Read ngando Malako 9 Bible Online

Malako 9 - ngando bible

Malako 9

¹Ko Yesu amasumola, ate, Solosolo lakosumol’ino, bamoi’aniyo banemali mendo bafenaki bewedi, yengoko kuma baena lifoka lina Yakomba yoya la mpamba.

²Eneki bekolo botoa osilaka, Yesu aotamba Petelo la Yakobo la Yoane, ko amatola ena lingonji lina litale nk’iyo kei, ena lokuko, ko aohalingwa bokotu’okina en’oso’oniyo.

³Ko bisenda binande biololoma telele mene, efan’oto ena loko onokambisa telele yok’oho.

⁴Ko Eliya la Mose baenya eneyal’iyo; ko baesola la Yesu.

⁵Ko Petelo aotenda la Yesu, ate, Labi, bolotsi eneyal’iso toyali mendo; bolotsi tofake balombe basaso: limoko lacin’ene, limoko lacin’ena Mose, ko limoko lacin’en’Eliya.

⁶Lacin’oka ateya yoi linim’end’otenda, lacin’iyo baoka losomo mene.

⁷Koko lilo yoya, ko limakunda, ko lofoso lookana ena lilo, ate, One nko Bon’onami ona nganji: bolofak’ende.

⁸Ko sasimo, enek’iy’olengalengaka baten’okin’oto l’iyo lakina, yengoko Yesu kei.

⁹Ko enem’iy’okita ena lingonji, amafekya batasumolake boto’omoko baoyi banak’iy’oenaka, yengoko enengi Bon’on’oto oetwa enek’anawaki.

¹⁰Ko baomonya yoi liho en’etem’eniyo, ko baufolana ncina en’eetwelo en’ewedi.

¹¹Ko bamufola, iy’ate, Batengi ban’ekanda bail’oka ekoli lacina Eliya ayi en’oso lacina nai?

¹²Ende amakutwela, ate, Ekoli, solosolo, lacina Eliya ayi en’oso, ko aongya baoyi bahatu; ko yoi limotengama lacin’ena Bon’on’oto bosamb’oya? nk’oka angen’ino l’aoyi bike, ko angokyama nsoi?

¹³Koko emi lakosumol’ino, Eliya amosila liya, ko bamilel’ende baoyi banak’iyoamene olangaka, yok’onoki yoi otengamaka lacin’enande.

¹⁴Enek’iy’oyelaka eneyali bakili, aena bik’ike bon’ato bomosusana eneyal’iyo, ko batengi ban’ekanda bamaatsa ntango.

¹⁵Koko isasanga, eneki bato’aho bik’ike oenak’ende, baofefa mpefa bike, ko baocoa la mbango eneyal’ende, ko bamosangela.

¹⁶Ko amaufola, ate, Yoi linatan’ino ntango lika nai?

¹⁷Ko boto’omoi on’ato’aho bik’ike amokutwela, ate, Bolaki, moya l’on’onami’ona mpame enek’e lacina ayali la lifoi lina bokukuluku;

¹⁸ko bili l’ili bonundam’ende la liho, liho limosokodya ena loko; ko aila yoka bafulo en’onyua, ko aokekesanya baino, ko aocoa bokeke mene. Lotendaka l’akili’ane lacina bafodya lifoi liho, koko iyo batinya.

¹⁹Ko Yesu aokutola, ate, Eotwelo enefan’imeedyo! nongoyala l’ino bolingolingo boya? Nkolengedy’ino bolingolingo boya? Boyaka l’ende eneyal’emi.

²⁰Ko baoya l’ende eneyali Yesu. Ko eneki’nd’oenaka Yesu, isasanga lifoi limosokodya ko aokwa ena loko, ko ayokilimodya, ayaile yoka bafulo en’onyua.

²¹Ko aufola bafango’onande, ate, Amoyala bokotu’one bolingolingo yok’oya? Ate, L’olenge’onande;

²²ko ma-ma lifoi limolofusa ena nkoi, ko l’en’asi, lacina aoyake. Koko yomb’e okambisa yoi limoi, otookamel’isei, otokambya!

²³Ko Yesu amosumola, ate, Yombo okambisa fo…! Baoyi bahatu bailamisa l’ende onimedya.

²⁴Isasanga bafango’on’onome aololua la mposoli, ate, Limedya nde! ompuedya imeedyo.

