Read ngando Malako 6 Bible Online

Malako 6 - ngando bible

Malako 6

¹Yesu aumaki meho, ko aoya en’onyang’onandamene; ko bakili’anande bamokila.

²Ko eneki bina bona Sabata oyelaka, aomatsa lilak’ato ena sunagoga; ko bike bon’ato banomookaka baofefa, Mbo boto’one aata baoyi’ane meya? ko bomwu bone bonofam’ende boka nai? ko bikambwa bine bina mpefa bineyakambame l’akas’anande biyali’oya?

³One afayali nde charpentier, bon’ona Malia, ko botoolo bona Yakobo, la Yose, la Yuda, la Simona? Ko bambangela banande bafayali nde mendo enek’iso? Ko baolemwa lacin’enande.

⁴Koko Yesu amalokwela, ate, Bosumoli afinde lokumo, yengoko en’onyang’onandamene ko l’eneyali bais’ola banandamene ko l’omboi’onandamene.

⁵Ko ende atakambisa ekambwa ena nkolo meho, yengoko ntadya ena bakas’anande eneyali boto’omok’omoko onokaki nkangi, ko amaikya.

⁶Ko aofefa lacina enetaat’iyo imeedyo. Ko aoselasela bili l’ili en’enyanga, ayalake bato.

⁷Ko aelela ba-jo l’afe eneyal’ende, ko aomatsa

⁸yatoma bafe’afe; ko amafa lifoka eneyali bafoi bana nsefo. Ko amasumola batatolake toma ton’okita, yengoko bonganza kei—efana mampa, efana ntombe, efana francs en’okoli;

⁹balote nko tombwaku kei, ko batatolake bekoto befe.

¹⁰Ko amasumola, ate, En’okala bon’etaketaka bonotua ino en’otumba, boyala nko meho yengoko eneng’in’ouma en’okal’oho.

¹¹Nk’en’oka bato’amoi bafakosangel’ino ko bafakolof’ino, eneng’in’ouma meho botitola mpucifuci iniyali en’ase ban’akak’anino yoka ndembi eneyal’iyo.

¹²Ko iyo baocoa, ko baolak’ato lacina baumbele baoyi’owe’aniyo.

¹³Ko baofodya bademona bike, ko baohinya bike bon’ato banawaki nkangi la bauta, ko bamaikya.

¹⁴Koko Elode, lifoka lina roi, aoka baoyi’ane, lacin’oka lina lina Yesu likumyamaki bike; ko aila, ate, Yoane Bini amoletwa enek’anawaki, koko ncina eneyakambame bikambwa bine bina mpefa eneyal’ende nd’eho.

¹⁵Bamoi, Mbo and’Eliya; ko bakina, And’osumoli yok’omoi ona basumoli.

¹⁶Koko eneki Elode ookaka, aila, ate, One nko Yoane onoki’m’okesak’ote, amoletwa enek’anawaki.

¹⁷Lacin’oka Elode mene atomaki’ale ko aundaki Yoane, ko aotungyaki en’otumba bon’enyolo, lacin’ena Elodia booli’ona bakune’onande Filipo, lacina Elode aosongaki yoka booli’onande.

¹⁸Lacina Yoane asumolaki Elode, ate, Nk’otamba booli’ona bakune’one, osondola boeka.

¹⁹Lacin’eho, Elodia aokaki Yoane bowe, ko alangaki aoyake; koko atinya,

²⁰lacina Elode aangaki Yoane, aeyaki’oka ayaaki boto’ona mbongi l’ona solosolo. Aotombanyaki bolotsi, ko eneki’nd’ookaka baoyi’anande akandakandaki bike, ko aolofaki l’ekiko.

²¹Ko eneki esike enakolana oyelaka, nko bina bonoki Elode ofumbak’elambedya yoka mbofodya en’eotwelo enande, aelelaki bingambe binande, ko la capitaines ko la bato ban’oso bona Ngalilaya en’elambedya eho.

²²Ko bon’ona Elodia bon’oyoto aotua, ko aina boina, ko aatela Elode l’iy’anakisak’ase l’ende ekiko; ko lifoka lina roi aosumola boyoto’oho on’onome, ate, Onjufole iyema in’etaketaka inalang’e, ko nongokofa.

²³Ko amoteela lisangya, ate, Iyema in’etaketaka inanjufol’e, nongokofa, kang’iho iyali etenyi ena lifoka linami.

²⁴Ko aofola, ko aufola nyango enande, ate, Iyema iningi’m’oufola ika nai? Nyango ate, Bote’ona Yoane Bini.

²⁵Isasanga aotua la mbango eneyali lifoka lina roi, ko amolomba, ate, Lalanga ompe bote bona Yoane Bini ena lokongo isasanga.

²⁶Koko lifoka lina roi aoka lokeseli mene; ohonde lacin’ena lisangya ko lacin’eniyo banakisak’ase l’ende ena mesa, atalanga lifim’ende yoi liho;

²⁷ko isasanga lifoka lina roi aotoma soldat ona boloi bon’atombanyi, ayi l’ote’onande.

