Read ngando Luka 17 Bible Online

Luka 17 - ngando bible

Luka 17

¹Ko Yesu aosumola bakili’anande, ate, Solosolo bipusumwelo bingoya; ohonde bino eneyali bolo’oho onoyedya biho!

²Bolotsi eneyal’ende lacina balite lufe lina likolo (linaminyaminy’iyo basongu) ena nkingo enande, ko baofuse ena lose l’okwa, atopusumodya omoi ona bane bana tosalisali.

³Boyotombanyak’inoamene. Yombo efili ene akilel’e bowe, ofele lofeli; ko yombo ayokanya, oikya ena yoi liho.

⁴Ko yombo akilel’e bowe beila nsambo bin’omoko, ko auta eneyal’e beuta nsambo, ko aila, ate, Layokanya, oikya en’aoyi’aho.

⁵Ko bikima baosumola Nkolo, iy’ate, Otofuedya imeedyo.

⁶Ko Nkolo ate, Yomb’ino boyali l’imeedyo yoka boona bona sinapi kei, tumbe bongosumola bote’one bona sukamino, in’ate, Luwaka, ko fusamaka ena lose l’okwa; ko boho bongokimedy’ino.

⁷Yombo boto’onino aata boombo, ko boombo’oho acima bekongo ena lisala, yombo atombanya mpate, enaya boombo ena lisala, angosumola nde, ate, Yak’okisase, oyole toma?

⁸Afosumole nde, ate, Ompumbele toma njole, lit’okoli’one, ko onsaele, njole ko njomele, koko eamene ongola ko ongomela ena mbusa?

⁹Enakamba boombo’oho nko bikambwa biniki’nd’otomamaka, nyangetuke enande amofa nde merci bike? Efana.

¹⁰Nk’osamb’oho l’ino, enakady’ino likamba bikambwa bihitu binik’in’otomamaka, bila, in’ate, Toyali nko baombo kei: tomokamba nko bikambwa binik’is’otomamaka kei.

¹¹Ko enek’iy’ocoaka ena Yelusalema, aotianya benyanga bena Samalia la Ngalilaya.

¹²Ko enem’end’otua en’onyang’omoi, bato jo ban’aise nkangi en’okenge baukana l’ende, baemali en’osana;

¹³ko baololua, iy’ate, Yesu, Nkolo, otokamel’isei.

¹⁴Ko eneki’nd’aenaka, amasumola, ate, Bocoaka, boyotume nkanga baonge’anino. Nk’enem’iy’ocoa, baokulwa.

¹⁵Ko eneki omoko’oniyo oenak’oka amolika, auta la mbusa, ko aokumya Yakomba la lofoso lona lokolo;

¹⁶aokwa en’elongi enande en’akaka bana Yesu, ko amoambela merci; ko ende ayaaki bise Samalia.

¹⁷Ko Yesu amokutwela, ate, Bato jo batakulwa nde? Iya bakin’ibwa, bayali meya?

¹⁸Efana nko le boto onuta okumya Yakomba, umola nko bofenda bone kei?

¹⁹Ko amosumola, ate, Emala, coaka mboka ene; imeedyo ine imokiikya.

²⁰Ko eneki Bafalusi oufolak’ende esike en’eyelo ena lifoka lina Yakomba, amakutwela, ate, Lifoka lina Yakomba lifaye la ntakamela l’aiso;

²¹ko bafilaki, Mbo lenda mendo! la Lenda mei! lacin’oka lifoka lina Yakomba liyali nk’ena ntoto enino.

²²Ko aosumola bakili’anande, ate, Bina bengoya beneng’in’olanga lacina bene bin’omoko bona Bon’on’oto, ko bofenaki boho.

²³Ko bangokosumol’ino, Lenda mei! Lenda mendo! botacoake, botimedyake.

²⁴Yoka bosamb’onaala lihalihali en’ili’omoi en’ase bana loola, ko yololoma nk’en’ili’okina en’ase bana loola, Bon’on’oto angoyala nk’osamb’oho en’ina bonande.

²⁵Koko angen’ino la baoyi bike en’oso, ko angotembolama l’ato ban’eotwelo ene.

²⁶Yok’onoki baoyi okambamaka en’ina beneki Noa oyalaka, baoyi bangokambama en’ina bena Bon’on’oto nk’osamb’oho.

²⁷Balaki toma, bamelaki, basonganaki, ko balekyamaki ena liala, yengoko bina bonoki Noa otalamaka en’atu, ko efela eoya, ko emayaka nk’iyatu.

²⁸Yok’onoki baoyi okambamaka en’esike ena Loto nkoho: balaki toma, bamelaki, basombaki, batekyaki, bafusaki beona, bafakaki betumba;

²⁹koko en’ina bonoki Loto oumaka ena Sodomo mbula ena nkoi la befaka eolwa ena loola, ko emayaka nk’iyatu.

³⁰Engoyala nk’osamb’oho en’ina bonongi Bon’on’oto oenya.

³¹En’in’oho, ende onoyali ena liko lina nsamba en’otumb’onande, ko toma tonande tociki en’otumba, atakitake oyumola toho; ko l’ende onoyali ena lisala, atutake la mbusa.

³²Bokanedyaka booli’ona Loto.

³³Boto on’etaketaka onofona lacina aundamele liiko lonandamene, angungya loho; ko onongungya liiko lonande angomonya nko loho.

³⁴Lakosumol’ino, L’oco’oho mpame ife bangetama ena ntang emoko; omoi angotolama, ko okina angocikala.

³⁵Bayato’afe bangominyaminya basongu laanda en’edye emoko; omoi angotolama, ko okina angocika’a.

³⁶(Mpame ife bangoyala ena lisala; omoi angotolama, ko okina angocikala.)

³⁷Iyo bamufola, iy’ate, Nkolo, bili’oya? Ende ate, Enambi boduo, mponongoli ingosusana nko meho.