Read ngando Luka 14 Bible Online

Luka 14 - ngando bible

Luka 14

¹Koko eneki’nd’otuaka en’otumba bona chef emoi ena bafalusi en’ina bona Sabata lacina ale mampa, bamotakamela.

²Ko lenda, boto’omoi onoyaaki la nkangi ena bongucu ayaaki en’oso’onande.

³Ko Yesu aufola besakitoli ben’asangya la Bafalusi, ate, Nk’iiky’oto en’ina bona Sabata, osondola nde basangya?

⁴Koko iyo baoyala nko mwi. Ko amotamba, amiikya, ko amof’etelo lacina acu.

⁵Ko amaufola, ate, Yombo boto’omoi’onino ayali la mpunda, yombo ngombo, ko eho eokwela lifoku, afotefole nde isasanga, kanga bina boyali Sabata?

⁶Ko iyo batakutolisa baoyi’ane lakina tu.

⁷Ko aosumol’iy’anelelamaki ekolanya, lacina eneki’nd’oenaka bokotua bonok’iy’osonaka nkici inay’oso; amalokwela, ate,

⁸Nk’en’oka boto’omoi akeelela en’elambedya ena nsongana, takisak’ase ena nkici en’oso, lacina boto’omoi onokolek’e la lokumo atoyelelama l’ende,

⁹ko ende onokeelelaki l’e l’ende atongoya oyokiila, ate, Uma, fetsa boto’one; nkwaho ongocoa okisase ena nkici ena nsimbo mene, nko la nsoi.

¹⁰Ohonde, nk’eelelama en’elambedya, coak’okisase ena nkici en’otungu mene; ko eneng’ende onokeelelaki oya, angokiila, ate, Efili, eta, ena nkici en’oso; ko ongata lokumo en’oso’on’iyatu banakisase l’e ena mesa ena toma.

¹¹Lacin’oka boto l’oto onoyofef’endamene angosonjama; koko boto l’oto onoyosonj’endamene angiledyama.

¹²Ko aosumola boto oneelelaki, ate, Enafumb’e elambedya, yombo l’okulu yombo la likolo, telelake bifili bine, la banotwa l’e, l’omboi’one, la batuki bana toma banoli l’e; lacin’iyo batokeelela lakina, ko otoyata boluko.

¹³Ohonde nk’ofumb’elambedya, elela bato biinda, la bitumbe, la betengo ko la banodyak’aiso;

¹⁴ko ongosakelama bosako; lacin’iyo bafan’iyema ining’iy’okutodya: ongata boluko’one nk’en’eetwelo en’ato bana mbongi en’ewedi.

¹⁵Koko omoi’oniyo banakisak’ase l’ende ena mesa ena toma, eneki’nd’ookaka baoyi’ane, amosumola, ate, Onongola mampa ena lifoka lina Yakomba angokik’ekiko.

¹⁶Ohonde amolokwela, ate, Boto’omoi afumbaki elambedya ena nkolo en’esike ena likolo, ko aelelaki bato bike.

¹⁷Koko en’esike ena toma aotoma boombo’onande lacina asumol’iy’anelelamaki, ate, Boyaka; toma tohatotu tomokolana.

¹⁸Koko iyatu baomatsa lifedya leele lonande la lokanyi lomoko. On’oso ate, Mosomba lisala, ko ekoli lacina ncu oyengya liho; lakoonda, oncik’emi.

¹⁹Ko okina ate, Mosomba ngombo jo, ko locoa omek’iho; lakoonda, oncik’emi.

²⁰Ko okina, ate, Mosong’ooli, ko mpan’eyelo la ncina eho.

²¹Ko boombo aoya, ko aosumola nyangetuke enande baoyi’aho. Nkwaho mene’otumba aolemwa, ko aosumola boombo’onande, ate, Coaka la mbango en’elongo l’ena tombokamboka ton’onyanga, ko yaka la bato biinda, ko l’itumbe, ko l’anodyak’aiso, ko la betengo mendo.

²²Ko boombo’oho ate, Nkolo, yoi linalik’otomaka limilama, koko bato ban’elambedya batakoke.

²³Ko nyangetuke aosumola boombo, ate, Coaka la betalimbo ko l’ena toanjo, ko asomya bayi, botumb’onami bololake nko l’ato to.

²⁴Lacin’emi lakosumola, Efaataki nko l’omoko on’ato’aho banelelamaki onongola elambedya enami tu.

²⁵Ko bik’ike bon’ato baocoa l’ende; ko aohelengwa, amasumola, ate,

²⁶Yomb’oto’on’etaketaka aoya eneyal’emi, ko afaalane l’afango’onande la nyango, la booli, la bana, l’atoolo, l’akune, la bambangela, ko afatembole liiko lonandamene nkoho, afakolana liyalama bokili’onami tu.

²⁷Ko boto onofatole ekulusu enandamene, ko afankil’emi, afakolana liyalama bokili’onami.

²⁸Boto’onino oka nai, onosokolanga afake botumba bon’oliko, afakisase en’oso oyaala botuya, yombo toma tonatoat’ende tongokolana lisidya botumba?

²⁹Lacina, enengi’nd’osidya eango, ko afakolana likadya botumba, bato bahatu baneena batosisedya,

³⁰Mbo boto’one amatsaki lifak’otumba, koko atakolana likadya.

³¹Koko lakina, nk’en’oka lifoka limoi aocoa oyukana la lifoka likina en’ita, afakisa nd’ase en’oso oyang’eango, yombo la nkese emoko ena soldats angokolana oyukana la lifoka liho onoyayi oyokana l’ende la nkese ife?

³²Nk’afakolana, aotoma bikima kuma lifoka liho aciki en’osana mene, ko amufola lacina basamb’ilongo.

³³Nk’osamb’oho boto l’oto’onino onofumbele toma tonatoat’ende tohatotu, afakolana liyalama bokili’onami.

³⁴Bokwa bond’olotsi: koko yombo boho bosila ngenge, bosokoata ngenge lakina bosamb’oya?

³⁵Boho bofaonge lakina, l’ena loko l’en’ombombo: bookama nko mboka. Onoyali l’atoi lacina aoke, alofake!