Read ngando Luka 13 Bible Online

Luka 13 - ngando bible

Luka 13

¹Bato’amoi banayaaki meho en’esik’eho bamosumola yoi lina baise Ngalilaya, banaki Pilato osanganyaka bakil’aniyo la mbeka iniyo.

²Koko Yesu amakutwela, ate, Bokanela nde baise Ngalilaya bane baleki baise Ngalilaya bahatu la bowe, lacina enek’iy’oenaka bino bina baoyi’ane?

³Lakosumol’ino, Efana; koko yomb’ino bofayosume en’aoyi’owe, ino bongehyama nk’osamb’oho.

⁴Koko bato’aho jo l’anei banaki botumba bon’oliko okwelaka ena Siloma, ko bomayaka tutu: bokanela nde iyo bayaaki bakambi ban’owe banaleki bato bahatu banatonga ena Yelusalema?

⁵Lakosumol’ino, Efana; koko yomb’ino bofayosume en’aoyi’owe, ino bongehyama nk’osamb’oho.

⁶Ko amasumola ekolanya ene: Boto’omoi aofusa bote bona liteli ena lisala linande lina bekoli bena vina; ko aoy’ofona bemamo ben’ote’oho, koko atasungya tu.

⁷Ko aosumola botombanyi bona bekoli bena vina, ate, Lenda, ina mbul’ine isaso loya ofona bemamo en’ote’one bona liteli, koko ntasungya tu; okote: boho behya lisala la nkaka lacina nai?

⁸Botombanyi amokutwela, ate, Nkolo, ocike mbul’ene kei, njocimele bekongo, ko njofusele toi meho;

⁹nk’en’oka bongota bemamo, bolotsi; ohonde nk’en’oka bofotaki bemamo, ombolokota.

¹⁰En’ina bona Sabata aolak’ato ena sunagoga emoi.

¹¹Ko lenda, boyoto’omoi ayaaki meho onoyaaki la lifoi lina nkangi mbula jo la mbula mwambi; ko aosunama, ko atemalisa cilili tutu.

¹²Ko eneki Yesu oenak’ende, ameelela, amila, ate, Boyoto, omotungwa ena nkangi ene.

¹³Ko aotadya bakasa eneyali ende, ko isasanga aonanwa cilili, ko aokumya Yakomba.

¹⁴Ko chef ena sunagoga aolemwa, lacin’eneki Yesu oikyak’oto en’ina bona Sabata; aolokwela bato’aho bik’ike, ate, Bekol’otoa beyali benekoli l’iso lacina tosale; boyak’oyika en’ina beho, ef’en’ina bona Sabata.

¹⁵Koko Nkolo amokutwela, ate, Ino besimo! boto l’oto’onino afatungole ngombo enande yombo mpunda enande ena etenyi enal’eho toma, ko aotol’eho ena lose oyofa basi, nk’en’ina bona Sabata?

¹⁶Iya boyoto’one, bon’ona Abalayama, onoki Satana otungyaka mbula jo la mbula mwambi: atakolana nde litungwa en’etungamelo ene en’ina bona Satana?

¹⁷Ko enem’end’otenda baoyi’ane, baokyi’owe’anande bahatu baoka nsoi; ko bato’amoi bahatu baonyangela lacin’ena bikambwa bin’okolo binikambamaki l’ende.

¹⁸Koko aila, ate, Lifoka lina Yakomba yakolana la nai? nsokokolanya liho la nai?

¹⁹Yakolana la boona bona sinapi, bonoki boto’omoi otambaka, ko aofusa ena lisala linande; ko boho bomela, ko boyalama bote bon’okolo, ko mpulu ina liko yomotama ena bitange bin’ote’oho.

²⁰Ko aila lakina, ate, Nongokolanya lifoka lina Yakomba la nai?

²¹Yakolana la nyango ena mampa eneki boyoto otambaka, ko aofisa ena ntundulu ena farine bike, yoka kilos isaso, yengoko mampa ehatu eosangwa la nyango eho.

²²Ko aotianya benyanga l’enyanga, bicimo l’icimo, kum’ayalake lilako, ko ayacu bokita ena Yelusalema.

²³Ko boto’omoi amufola, ate, Nkolo, iy’anika bafayali nde nk’eyoka bafan’ike? Ko amasumola, ate,

²⁴Bofonaka la locili lacina botua en’ofolo bona nkaka; lacin’oka lakosumol’ino, bato bike bangolanga lacina batua, koko bafaataki etuelo.

²⁵Enengi mene’otumba oemala, ko aokomba lokombo, ko ino bomatsa yemala ena mbiolo, ko bofomela lokombo, Mbo Nkolo, Nkolo, otokombwele lokombo, ko angokokutwel’ino, ate, Mpe ya enek’in’oyaka.

²⁶Bongomatsa oyila, in’ate, Tolaki toma, ko tomelaki en’oso’one, ko e olakaki ena mboka iniso;

²⁷ko ende angokutola, ate, Lakosumol’ino, mpeya enek’in’oyaka; buma eneyal’emi, inatu bakambi ban’owe.

²⁸Eneng’in’oena Abalayama, la Isaka, la Yakobo, ko la basumoli bahatu, ena lifoka lina Yakomba, koko inoamene bofodyama en’anza, bilelo bina mposoli la nkenyanya en’aino bangoyala meho.

²⁹Ko bato bangoya en’ili bona Est la Ouest, ko l’ena Nord la Sud, ko bangokisase ena lifoka lina Yakomba.

³⁰Ko lenda, bato’amoi banayali ena mbusa bangoyala en’oso, ko bakina banayali en’oso bangoyala en’otungu.

³¹En’in’oho bafalusi bamoi baoya, bamosumola, iy’ate, Uma mendo, coaka mboka ene, lacin’oka Elode alanga akoyake.

³²Koko amasumola, ate, Bocoaka, boyosumole bombang’oko, Mbo lenda, lafodya bafoi, ko liky’ato ena nkangi bon’in’one la loi, ko en’ina bon’esaso locindedya.

³³Ohonde akoli eneyal’emi nkile bokita bonami bon’in’one la loi la bina bon’esaso; lacina efaonge’oka bosumoli awu ena mbiolo ena Yelusalema.

³⁴O, Yelusalema, Yelusalema, onoyakeela basumoli, ko onofusel’iy’anatomama eneyal’e baufe, nsokolanga nsusanya ban’ane ma-ma, yoka bosamb’onasusanya nkoko baas’anande en’ase ban’afafu’anande, ko ino botalanga!

³⁵Lenda, botumb’onino bociki eneyal’ino la bolengelenge; lacina emi lakosumol’ino, Bofanjenaki lakina, yengoko eneng’in’oila, Onoyayi ena lina lina Yawe aosakelama bosako.