Read ngando Luka 15 Bible Online

Luka 15 - ngando bible

Luka 15

¹Basusanyi bana mpuci bahatu la bato ban’owe baolamel’ende lacina balofe baoyi’anande.

²Ko Ba falusi l’atengi ban’ekanda baoninganinga, Mbo boto’one asangela bato ban’owe, ko ala toma l’iyo.

³Ko amalokwela l’ekolanya, ate,

⁴Nko boto’onino ayali la mpate bokama, ko emoko eunga, afacike mpate ntuk’ibwa la mpate ibwa ena sengelenge, ko aocoa ofona eho enungaki, yengoko aen’eho?

⁵Ko enen’ende mpate eho, aotady’eho en’asoko’anande, ko aonyangela.

⁶Ko enut’ende en’ola, aelela bifili binande ko l’iy’anoli l’ende, ate, Bonyangela l’emi, lacin’oka mena mpate enami enungaki.

⁷Lakosumol’ino, Nk’osamb’oho ekiko engoyala ena loola lacin’ena boto’omoko on’owe onumbela baoyi’owe, eneleki ekiko enok’iyo lacin’en’ato ntuk’ibwa l’ato ibwa bana mbongi banafinde eumbelo en’aoyi’owe.

⁸Nk’en’oka boyoto’omoi ayali la francs jo, ko aungya emoi, afafetsa nde mwinda, aomb’otumba, ko afona nko mpona yengoko aen’eho?

⁹Ko enen’ende eho, aelela bifili binande bin’ayato ko l’iy’anoli l’ende, ate, Bonyangela l’emi, lacin’oka mena franc eneki’m’oungyaka.

¹⁰Nk’osamb’oho, lakosumol’ino, ekiko eyali eneka bikima bina Yakomba lacin’en’oto’omoko on’owe onumbela baoyi’owe.

¹¹Ko aila, ate, Boto’omoi ayaaki l’an’afe bana mpame.

¹²Ko bon’ona mbusa aosumola bafango’onande, ate, Bafa, ompe liondo lina toma tone linalingi’m’osangol’olo. Ko amakafela lituka linande.

¹³Efan’olingolingo ena mbus’eho, bon’ona mbusa aosusanya toma tonande tohatotu, ko aocoa bokita en’onyanga bon’osana mene; ko aofalangasanya toma tonande tohatotu la baoyi bana loyenge mene.

¹⁴Ko eneki’nd’okadyaka likafa toma tohatotu, loci lona njala lona lokolo mene lokwela bonyang’oho; ko aomatsa yelingitana.

¹⁵Ko aocoa oyambana l’oto’omoi, bise bonyang’oho; ko ende amotoma ena basala banande oleya nsombo toma.

¹⁶Ko aolanga lacina akinza botem’onande liota la mposo iniki nsombo olaka; ko etaata nko le boto onofaki iyema ina ndaka.

¹⁷Koko eneki lokanyi lonande outaka eneyal’ende, ate, Basali ban’afango’onami bike vo, bala toma tonatokolana l’iyo, ko em’onawa la njala nko mbwaka.

¹⁸Nonge mala, ko nongocoa eneyali bafango’onami, ko nongosumola, emite, Bafa, molehya baoyi bana loola, ko mil’owe en’aiso’ane;

¹⁹mpakoli lacina ntangame lakina bon’one; ontambe yoka bosali’one.

²⁰Ko aemala, ko aocoa eneyali bafango’onande. Ohonde, kum’ayali en’osana mene, bafango’onande ameena, amookamel’isei, aocoa la laango, ko amokwela ena nkingo, ko amosangela la belumba.

²¹Koko bona amolokwela, ate, Bafa, mofulunganya baoyi bana loola, ko mil’owe en’aiso’ane; mpakoli lacina ntangame lakina bon’one.

²²Ohonde bafango aosumola baombo’anande, ate, Boyaka l’okoto bonoleki’olotsi yaya, ko bolots’ende; ko bila lofete ena likasa linande, ko la tombwaku en’akak’anande;

²³ko boyaka l’on’ona ngombo on’itamo, ko boyake, lacina tole, ko tonyangele;

²⁴lacin’oka bon’onami’one awaki, ko ayaike lakina; aungaki, ko amenya. Ko baomatsa linyangela.

²⁵Koko bon’onande ona ngolo ayaaki ena lisala; ko eneki’nd’oyaka, ko aolama l’otumba, aoka nkombi mpoma, ko l’ato bayine biina.

²⁶Ko aelela bofeng’omoi, ko amufola ncina en’aoyi’ako banayilama.

²⁷Ko amosumola, ate, Bakune’one amoya; ko bafango’one amoyaka bon’ona ngombo on’itamo, lacin’oka amolotamba kum’ayakike.

²⁸Ohonde aolemwa, ko atalanga ntuaka ena ntundulu. Koko bafango’onande aofola, ko amoonda.

²⁹Koko ende aokutola, aosumola bafango, ate, Lenda, ina mbul’ine bik’ike mokosaela, ko ntafedya lotomo lone lomoko tu; ohonde otampe nko l’itanta lacina nyangele enyanga l’ifili’inami;

³⁰koko eneki bon’one’one oyaka, onofanzafanzaki lituka line l’ayato bana lisamba, omoyakelaka bon’ona ngombo on itamo.

³¹Bafango amosumola, ate, Bona, oyali nko l’emi bisike bihitu, ko toma tonami tohatotu toyali nko tone.

³²Koko akoli eneyal’iso tokik’ekiko ko tonyangel’enyanga; lacin’oka bakune’one awaki, ko ayaike lakina; aungaki, ko amenya.