Read ngando Luka 18 Bible Online

Luka 18 - ngando bible

Luka 18

¹Ko amasumola ekolanya la ncin’eka akoli eneyal’iyo baonde bisike bihitu ko bafalembwa;

²ate, Ntenji en’akambo ayaaki en’onyang’omoi; ende ataanga Yakomba, ko atakanel’oto tu.

³Ko boyoto on’oweli ayaaki en’onyang’oho; ko aoya eneyal’ende ma-ma, ate, Ontendele likambo en’atenyi’anami l’ookyi’owe’onami.

⁴Koko en’oso atalanga; ohonde ena mbusa aila en’otem’onande, ate, Kanga mpaange Yakomba, ko mpakanel’oto,

⁵nde lacin’oka boweli’one ansengenya, nongotendel’ende likambo, atondembya la njaka ma-ma.

⁶Ko Nkolo aila, ate, Bokaka yoi linatenda ntenji onofana mbongi.

⁷Ko Yakomba afatendela nde banaki’nd’osonaka likambo? nk’iyo banotatanela l’ane l’oco, ko amaokamel’isei ina locinji mene?

⁸Lakosumol’ino, angatendel’akambo isasanga. Ohonde enengi Bon’on’oto oya, angosungya nde imeedyo ena loko?

⁹Ko aokolanyedya iy’anayofef’iyoamene bato bana mbongi ko batembola bato’amoi ekolanya ene:

¹⁰ate, Bato’afe baotua en’otumba bona Yakomba ayonda, omoi Bofalusi, ko okina bosusanyi bona mpuci.

¹¹Bofalusi aemala nko njemala, ko aonda, ate, Yakomba, lakokang’e lokango lacin’oka emi mpakoli l’ato’akina: bakumoli, banafana mbongi, bato bana likele, ko mpakoli l’osusanyi’one bona mpuci;

¹²lakila toma en’eyeng’emoko bekila befe; lalekya liondo limoko lina cu baondo jo bana toma tonatoat’emi tohatotu.

¹³Koko bosusanyi’ona mpuci aemala en’osana, atalanga mbenola nko le baiso ena loola, koko aofomela ntolo enande, ko aila, ate, Yakomba, onjokamel’emi, boto’on’owe, isei.

¹⁴Lakosumol’ino, onutwaki en’ol’onande la boyengo nk’oto’one, efa Bofalusi; lacina boto l’oto onoyiledy’endamene, angosonjama; ko boto l’oto onoyosonj’endamene, angiledyama.

¹⁵Ko bato baoy’eneyal’ende la bikeke biniyo, lacina atadya bakasa eneyal’iyo; koko eneki bakili oenaka yoi liho, bamafela.

¹⁶Koko Yesu amaelela eneyal’ende, aila, ate, Bacike, bikeke bayake eneyal’emi, botafekyake; lacina bana lifoka lina Yakomba bayali yoka bosamb’onoyal’iyo.

¹⁷Solosolo, lakosumol’ino, boto l’oto onofatambe lifoka lina Yakomba yok’ekeke afayatua meho tu.

¹⁸Koko boto’omoi ona lifoka amufola, ate, Bolaki’on’olotsi, nkambake yoi lika nai lacina nsangole liiko lonelofakale?

¹⁹Yesu amokutwela, ate, Ontang’emi bolotsi lacina nai? on’ise bolotsi nk’omoko kei, nko Yakomba.

²⁰Omeya basangya: Tatatake likele, Tayakake boto, Tiyake, Tafotake boto likambo, Fika bafango’one la nyango ene.

²¹Aila, ate, Momonya baoyi’ane bahatu nko l’olenge’onami.

²²Eneki Yesu ookaka baoyi’aho, aila, ate, Oinda nko yoi limoko: coak’oyotekya toma tonatoat’e tohatotu, ko kafela bato biinda, ko ongata lituka ena loola; ko yaka onkile.

²³Koko eneki’nd’ookaka baoyi’aho, aoka lokeseli bike, lacin’oka ayaaki ntuki mene ena toma.

²⁴Yesu amolenda, ko aila, ate, Etuelo ena batuki bana toma ena lifoka lina Yakomba eyali locili mene.

²⁵La ngamela ntianya bokole bona ntonga, la ntuki ena toma ntuaka ena lifoka lina Yakomba, onoleki locili nk’etuelo ena ntuki.

²⁶Ko iy’anokaka baila, iy’ate, Onosokoikyama oka nai?

²⁷Koko ende ate, Baoyi banafakambisa bato, Yakomba akambisa baho.

²⁸Ko Petelo aila, ate, Lenda, iso tumbelaki bel’eniso ko tokokilaki.

²⁹Ko amasumola, ate, Solosolo, lakosumol’ino, efan’oto onumbelaki botumba, l’afango la nyango, l’atoolo l’akune, l’ooli, l’ana, lacin’ena lifoka lina Yakomba,

³⁰onofatambaki bike bona ndeka mene en’esik’ene, ko en’esike enengoya angotamba liiko lonelofakale.

³¹Koko aotamba ba-jo l’afe eneyal’ende, ko amasumola, ate, Lenda, tocoa ena Yelusalema, ko baoyi bahatu banatengamaki l’asumoli lacin’ena Bon’on’oto bangilama.

³²Lacin’oka angolekyama eneyali Befenda, ko iyo bangonyeela, ko bangiila bowe, ko bangutel’endensoi;

³³ko bangofoma mpomi, ko bangoyaka; ko en’ina bon’esaso angetwa lakina en’ewedi.

³⁴Ko iyo batanonganya ncina en’aoyi’ane tu, ko etendelo ene eofisama eneyal’iyo, batafokola ncina en’aoyi banaki’nd’otendaka.

³⁵Koko eneki’nd’oolamaka la Yeliko, boto’omoi onodyak’aiso aokisase en’okenge bona mboka, ayalombe toma.

³⁶Ende aoka bik’ike bon’ato bayete, ko aufola ncina.

³⁷Ko bamosumol’oka Yesu ona Nazaleta ayete.

³⁸Ko aololua, ate, Yesu, Bon’ona Dawidi, onjokamel’isei.

³⁹Ko iy’anetaki en’oso bamofela, acike lofoso; koko ende aokusa yelela mbelela mene, ate, Bon’ona Dawidi, onjokamel’isei.

⁴⁰Ko Yesu aemala, amatoma bayi l’ende eneyal’ende; ko eneki’nd’oolamaka, amufola, ate,

⁴¹Ekambwa enalang’e nkilel’e eka nai? Ate, Nkolo, lalanga njene lakina.

⁴²Ko Yesu amosumola, ate, Enaka! imeedyo ine imokiikya.

⁴³Ko isasanga aena, amokila, ko aokumya Yakomba. Ko eneki bato bahatu oenaka yoi liho, baokumya nko Yakomba.