Read ngando Luka 19 Bible Online

Luka 19 - ngando bible

Luka 19

¹Koko Yesu aotua ena Yeliko, ko aofolanya.

²Ko lenda, boto’omoi ayaaki meho, lina linande Zakayo, onoyaaki chef ena basusanyi bana mpuci, ko ayaaki ntuki mene ena toma.

³Ende aofona lacina aene bokotua bona Yesu; ko atinya, lacin’en’ekami en’ato, lacin’oka ende ayaaki buhe.

⁴Ko aocoa en’oso la laango, ko ailela en’ote bona sukamino oyeena, lacina Yesu asokoeta ena mbok’eho.

⁵Eneki Yesu oyelaka en’edye eho, aenol’aiso ena liko, ameena, ko amosumola, ate, Zakayo, kita yaya, lacin’emi nongoyala en’otumb’one bon’in’one.

⁶Ko ende aokita la mbango, ko amosangela l’enyanga.

⁷Ko eneki bato oenaka yoi liho, iyatu baoninganinga, Mbo amocoa okisase l’oto’on’owe.

⁸Koko Zakayo aemala, ko aolokwela Nkolo, ate, Lenda, Nkolo, lokafela bato biinda etenyi ena toma tonami, ko yombo nkumolaki boto iyema l’esefo, lomuutodya toma tonei tonei.

⁹Ko Yesu amosumola, ate, Bon’in’one liiko lomoya en’otumb’one; lacin’ende nkoho ande bon’ona Abalayama.

¹⁰Lacin’oka Bon’on’oto ayaki lacina afone ko aikya banungaki.

¹¹Enem’iy’oka baoyi’ane, ait’otenda lakina l’eko lanya, lacin’oka aolamaki la Yelusalema, ko iyo bakanelaki’oka lifoka lina Yakomba lingenya nk’isasanga.

¹²Lacin’eho, ate, Lifoka limoi aocoa bokita en’onyanga bon’osana lacina atambe lifoka linande ko aute.

¹³Ko aelela baombo’anande jo, ko amacikela mmina jo, ate, Bokitanyaka nkita l’osolo’one yengoko enengi’m’oya.

¹⁴Koko bato’anande bamook’owe, ko bamotomela bikima, iy’ate, Tofalange boto’one ayalame lifoka liniso lina roi.

¹⁵Ko eneki’nd’otambaka lifoka, ko auta, aotoma bonyua lacina baelele baombo’aho banaki’nd’ocikelaka bosolo eneyal’ende, lacina aeye nkita enek’iy’okitanyaka.

¹⁶On’oso aoya en’oso’onande, aila, ate, Nkolo, lomina lone lomolata ikina mmina jo.

¹⁷Amosumola, ate, Oho nk’olotsi, e boombo’on’olotsi; lacin’enek’okambaka bolotsi ena yoi lin’isisali mene, ongotamba lifoka lina benyanga jo.

¹⁸Ko boombo’on’afe aoya, ate, Nkolo, lomina lone lomolata nko minina itano.

¹⁹Ko amosumola, ate, E nkoho, ongata lifoka lina benyang’etano.

²⁰Koko okina aoya, ate, Nkolo, ndaka lomina lone loneloki’m’omonyaka en’itambala;

²¹lacin’oka lokoangak’e, lacina onde boto’ona bongeno; oambola enetaamby’e, ko onuka enetafus’e.

²²Koko amosumola, ate, E boombo’on’owe! nongokotendel’e likambo nko l’onyua’oneamene. Oeyaki’oka nde nde boto’ona bongeno, lambola enetaamby’emi, ko lanuka enetafus’emi;

²³iya, otila bosolo’onam ena banque lacina nai, lacina en’eyelo enami ntambe boho ko la nkita ena banque?

²⁴Ko aosumol’iy’anemali meho, ate, Bokumole lomina loho, ko bofak’ende onoyali la mmina jo.

²⁵Iy’ate, Nkolo, ayali la mmina jo.

²⁶Emi lakosumol’ino, bamoi bangofama boto l’oto onata; koko bangokumol’ende onofaate nko boho bonosokoat’ende.

²⁷Ohonde baokyi’owe’anami banafalange’oka njalame lifoka liniyo lina roi, boyaka l’iyo mendo, ko bayake nko tu en’oso’onami.

²⁸Ko eneki’nd’otendaka yok’osamb’oho, aeta en’oso, aocoa nk’ena Yelusalema.

²⁹Ko eneki’nd’oolamaka la Betefange la Betania, ena lingonji lina Bilaya, aotoma bakili anande bafe,

³⁰ate, Bocoaka en’onyanga en’ili’onyi; ko eneng’in’o tua meho, bongosungya bon’ona mpunda, etungi, enetatalame boto; botungole, ko boyaka l’eho.

³¹Ko yomb’oto akufola, ate, Botungola mpunda lacina nai? bongokutwela, Mbo Nkolo alanga mpund’ene.

³²Ko iyo banatomamaki baocoa, ko baosungya yok’onoki’nd’asumolaka.

³³Ko enem’iy’otungola bon’ona mpunda, bamene mpunda bamaufola, Mbo ino botungola bon’ona mpunda lacina nai?

³⁴Iy’ate, Nkolo alanga mpunda ene.

³⁵Ko baoya l’eho eneyali Yesu; ko baotadya bisenda biniyo en’okunju bona mpunda, ko baotadya Yesu ena mpunda.

³⁶Ko enem’end’ocoa, baotanda bisenda biniyo ena mboka.

³⁷Ko eneki’nd’oolamaka l’ekitelo ena lingonji lina Bilaya, bondongo bohotu bon’akili baomatsa linyangela, ko baokumya Yakomba la lofoso lona lokolo lacin’ena bikambwa bihitu bina locili binik’iy’oenaka,

³⁸iy’ate, Lifoka onoyayi ena lina lina Yawe aosakelama bosako: mwi ena loola, ko la lokumo ena liko linalileki.

³⁹Ko Bafalusi bamoi ban’ato’aho bik’ike baila, iy’ate, Bolaki, fela bakili’ane.

⁴⁰Ende aokutola, ate, Lakosumol’ino, nko bane bayale mwi, le baufe mene bangololua.

⁴¹Enem’end’oolama, aena bonyanga, ko aolela la mposoli lacin’ena boho,

⁴²ate, Yombo oeyaki en’in’one bone baoyi banasokokoatela mwi! koko isanga bamofisama en’aiso’ane.

⁴³Lacina bina bengokofoela benengi baokyi’owe’ane okosambanya sole la bokako, ko bangokolingamela, ko bangokokombedya bekako en’ili behetu;

⁴⁴ko bangokolady’e ena loko, l’e l’an’ane banayali ena ntoto ene, ko bafakocikelaki lufe limoi litali ena liko lina lufe likina; lacin’oka otanonganya esike en’esiswelo ene.

⁴⁵Ko aotua en’otumba bona Yakomba, ko aomatsa lifody’iy’anasombyaki baongwa meho,

⁴⁶ate, Yoi limotengama, Botumb’onami bongoyala botumba bon’oondo: ino bomil’oho esusanelo ena baiya.

⁴⁷Ko aolak’ato bina l’ina en’otumba bona Yakomba. Koko nkanga ina toome l’atengi ban’ekanda la bingambe bin’ato baofon’etelo lacina baoyake;

⁴⁸koko batasungy’etelo; lacin’oka bato bahatu baambana l’ende nko mbambana lacina balofamele baoyi’anande.