Read ngando Malako 8 Bible Online

Malako 8 - ngando bible

Malako 8

¹En’ina beho, eneki esolonganelo en’ato ofulaka bik’ike lakina, ko bataata toma tona ndaka, Yesu aelela bakili’anande eneyal’ende, ko amasumola, ate,

²Lokamela bato’ane bik’ike isei, lacin’iyo bamoyala l’emi bin’esaso esik’ene, ko bafana toma tona ndaka;

³ko yombo njatom’iyo en’ela la njala tumbe bangotenya ena mboka, lacina bamoi’aniyo bamoya en’osana.

⁴Ko bakili’anande bamokutwela, iy’ate, Mendo ena sengelenge boto angata mampa iningokolana likinza bato’ane meya?

⁵Ko ende amaufola, ate, Boyali la mampa inga? Iy’ate, Nsambo.

⁶Ko aosumola bato’aho bik’ike bakisase ena loko. Ko aotamba mampa iho nsambo, ko eneki’nd’okangaka lokango, aokes’iho, ko aofa bakili’anande lacin’iyo balekedy’ato’aho bik’ike.

⁷Ko bayaaki la tosese tonatotaata bike; ko eneki’nd’okangaka lokango, aolekedya bato toho nkoho.

⁸Ko iyo balaki, ko baokinda liota, ko baambola bitate binicikalaki tofondo nsambo.

⁹Ko iyo banalaki bayaaki yombo nkoto inei; ko amatongola.

¹⁰Ko isasanga aotalama en’atu, ende l’akili’anande, ko aoya ena bonyanga bona Dalamanuta.

¹¹Ko Bafalusi baoya meho, ko baomatsa yats’ende ntango, bayakembe ndembi ena loola eneyal’ende, baomek’ende.

¹²Ko ende aotata en’otem’onande, ko aila, ate, Eotwelo ene eofona ndembi lacina nai? Lakosumol’ino, solosolo, efana ndembi enengofama eotwelo ene.

¹³Ko amacika, ko aotalama lakina en’atu, ko aoleka en’ili bona lose.

¹⁴Ko bakili baolefela litola mampa: bayaaki la mampa nk’emoko kei en’atu.

¹⁵Ko amasumola, ate, Boongya lilota nyango ena mampa ena Bafalusi, la nyango ena mampa ena Elode.

¹⁶Ko iyo baufolana, ko baila, Mbo yoi line nk’enefan’iso mampa.

¹⁷Ko eneki Yesu ofokolaka yoi liniyo, amasumola, ate, Ino bufolana, enefan’ino mampa, lacina nai? ino botanonganya ko botafokole nde? betem’enino bemocilingitana nde bocilingitano?

¹⁸Boyali l’aiso, koko bofene nde? boyali l’atoi, koko bofoke nde? ko bofakanedya ndo?

¹⁹Eneki’m’okeselaka bato nkoto itano mampa itano, ino bambolaki bitate binicikalaki batungu banga? Iy’ate, Jo l’afe.

²⁰Ko eneki’m’okeselaka bato nkoto inei mampa nsambo, bambolaki bitate binicikalaki tofondo tonga? Iy’ate, Nsambo.

²¹Koko amasumola, ate, Botanonganya nde?

²²Ko aoya ena Betesaida; ko baoya eneyal’ende l’oto onodyak’aiso, ko bamoonda lacina aosuke.

²³Ko aosuka boto onodyak’aiso la likasa, ko amotola ena mbiolo en’onyanga; ko eneki’nd’outaka nsoi en’aiso’anande, aotadya bakasa eneyal’ende, ko amufola yombo aen’iyema.

²⁴Ko ende, eneki’nd’oenolak’aiso, aila, ate, Lena bato, koko lomaena yoka bete, bayakende.

²⁵Koko aotadya bakasa lakina en’aiso’anande, ko eneki boto olendaka ta, aikyama, ko aena toma tohatotu nko fololo.

²⁶Ko Yesu amotoma en’ol’onande, ko amosumola, ate, Tatuake en’ecimo ene, ko tasumolake boto en’ecimo ene.

²⁷Ko Yesu la bakili’anande baocoa en’enyanga bena Kaisalia ena Filipo; ko enem’iy’ocoa ena mboka, aufola bakili’anande ate, Bato bantang’emi nai?

²⁸Iyo baamba, iy’ate, Yoane Bini; ko bamoi, Mbo Eliya; ko bamoi, Mbo bosumoli’omoi.

²⁹Koko amasumola, ate, Nd’inoamene, bontang’emi nai? Ko Petelo amokutwela, ate, E oyali Masiya.

³⁰Ko amafekya, batasumolake boto’omoko yoi liho.

³¹Ko aomatsa yalak’iyo, ate akoli eneyali Bon’on’oto aene bino la baoyi bike, ko atembolame la bingambe ko la nkanga ina toome ko l’atengi ban’ekanda, ko ayakame, ko aetwa en’ewedi en’ina bon’esaso.

³²Ko aotenda yoi liho nk’ena fololo. Ko Petelo amotola ena lokuko, ko aomatsa lifel’ende.

³³Koko eneki’nd’ohelengwaka, ko aena bakili’anande, aofela Petelo, ate Eta ena mbusa enami, Satana; lacin’oka ofakanedya baoyi bana Yakomba: okanedya nko baoyi ban’ato.

³⁴Ko eneki’nd’oelelaka bik’ike bon’ato ko l’akili’anande eneyal’ende, amasumola, ate, Yomb’oto alanga ankile, ayofimake endamene, ko aambolake ekulusu enande, ko ankile.

³⁵Lacina boto onolanga amonya liiko lonande, angungya loho; ko boto l’oto onungya liiko lonande lacin’enami ko lacin’ena bosimo bon’olotsi, angomonya loho.

³⁶Nko boto akitanya lituka lina loko lohalotu, ko ayoungy’endamene, nkita enat’ende eka nai?

³⁷Ko boto akolana yenganya liiko lonande l’iyema ika nai?

³⁸Lacina boto l’oto ononjok’emi la baoyi’anami nsoi en’eotwelo ene ena likele l’en’owe, Bon’on’oto angok’ende nsoi nkoho, enengi’nd’oya en’okonde bon’afango’onande, ende la bikima bina loola bin’oeka.