Read ngando Luka 11 Bible Online

Luka 11 - ngando bible

Luka 11

¹Ko ayaaki en’edye emoi, ayaonde, ko eneki’nd’okadyaka yonda, omoi ona bakili’anande amosumola, ate, Nkolo, otolake lacina toonde boondo, yok’onoki Yoane olakaka bakili’anande.

²Ko amalokwela, ate, Enond’ino bila yok’one: Bafango’oniso (onoyali ena loola), lina line likumyame. Lifoka line liye. (Eango ene eilame ena loko, yoka bosamb’onilama eho ena loola.)

³Otofe toma toniso tona bina l’ina.

⁴Ototungole en’aoyi’owe’aniso, lacin’oka iso totungola iyatu banayali l’esilo eneyal’iso. Ko tatotolake ena lomeko, (koko ototungole en’owe).

⁵Ko amasumola, ate, Yombo boto’omoi’onino aata efili; ko aocoa eneyali ende ena kelekele en’oco, ko amiila, ate, Mango, onsombya mampa isaso,

⁶lacin’oka efili enami amoya eneyal’emi en’okita, ko mpana toma tatongi’m’of’ende.

⁷Ko ende ena ntundulu aokutola, ate, Tansengenyake ena yoi line; lokombo lokombi, ko ban’anami bayali l’emi ena ntange, mpinya yetwa oyokofa.

⁸Lakosumol’ino, Kanga afetwa oyof’ende lacin’oka and’efili enande, ohonde lacin’ena locinji lonande angetwa, ko angofa toma tonatoind’ende tohatotu.

⁹Lakosumol’ino, Bufola, ko engofama eneyal’ino; bofona, ko bongosungya; bofomela, ko engokombwa eneyal’ino;

¹⁰lacin’oka boto l’oto onufola, atamba; ko boto l’oto onofona, asungya; ko eakombwa eneyal’ende onofomela.

¹¹Yombo bon’on’omoi’onino alomb’afango mampa, angofa lufe? ko yomb’ende alomb’afango nse, angofa nde njua lacin’ena nse?

¹²Ko yomb’alomb’afango bokele, angofa nde ikandika?

¹³Yomb’ino, bato ban’owe, beya lifa ban’anino nganji iney’olotsi, Bafango’onino onoyali ena loola afaleki nde oyaf’iyo banond’ende Bolimo bon’olotsi?

¹⁴Koko aofodya demona ena bokukuluku. Koko eneki demona ofolaka, boto’ona bokukuluku aotenda, ko bato bik’ike baofefa.

¹⁵Koko bamoi, Mbo ende aofodya bademona la Balazebuba, lifoka lina bademona.

¹⁶Koko bamoi bamufola af’iyo ndembi ena loola, lacina baomeke.

¹⁷Koko ende aofokola nkanyi in’etem’eniyo, ko amasumola, ate, Lifoka la lifoka lineyakambwana lihomene, yehyama nkwaho; ko bomboi bonatana la bohomene bokwa nko nkwaka;

¹⁸ko yombo Satana aatana l’endamene, aokambwana, lifoka linande lingolingalinga likwa bosamb’oya? lacin’oka ino bil’oka njafodya bademona la Balazebuba.

¹⁹Yomb’emi lafodya bademona la Balazebuba, iya ban’anino, bamafodya la nai? lacin’eho, iyo bangoyala juges inino.

²⁰Koko yomb’emi lafodya bademona la ikola ina Yakomba, oko nk’eyoka lifoka lina Yakomba limokofoel’ino.

²¹Nk’en’oka boto’ona locili aohatela bimunyi ko aotombanya botumba bonande, toma tonande tomonyama nkwaho;

²²koko lakina, nk’en’oka omoi onoleki locili aoya eneyal’ende, ko amokoiya, angokumol’ende bimunyi binande bin’ita biniki’nd’oilak’otema bihitu, ko ango afa toma tonatoki’nd’omonyaka.

²³Ende onofambane l’emi, ampekedya; ko ende onofasusanya l’emi, afanzafanza.

²⁴Enafola demona ena nsefo eneyali boto, oko ayaselasela ena bekala bena komukomu, ayafone lifomya, koko afene. Ko aila, Mbo mbutwake en’otumb’onami bonoki’m’ofolaka.

²⁵Ko enem’end’oyela meho, aosungy’oho bototoloto, boombama ko boongyama.

²⁶Nkwaho aocoa otamb’eneyal’endamene bademona bamoi nsambo banalek’ende la bowe; ko baho baotua, ko baoyala meho; ko bokotua bon’oto’oho bona nsimbo boleki boho bonoki’oso la bowe.

²⁷Koko enem’end’otenda baoyi’ane, boyoto’omoi on’ato’aho bik’ike aololua, amosumola, ate, Lototo lonelok’ootwaka la baele banak’olomaka baosakelama bosako mene!

²⁸Koko aokutola, ate, O, koko bosako bonoleki nk’eneyal’iyo banoka yoi lina Yakomba, ko baomonya liho.