²⁸Ko soldat aocoa, ko aokesa bote bona Yoane en’otumba bon’enyolo, ko aoya l’ote’onande ena lokongo, ko aofa boyoto’oho bon’onome, ko ende aofa nyango enande.

²⁹Eneki bakili bana Yoane ookaka yoi liho, baoya, ko baambola boduo’onande, ko baomonya ena nketa.

³⁰Ko bikima baosolongana lakina eneyali Yesu, ko bamolokwela baoyi banak’iy’okambaka bahatu, ko l’aoyi bahatu banak’iy’olakaka.

³¹Ko amasumola, ate, Boyaka nk’ino kei en’okala bona sengelenge, ko bofomya isisali meho. (Ailaki’oho lacin’oka bato bike bayayi ko bayacu, ko bataata nko le elelo ena toma.)

³²Ko baocoa la boatu, nk’iyo kei, en’okala bona sengelenge.

³³Ko enem’iy’ocoa, bato bike bamaena, ko bike bamaeya; ko bato ban’engili beho behetu baocoa la mbango la mboka en’okili, ko baoyela meho en’oso’oniyo, ko baosolongana eneyal’ende.

³⁴Eneki Yesu otefwaka, aena bik’ike bon’ato, ko amaokamela isei, lacin’iyo bayaaki yoka mpate inifan’otombanyi, ko aomatsa yalak’iyo baoyi bike.

³⁵Eneki bina omatsaka yila, bakili anande baoy’eneyal’ende, baila, iy’ate, Edye ene nko sengelenge, ko bin’omila;

³⁶oatongole, bacu ena biluku l’en’engili ben’oli, bayosombel’iyoamene toma tonatong’iy’ola.

³⁷Ko amakutwela, ate, Inoamene baf’iyo toma lacina bale. Ko bamoufola, iy’ate, Tocoake toyosombe mampa la mpata bekam’efe lacina taf’iyo, bale?

³⁸Amaufola, ate, Boyali la mampa inga? Bocoaka, boyengya. Ko enek’iy’oeyaka, bamosumola, Mampa itano la nse ife.

³⁹Ko amatoma, basumole bato bahatu bakisase ena tolenge, beloi l’eloi.

⁴⁰Ko baokisase en’endongo, bendongo bemoi bokam’o kama, bendong’emoi ntuk’itano ntuk’itano.

⁴¹Ko eneki’nd’otambaka mampa ih’itano ko la nse ih’ife, aolenda ena loola, ko aosak’osako, ko aokesa mampa, ko aofa bakili lacin’iyo balekedy’ato; ko aokafel’iyatu nse ih’ife.

⁴²Ko iyatu baola, ko baokinda liota.

⁴³Ko baambola bitate binocikalaka nko batungu jo l’afe to, ko la bitate bina nse nkoho.

⁴⁴Ko iy’analaki mampa bayaaki mpame nkoto itano.

⁴⁵Isasanga aosomya bakili’anande bayookele en’atu, ko baleke lose en’oso en’ili’ol’ei, nk’ena Betesaida, kum’endamene ayatongole bato.

⁴⁶Ko eneki’nd’asesaka, aocoa ena lingonji oyoonda boondo.

⁴⁷Ko eneki likolo oyelaka, boatu boyaaki ena ntoto ena lose, ko ende en’okili nk’ende kei.

⁴⁸Ko amaena kuma bayaene bino ena likambo lina nduka, lacin’oka lofongo lomafekya; koko enakel’ina aoya eneyal’iyo, ayakende ena liko y’asi bana lose; ko asokolekany’iyo.

⁴⁹Ko enek’iy’oenak’ende ayakende ena liko y’asi, baokanel’oka bamen’esiko, ko baololua la losomo;

⁵⁰lacin’oka iyatu bameena, ko baoka losomo mene. Ko isasanga oatenda l’iyo, ate, Bitedyaka, one nk’emi, botaangake!

⁵¹Ko aotalama en’atu l’iyo, ko lofongo losila nkwaho; ko iyo baofefa en’etem’eniyo nko mpefa, ko baokandakanda,

⁵²lacin’oka iyo batanonganya ekambwa enekambamaki la mampa, lacina eneki betem’eniyo ocilingitanaka.

⁵³Enek’iy’olekaka en’ili’ol’ei, baoyela bonyanga bona Ngenesaleta, ko baosema meho.

⁵⁴Ko enek’iy’otefwaka en’atu, isasanga bato bameeya;

⁵⁵ko baoselasela la mbango en’onyang’oho bohotu, ko baomatsa litola bato banayaaki la nkangi ena ntange bili l’ili benek’iy’ookaka Yesu ayali.

⁵⁶Ko bekala behetu beneki’nd’ocoaka, l’en’engili, l’en’enyanga, l’en’asala, baambya bato ban’aise nkangi en’eseleka bena mboka, ko bamoonda lacina basuke nk’oseleka kei bon’okoto’onande; ko iyatu banosukaki baikaki.