Read ngando Malako 7 Bible Online

Malako 7 - ngando bible

Malako 7

¹Ko Bafalusi l’atengi’amoi ban’ekanda banayaki ena Yelusalema, baosolongana eneyal’ende.

²Ko baena bamoi ban’akili’anande bayale toma l’akasa bana mbindo, nk’akasa banatasongama.

³Lacina Bafalusi la Ba-Yuda bahatu bayakile baoyi banaki bankya olangaka; ko kali bafale toma kuma batasonga bakasa nko nsonga bike;

⁴ko enay’iyo ena limbongo, bafale toma kuma batok’asi. Ko baoyi’amoi bayali bike banak’iy’otambaka lacina bamonya: nko nsonga ena bikala, la mpoke, la basaswa bana efeko, la totunda.

⁵Ko Bafalusi l’atengi bamoufola, iy’ate, Bakili’ane bafamonya baoyi banaki bankya olangaka lacina nai? Bala toma l’akasa bana mbindo lacina nai?

⁶Ende amakutwela, ate, Yesaya atendaki baoyi lacin’enino nko cilili, ino besimo, yok’onoki’nd’otengaka, Bato’ane bampik’emi la nkefu iniyo, Koko betem’eniyo bend’osana l’emi.

⁷Koko bankumy’emi nko bototoloto, Eneyalak’iyo balako banayali nko beeka ben’ato.

⁸Ino bomocika boeka bona Yakomba, ko boyaundamele nko beeka ben’ato.

⁹Ko amasumola, ate, Solosolo mene, ino bumbela boeka bona Yakomba lacin’eho bokile beeka beninoamene.

¹⁰Mose ailaki, ate, Kumya bafango’one la nyango ene; ko ende onosaiya bafango yombo nyango, akoli lacina awu.

¹¹Koko ino bila, in’ate, Yomb’oto asumola bafango’onande yombo nyango enande, ate, Boho bonosokokolana lacina nkokambya l’oho boyali kolubana—nko nganji enemonyedyama Yakomba—

¹²bofofe etelo lakina oyokambya bafango’onande la nyango enande l’oho.

¹³Yok’oho ino behya yoi lina Yakomba lacin’ena baoyi banak’inoamene oekyaka beeka. Ko boyakambe baoyi’amoi bike ban’okotu’oho.

¹⁴Eneki’nd’oelelaka bik’ike Uon’ato eneyal’ende, amasumola, ate, Inatu bondofe, ko bononganyaka ncina:

¹⁵efana iyema iniyali ena mbiolo en’oto yehya boto yomb’iho yotua ena ntundulu enande: banehya boto nko baoyi’aho banafola eneyali boto.

¹⁶Yomb’oto ayali la batoi lacina aoke, aongya lilofa.

¹⁷Ko eneki’nd’ocikaka bato’aho bik’ike, ko aotua en’otumba, bakili’anande bamufola ncina en’ekolanya eho.

¹⁸Ko ende amalokwela, ate, Ino nkoho bofana nde nnonganya? Botafokola nde, toma tonatoyali ena mbiolo en’oto, enatua toho ena ntundulu en’oto tofehyis’ende;

¹⁹lacin’oka toho tofatua en’olimo’onande: totua nk’ena likunju, ko tofola nk’ena lifoku. La baoyi’aho aokodya toma tohatotu nko soto.

²⁰Koko aila, ate, Baoyi banafola eneyali boto, banehya boto nd’aho.

²¹Baoyi banafola eneyali boto, banafola nk’en’otem’onande, nko nkanyi in’owe, la bakele, la basamba, la njaka en’ato,

²²la baiya, la mposa bike en’osolo, la bewe, la totungya, la mposa in’owe ina yonge, la liso lina ekuku, la besao, la njofefa, la baoyi ban’ilemeleme:

²³baoyi’ane ban’owe bahatu baofola nk’ena ntundulu, ko baehya boto.

²⁴Ko Yesu aemwa meho, ko aocoa en’onyanga bona Tula la Sidona. Ko aotua en’otumba, ko atalang’oka boto’omoko aeye; ohonde atafisamisa.

²⁵Lacina boyoto’omoi onoyaaki la bon’on’oyoto on’osali onoyaaki la lifoi lina nsefo, aoka bosimo’onande, ko aoya, ko aokwa en’akak’anande.

²⁶Boyoto’oho ayaaki bise Elene, bise Sulia Foinike. Ko amoonda lacina afodya demona eneyali bon’onande bon’oyoto.

²⁷Ko Yesu amosumola, ate, Akoli lacina bana bakinde en’oso: efaonge otamba mampa ena bana oyofusela mbwa.

²⁸Ko amokutwela, ate, Solosolo, Nkolo; koko mbwa iniyali en’ase’a mesa iola mpumbwu ina bana.

²⁹Ko amosumola, ate, Lacin’ena yoi liko, ombocoa; demona emofola eneyali bon’one on’oyoto.

³⁰Ko eneki’nd’outwak’ola, aosungya bona aeci ena ntange, ko demona emofola eneyal’ende.

³¹Ko lakina, eneki’nd’oumaka en’onyanga bona Tula, aotianya bonyanga bona Sidona, ko l onyanga bona Dekapoli, ko aoya ena lose lona Ngalilaya.

³²Ko bamoyela boto onitaki’atoi ko ayaaki la likokoma; ko bamoonda lacina atadya likasa linande eneyali ende.

³³Ko Yesu amoumola eneyali bato bik’ike, amotola nk’ena lokuko, aila to tonande en’atoi’anande, ko auta nsoi, ko aosuka lolemi lonande.

³⁴Koko enem’end’olenda ena loola, aotatana, ko amosumola, ate, Efata, nko Kombwaka.

³⁵Ko isasanga batoi’anande baokombwa, ko lolemi lonande lotungwa, ko aotenda nko cilili mene.

³⁶Ko amasumola, batasumolake boto’omoko; ohonde eneyafudy’ende yafekyaka, iyo baofudya likumya yoi liho nkumya mene.

³⁷Ko baofefa nko mpefa bike mene, ko baila, iy’ate, Amokamba bikambwa bihitu nk’olotsi; aokya banitaki’atoi, ko aotenza bato ban’okukuluku.