Read ngando Luka 16 Bible Online

Luka 16 - ngando bible

Luka 16

¹Koko aolokwela bakili’anande, ate, Boto’omoi, nko ntuki ena toma, ayaaki la botombanyi bona toma tonande; ko bato bamosumola, Mbo botombanyi’oko aofunzafunza toma tone.

²Ko ameelela, amufola, ate, Yoi line lineyok’emi lacin’ene liyali’oya? onsumole bokotua bonom’okambaka en’osala bon’otombanyi; lacin’oka ofayalamaki en’osala bon’otombanyi lakina.

³Ko botombanyi aila en’otem’onande, Mbo njila v’oya? lacina nyangetuke enami amonjumola en’osal’onami bon’otombanyi; mpinya ocima bekongo, ko mpalombe toma, lacina ntonoyoka nsoi.

⁴Leya yoi linalingi’m’oila, lacina, yombo nyangetuke anjumola en’osal’onami, bato bantambe en’etumb’eniyo.

⁵Ko aelela eneyal’ende boto l’oto onoyaaki l’osilo eneyali nyangetuke enande; ko aufola on’oso, ate, Bosilo bonat’e la nyangetuke enami boka nai?

⁶Ate, Bakoko ban’auta bokama. Ko ate, Tamba bokand’one bon’osilo, kisase isanga, ko tenga nko ntuk’itano.

⁷Ko aufol’okina, ate, L’e bosilo’one boka nai? Ate, Tofondo tona bepunga bokama. Amosumola, ate, Tamb’okand’one bon’osilo, tenga nko ntuku mwambi.

⁸Ko nyangetuke enande aokumya botombanyi’oho bon’owe, lacin’oka aokamba yoi lina bomwu; lacin’oka bana bana loko lone, ena ntoto en’ato’aniyo, baleki ban’ana fololo la bomwu.

⁹Ko lakosumol’ino, Boyoatelak’inoamene bifili la lituka linalifakoli; lacin’eho enengi lituka liho osila, bifili biho bakotamb’ino en’atonga bana bisike la bisike.

¹⁰Ende onokamba la cilili ena yoi lin’isisali mene, angokamba la cilili ena yoi lina likolo; ko ende onofana cilili ena yoi lin’isisali mene, afakambaki la cilili ena yoi lina likolo.

¹¹Lacin’eho, yomb’ino botakamb’olotsi la lituka linalifakoli, onongokosuky’ino lituka lina solosolo oka nai?

¹²Yomb’ino botakamba la cilili la lituka lin’oto’okina, onongokof’ino liho lininoamene oka nai?

¹³Boto afasaelisa banyangetuke bafe: yombo angok’emoi bowe, ko angolang’ekina; yombo angundamel’emoi, ko angotembol’ekina. Ino bofasaelisa le Yakomba le lituka.

¹⁴Ko Bafalusi, banokaki lituka mposa, baoka baoyi’ane bahatu, ko bamosisedya bike.

¹⁵Ko amasumola, ate, Ino boyali yoka bato banayoyengol’iyoamene en’aiso ban’ato; ohonde Yakomba aeya betem’enino; lacin’oka yoi linalifefam’olotsi l’ato liyali nko nsefo mene en’aiso bana Yakomba.

¹⁶Basangya la basu moli bayaaki yengoko eneki Yoane oyaka: koko lakina bato bamosumolama bosimo bon’oiotsi bona lifoka lina Yakomba, ko bato bahatu batua ena liho la locili.

¹⁷La loola la loko njuma, la indembindembi ina basangya mbunga, yoi linalileki locili nko indembindembi mbunga.

¹⁸Boto l’oto onumola booli’onande, ko asong’okina, aotata likele; ko boto onosong’oyoto onoki bome oumolaka, aotata likele.

¹⁹Koko boto’omoi, nko ntuki ena toma, aolota bisenda bina pourpre la mbenza en’olotsi mene, ko alaki toma tonatoseki’olotsi bina l’ina.

²⁰Ko bolombi’omoi, lina linande nko Lazalo, aambyama en’ofolo’onande, yonge linande lihalitu nko mbeha la mpota;

²¹ko ende alangaki lacina ale mpumbwu inikwaki ena mesa ena ntuki ena toma; o, le mbwa nkoho yoya olombola mpota inande.

²²Koko bolombi aowa, ko bikima bina loola bamotola ena ntolo ena Abalayama; koko ntuki aowa nkoho, ko aokunjama.

²³Ko enem’end’oena bino mene ena Ngena, aenol’aiso’anande, ko aena Abalayama en’osana, ko la Lazalo ena ntolo enande.

²⁴Ko ameelela, ate, Bafango, Abalayama, onjokamel’isei, ko toma Lazalo, atute ikola inande en’asi, ko acicimodya lolemi lonami, lacin’oka emi len’ino mene la njombi ine.

²⁵Ohonde Abalayama amokutwela, ate, Bona, ofwak’oka e, enek’okisak’ase ena loko, otambaki toma tone ton’olotsi, ko nk’osamb’oho Lazalo toma ton’owe; koko isanga ende aocicima en’otema mendo, koko e oen’ino.

²⁶Koko yoi limoi liyali nkoho: nko lifoku lina likolo liyali en’atenyi’aniso l’ino; ko iy’analanga baume mendo, ko baleke meho eneyal’ino bafan’elekelo, ko iyo en’ili’ol’ei bafan’elekelo eneyal’iso mendo.

²⁷Amosumola, ate, Bafa, lakoonda, otome en’otumba bon’afango’onami;

²⁸lacin’emi njali l’akune batano; lacin’asumol’iyo nko la locili, batongoya iyo nkoho en’ili’one bona njen’ino.

²⁹Abalayama amokutwela, ate, Iyo bayali la Mose ko l’asumoli: balofake nk’iyo.

³⁰Ate, Ef’oko, Bafango Abalayama; ohonde yomb’oto’omoi aetwa en’ewedi ko aocoa eneyal’iyo, tumbe bangumbela baoyi’owe.

³¹Amosumola, ate, Nko bafoke Mose ko la basumoli, bafimedyaki, kang’oto aetwa nk’en’ewedi.