Read ngando Luka 10 Bible Online

Luka 10 - ngando bible

Luka 10

¹Ena mbusa en’aoyi’ane, Nkolo aosona bato’amoi ntuku nsambo, ko amatoma bafe’afe en’oso’onande, bacu en’enyanga l’enyanga ko l’en’ili l’ili beneng’endamene oya linga.

²Ko amasumola, ate, Enukelo emosokwa solosolo, ohonde basali bafan’ike; lacin’eho, boonda Nkolo en’enukelo, atome basali en’enukelo enande.

³Bocoaka; lenda, lakotom’ino yoka ban’ana mpate ena ntoto ena nkoi.

⁴Botatolake bofalusi la ntombe la tombwaku; ko botesake boto ena mboka.

⁵Ko en’otumba bon’etaketaka bonatu’ino, botenda en’oso, Mbo mwi eneyali botumb’one.

⁶Ko yombo bon’ona mwi ayali meho, mwi enino engoyala nk’eneyal’ende; ohonde yomb’efa yok’oho, mwi eho enguta nk’eneyal’ino.

⁷Ko boyalamaka en’otumb’oho, bola ko bomela toma tatong’iy’okofa; lacin’oka bokambi bon’ekambwa akoli nko la mpuci enande. Botaselaselake en’etumba l’etumba.

⁸Ko en’onyanga l’onyanga bonatu’ino, ko bakosangel’ino, bolaka toma tatong’iy’okambedya;

⁹bikya bato banayali la nkangi en’onyang’oho, ko basumole, in’ate, Lifoka lina Yakomba limololama l’ino.

¹⁰Koko en’onyanga l’onyanga bonatu’ino, ko bafakosangel’ino, bofolaka ena mboka ina bonyang’oho, ko bila, in’ate,

¹¹Iso tokotitwel’ino nko le lofucifuci lona bonyang’onino loneloakama en’akak’aniso; ohonde beyaka yoi line, lifoka lina Yakomba limololama.

¹²Lakosumol’ino, ekoiyelo en’onyang’oho en’in’oho engoleka ekoiyelo ena Sodomo.

¹³Bino eneyal’e, Kolazina I Bino eneyal’e, Betesaida! Yombo bikambwa bina mpefa binokambamaka eneyal’ino bi kambamaki’ale ena Tula la Sidona, tumbe baumbelaki baoyi’owe alale, nko nkisase en’enuko l’etoko.

¹⁴Ohonde en’ina bon’etendelo en’akambo, ekoiyelo enino engoleka ekoiyelo ena Tula la Sidona.

¹⁵Koko e, Kapalanauma, osokoiledyama nde ena loola? Ongokitsama ena Adese.

¹⁶Ende onongokolofamel’ino, andofamela nk’emi; ko onongokotembol’ino, antembol’emi; ko onongontembol’emi, atembola nk’ende onontomaki.

¹⁷Ko iyo ntuku nsambo bauta l’ekiko, iy’ate, Nkolo, le bademona mene baotofika ena lina line.

¹⁸Ko amasumola, ate, Emi lenaka Satana aokwa ena loola yoka lihalihali.

¹⁹Lenda, lokof’ino mpamba lacina bikamele njua ko la toandika, ko bikamele locili lohalotu lona bookyi’owe; efaate iyema iningokiil’ino bowe tu.

²⁰Ohonde botanyangelake lacin’oka bademona bakofik’ino: bonyangela lacin’oka bain’anino bamotengama ena loola.

²¹En’esik’eho Yesu aonyangela la Bolimo bon’olotsi, ko aila, ate, Lakokumy’e, Bafango, Nkolo ena loola l’ena loko, lacin’oka ofiselaki bato bana bomwu l’ana nnonganya baoyi’ane, ko ofiswelaki banatome baho; nkoho, Bafa, lacina oimedyaki bokotu’oho bolotsi.

²²Baoyi bahatu bamompam’emi l’afango’onami, ko efan’oto oneya Bona, yengoko Bafango kei; ko efan’oto oneya Bafango, yengoko Bona, la boto onongi Bona olanga oyeyany’ende.

²³Ko aohelengwa eneyali bakili, amasumola ena lokuko, ate, Baiso banena bikambwa binen’ino baosakelama bosako.

²⁴Lakosumol’ino, basumoli bike l’afoka bike balangaki’oka baene bikambwa binen’ino, ko iyo batena; ko balangaki lacina baoke baoyi banok’ino, ko batoka.

²⁵Ko lenda, bosakitoli’omoi bona basangya aemala, aomeka Yesu la bufo, ate, Bolaki, njil’oya lacina nsangole liiko lonelofakale?

²⁶Ko amosumola, ate, Yoi linalitengi en’asangya liyali’oya? oanda yoi lika nai meho?

²⁷Boto’oho amokutwela, ate, Oka Yawe Yakomba ene nganji l’otem’one bohotu, ko l’olimo’one bohotu, ko la locili lone lohalotu, ko la lokanyi lone lohalotu; ko oka onoli l’e nganji yoka bosamb’onayook’e eamene nganji.

²⁸Yesu ate, Omokutola nko cilili; Ila nk’oko, ko ongika.

²⁹Ohonde aolang’oka ayolongy’endamene, ko aila Yesu, ate, Onoli l’emi vo, ende nai?

³⁰Yesu amokutwela, ate, Boto’omoi auma ena Yelusalema ko aokita ena Yeliko; ko enem’end’ocoa, aukana la baiya ban’esefo; iyo bamokumola bisenda, bamofoma mpomi, ko baocoa, bamocika kum’aolama l’ewedi.

³¹Ko noka, nkang’emoi aocoa mboka eho; ko eneki’nd’oenak’ende, amofengola en’ili bona mboka.

³²Nk’osamb’oho boto’omoi ona Lewi, eneki’nd’oyelaka en’edye eho, ko ameena, amofengola en’ili bona mboka.

³³Ohonde boto’omoi ona Samalia, enem’end’ocoa bokita, aoyela en’edye eneki’nd’oyalaka, ko ameena, ko amookamel’isei,

³⁴ko aoya eneyal’ende, aokakela mpota inande l’esenda kum’ayutele bauta la vina ena mpota; amotadya ena mpunda enandamene, amoyedya en’otumba bona befenda, ko amomonya bolotsi.

³⁵En’ina bona loi aofodya deniers ife, ko aofa mene’otumba, ate, Omonyaka bolotsi; ko yombo okafa francs imoi ena liko, nongokoutody’iho enengi’m’outa.

³⁶L’iy’asaso, boto onakanel’e oka aolamaki l’ende onukanaki l’aiya ban’esefo oka nai?

³⁷Ate, Ende onookak’isei. Yesu amosumola, ate, Coaka oyile nkoho.

³⁸Enem’iy’okenda, aotua en’onyang’omoi; ko boyoto’omoi, lina linande Malata, amosangela en’otumb’onande.

³⁹Ende ayaaki l’akune oka Malia, onokisak’ase en’akaka bana Yesu lacina alofamele baoyi banande.

⁴⁰Koko Malata aokandakanda l’ekambelo bike; ko aoya eneyal’ende, ate, Nkolo, ofakanela nde bakune’onami amoncika lacina nkambe bikambwa bine nk’emi kei? Osumole ankambya.

⁴¹Koko Yesu amokutwela, ate, Malata, Malata, okandakanda ko oseki likanela baoyi bike;

⁴²nde, yoi yinda nko limoko; ko Malia amosona liondo liho lin’olotsi, ko afakumolama liho.