyoto, lakosumola, Etwa.

⁴²Ko isasanga bonome on’oyoto aemala, ko aokenda. (Mbula inande yokwa jo life.) Ko baofefa nko mpefa mene.

⁴³Ko amafekya la locili mene, yoi line liteyanake l’oto’omoko; ko amasumola bayofe toma tona ndaka.