²⁵Ko eneki Yesu oenaka bik’ike bon’ato baoya osolongana eneyal’ende la mbango, aofela lifoi lina nsefo, amosumola, ate, E lifoi lina bokukuluku la booko, lakosumol’e, fola eneyal’ende, ko tatuake lakina eneyal’ende tu.

²⁶Ko eneki’nd’ololuaka, amokilimola bike mene, ko aofola eneyal’ende. Ko bonome aoyalama yoka boto onowa tutu, ko bato bike baila, Mbo amowa.

²⁷Koko Yesu amosuka la likasa, ameemadya, ko aetwa.

²⁸Koko eneki’nd’otuaka en’otumba, bakili’anande bamuufola ena lokuko, iy’ate, Iso totofodyisa lacina nai?

²⁹Ko amasumola, ate, Demona en’okotu’one efafodyama yengoko la boondo kei (ko la nkila ena toma).

³⁰Ko baumaki meho, ko baotianya Ngalilaya; ko atalanga boto’omoko aeye.

³¹Lacin’oka aolaka bakili’anande, amasumola, ate, Bon’on’oto angolekyama en’akasa ban’ato, ko iyo bangoyaka; ko enengi’nd’oyakama, angetwa en’ewedi en’ina bon’esaso.

³²Koko iyo batanonganya yoi liho, ko batuufola ncina, lacin’oka baangak’ende.

³³Ko baoya ena Kapalanauma. Ko eneki’nd’oyalaka en’otumba, amaufola, ate, Yoi linalik’in’oatanaka ntango ena mboka lika nai?

³⁴Koko baoyala nko mwi, lacin’oka baatanaki ntango ena mboka lacin’ena boto’oniyo onoyali yoka iyome.

³⁵Ko aokisase, ko aelela ba-jo l’afe, ko amasumola, ate, Yomb’oto alanga ayalame en’oso bona bifili, angoyala ena mbusa mene, nko bosali bon’iyatu.

³⁶Ko aotamba bonome, ko ameemadya ena ntoto eniyo; ko aohama ena beyo benande, ko amasumola, ate,

³⁷Boto’on’etaketaka onongosangela bonome yok’one ena lina linami, ansangel’emi; ko boto l’oto ononsangel’emi, afansangel’emi: aosangela nk’ende onontomaki.

³⁸Ko Yoane amosumola, ate, Bolaki, iso tenaki boto’omoi kum’ayafodya bademona ena lina line, ko tofekyaki, lacin’oka afambane l’iso.

³⁹Koko Yesu ate, Botofekyake; lacina efan’oto onokamba ekambwa ena mpefa ena lina linami ononginya litang’emi bowe isasanga;

⁴⁰lacin’ende onofatosimbe ayali l’iso.

⁴¹Lacina boto l’oto onongokof’ino ekala en’asi, boyomele, ena lina linami lacin’eho boyali bana-Masiya, solosolo, lakosumol’ino, afindaki boluko’onande.

⁴²Ko onongokumba omoi ona banatome’ane banimedya, eleki bolotsi eneyal’ende yombo baokakela lufe lineyaminyama basongu nk’ena nkingo enande, ko bamofusa ena lose l’okwa.

⁴³Yombo likasa line likokumba, kesa liho pa; bolotsi eneyal’e otua ena liiko l’etumbe, otongocoa ena Ngena l’akas’afe, nk’ena nkoi inifalimale tu.

⁴⁴(Enefawu iwawa iniyo, ko nkoi ifalimale.)

⁴⁵Ko yombo likaka line likokumba, kesa liho pa; bolotsi eneyal’e otua ena liiko l’etumbe, otofusama ena Ngena l’akak’afe, nk’ena nkoi inifalimale.

⁴⁶(Enefawu iwawa iniyo, ko nkoi ifalimale.)

⁴⁷Ko yombo liso line likokumba, tokola liho; bolotsi eneyal’e otua ena lifoka lina Yakomba la liso limoko, otongofusama ena Ngena l’aiso’afe,

⁴⁸enefawu iwawa iniyo, ko nkoi ifalimale.

⁴⁹Lacina boto l’oto angocwela la nkoi (ko mbeka ihatu ingocwela l’okwa).

⁵⁰Bokwa bond’olotsi: koko yombo bokwa bosila ngenge, bongofa boho ngenge lakina bosamb’oya? Boongya liyala l’okwa eneyal’inoamene, ko boongya liyala l’efili en’atenyi’aninoamene.