²⁹Koko eneki bato bik’ike osolonganaka eneyal’ende, aomatsa yila, ate, Eotwelo ene nk’eotwelo en’owe; iyo bayafone ndembi; koko ndembi efafamaki eneyal’iyo, yengoko ndembi ena Yona.

³⁰Lacina Bon’on’oto angoyalama ndembi eneyali eotwelo ene, yoka bosamb’onoki Yona oyalamaka ndembi eneyali baise Ninewe.

³¹Lifoka lin’oyoto lina roi lina sud angemala en’etendelo en’akambo la bato ban’eotwelo ene, ko angakoiya; lacin’oka ayaki ena nsimbo ina loko oyoka baoyi bana bomwu bana Solomona; ko lenda, onoleki Solomona end’one.

³²Bato bana Ninewe bangemala la bato ban’eotwelo ene en’ina bon’etendelo en’akambo, ko bangakoiya; lacin’oka iyo baumbelaki baoyi’owe la lilako lina Yona, ko lenda, onoleki Yona end’one.

³³Enafets’oto mwinda, afile eho en’edye enefenya, ko afile eho en’ase bana litungu: ail’eho nk’en’efikelo ena mwinda, lacina iy’anatua meho baene fololo.

³⁴Mwinda ena yonge nko liso; lacin’eho, nk’en’oka liso line liyali sengelele, yonge line lihalitu lingofolala. Koko yombo liso line liyali bowe, yonge line lihalitu lingoyala luucu mene.

³⁵Lacin’eho, boongya lilenda, lacina fololo eneyali ena ntundulu enino etoyalama bilima.

³⁶Nk’en’oka yonge line lihalitu yofolala, efana nko l’etenyi eneciki en’ilima, lingoyala yonge lihalitu nko fololo, nk’eyoka mwinda eneyaloloma ko eakofoladya nko fololo.

³⁷Nk’enem’end’otenda, Bofalusi’omoi ameelela lacina ale toma l’ende; ko aotua eneyal’ende, ko aokisase ena mesa ena toma.

³⁸Ko eneki Bafalusi oenak’oka ataok’asi en’oso bona toma ndaka, baofefa.

³⁹Koko Nkolo amosumola, ate, Ino Bafalusi bosonga mbiolo ena nkofo la salani, ohonde ntundulu enino eolola la besefo ko l’aoyi’owe.

⁴⁰Ino tolemeleme, ende ononunolaki mbiolo, atanunola nde ntundulu nkoho?

⁴¹Koko bolekya baoyi banayali en’etem’enino nganji in’isei, ko lenda, baoyi bahatu bakulwa eneyal’ino.

⁴²Koko bino eneyal’ino, Bafalusi! lacin’ino bolekya nganji ina minti l’ina lu ko l’ina ndunda ihatu, koko lakina bofengola etendelo en’akambo ena cilili, ko la nganji ena Yakomba ena lolango: akoli eneyal’ino lacina bokambe baoyi’ane bana mbusa, ko ban’amoi bafacikama nkoho.

⁴³Bino eneyal’ino Bafalusi! lacin’ino bolanga nkici inay’oso ena basunagoga, ko bolanga beeso en’ekala bena limbongo.

⁴⁴Bino eneyal’ino! lacina boyali yoka nketa inifenya, ko bato banikamel’iho bafey’oka nketa iyali.

⁴⁵Ko omoi ona basakitoli bar’asangya amoutodya, ate, Bolaki, enil’e baoyi’ako, otofel’iso nkoho.

⁴⁶Koko amosumola, ate, Bino eneyal’ino, besakitoli! lacin’oka ino botodya bato belito beneseki efafo ena nkumba, koko inoamene bofasuke belito l’io inino imoko.

⁴⁷Bino eneyal ino, lacin’oka bofaka betumba bena nketa bena basumoli ban’alale, nk’iyo banaki bafango’anino oyakaka.

⁴⁸Nk’osamb’oho inoamene boyali temoins, ko bimedya bikambwa biniki bafango’anino okambaka: lacin’oka iyo bayakaki basumoli, ko ino bofaka betumba bena nketa iniyo.

⁴⁹La ncina ene, bomwu bona Yakomba bomila, ate, Nongatomel’iyo basumoli ko l’ikima; ko bangoyaka bamoi’aniyo, ko bangonyoma bakina,

⁵⁰lacin’eho likambo lin’akila ban’asumoli bahatu banutsaki nk’ena limatsako lina loko liakama eneyali bato ban’eotwelo ene;

⁵¹mmatsa l’akila bana Ebele yengoko bakila bana Zekalaya, onoyakamaki en’atenyi bana mesa ena mbeka l’edye enekyama en’oeka. O, lakosumol’ino, eotwelo ene engokwa likambo liho.

⁵²Bino eneyal’ino, besakitoli! lacin’oka ino bomotola losete lona bomwu: inoamene botatua, ko bomofekya iy’anasokotua.

⁵³Ko eneki’nd’oumaka meho, batengi ban’ekanda la bafalusi baomatsa lisomy’ende losomo ko bamosengenya bik’ike lacina atende baoyibike;

⁵⁴ko bamoonga la longo, lacina baat’etelo oyokoiya la baoyi ban’onyua bonandamene.