Read ngando Luka 2 Bible Online

Luka 2 - ngando bible

Luka 2

¹Ena bina beho, Kaisala Anguseto atomaki yoi lacina bato ban’enyanga behetu batengame baina.

²Ene nk’etengelo en’oso, enetengamaki kuma Kwilinu ayali gouverneur ena Sulia.

³Ko bato bahatu baocoa otengam’aina, boto l’oto en’onyanga bonandamene.

⁴Ko Yosefa nkoho, auma ena Ngalilaya, en’ecimo ena Nazaleta, ko aocoa en’onyanga bona Yudea, en’ecimo ena Dawidi enetangama Beteleme, lacin’oka ende ayaaki on’ecimo l’ona bomboi bona Dawidi;

⁵aocoa oyotenga lina linandamene ko la lina Malia, ikuke inande, onoyaaki la yemi.

⁶Ko enek’iy’oyalaka meho, esike enande eoyela lacina aote.

⁷Ko aotaki bon’onande ona ngolo, nko bon’ona mpame; ko amolinga l’esenda, ko amoambya ena sanduka enala nyama toma, lacin’oka iyo batasungya edye en’otumba bon’efenda.

⁸Ko batombanyi bana mpate bayaaki en’onyang’oho en’ekala bena tolenge, ko baotombanya botong oniyo bona mpate l’oco.

⁹Ko lenda, ekima ena Yawe eenya eneyal’iyo, ko bokoka bona Yawe bololoma eneyal’iyo nsambanya; ko iyo baoka losomo mene.

¹⁰Ko ekima amasumola, ate, Botaangake; lenda, lokoyel’ino bosimo bon’olotsi bon’enyanga mene, ko enyang’eho engoyala eneyali bato bahatu;

¹¹lacina Boiki onoyali nko Masiya Nkolo amolotwa eneyal’ino bon’in’one en’ecimo ena Dawidi;

¹²ko ndembi eneng’in’oey’ende eh’ene: bongosungya bona amolingama l’esenda, ko aambi ena sanduka enala nyama toma.

¹³Ko sasimo, bik’ike bona bikima bona loola baambana l’ekima, ko baokumya Yakomba, iy’ate,

¹⁴Lokumo eneyali Yakomba ena liko mene, Koko mwi ena loko eneyali bato banalangama l’ende!

¹⁵Eneki bikima oacikaka ko bautwa ena loola, batombanyi bana mpate baolokwelana, Mbo tocu ena Beteleme, tene yoi line lineyilamaka, linima Yawe ototumaka.

¹⁶Ko baoya l’efomafoma, ko baosungya Malia ko la Yosefa, ko la bona aambi ena sanduka enala nyama toma.

¹⁷Ko enek’iy’oenaka, baosumol’ato yoi lineyotendamaka eneyal’iyo lacin’ena bona.

¹⁸Ko bato bahatu banokaki baofefa la baoyi banaki batombanyi bana mpate oasumolaka.

¹⁹Koko Malia aomonya baoyi’ane bahatu, ko aokanela baho en’otem’onande.

²⁰Ko batombanyi bautwa la mbusa, ko baokumya Yakomba ko bamokanga lokango lacin’ena baoyi bahatu banak’iy’ookaka l’anak’iy’oenaka, yok’onoki baho osumolamaka eneyal’iyo.

²¹Ko en’ina bona mwambi baokesa yonge lin’onome, ko baof’ende lina lika Yesu, nko lina linaliki ekima okodyaka kuma nyango atatola yemi linande.

²²Ko eneki bina bena esongelo eniyo okokaka, yok’onoki boeka bona Mose oyalaka, baoya l’ende ena Yelusalema, lacina baolekya eneyali Yawe,

²³(yok’onoki yoi otengamaka en’asangya bana Yawe, Mpame la mpame onotwa yoka ngolo ena lototo angotangama on’oeka eneyali Yawe),

²⁴ko lacina balekya mbeka l’okotua bonotengamaki’ale en’asangya bana Yawe, Bikoso bife, yombo ban’afe bana nkwete.

²⁵Ko lenda, boto’omoi ayaaki ena Yelusalema, lina linande Simiona; ko boto’one ayaaki boto’ona mbongi, bokumi mene bona Yakomba, onolengedyaki Ekikedyo ena Yisalaele, ko Bolimo bon’olotsi ayaaki l’ende.

²⁶Ko yoi litumamaki eneyal’ende la Bolimo bon’olotsi, noka, afenaki bewedi yengoko kum’aena Masiya ena Yawe en’oso.

²⁷Ko aoya l’olimo en’otumba bona Yakomba; ko eneki bafango la nyango oyaka l’ona Yesu, lacina bakambel’ende bokotua bonoyaaki en’asangya,

²⁸ende amotamba, amoohama ena beyo benande, ko aokumya Yakomba, ate,

²⁹Yawe, isanga boombo’one akolana licoa la mwi, Yoka bosamb’onoyali yoi line,

³⁰Lacin’oka baiso’anami bamena liiko lone,

³¹Loneloki okodyaka en’oso bon’elongi en’ato bahatu;

³²Nko fololo enefoladya befenda, Ko la lokumo lon’ato’ane bana Yisalaele.

³³Ko nyango enande la Yosefa baofefa lacin ena baoyi banatendamaki lacin’enande.

³⁴Ko Simiona amasa kela bosako, ko aosumola Malia nyango enande, ate, Lenda, bon’one amilama lacina ayalame ncina en’ekwelo ko l’en’esangedyo en’ato bike bana Yisalaele; ko la ndembi enengotangama lotango;

³⁵o, ko lokula longotianya le botem’one nkoho; lacina nkanyi ina betema bike yenya.

³⁶Koko Ana, bosumoli on’oyoto, bon’ona Fanwele, on’oloi bona Asela, ayaaki meho. Ende ayaaki ngolosombo mene; ko aataki’ale ekisel’ase la bome’onande mbula nsambo enek’iy’osonganaka,

³⁷koko ayaaki boweli mbula ntuku mwambi la mbul’inei. Atuma en’otumba bona Yakomba, aokumya Yakomba la nkila ena toma ko la mbonda ena beondo l’ane l’oco.

³⁸Aoya nk’en’esik’eho, ko aokumya Yakomba, ko aotenda lacin’ena bona Yesu eneyal’iyatu banalengedyaki etungwelo ena Yelusalema.

³⁹Ko enek’iy’okadyaka baoyi bahatu banakolana la basangya bana Yawe, bautwa ena Ngalilaya, en’ecimo eniyoamene ena Nazaleta.

⁴⁰Ko bona aofula, ko aocila en’olimo, ko aolola la bomwu; ko isei ina Yakomba iyaaki l’ende.

⁴¹Ko bafango’onande la nyango enande baocweela mbula la mbula ena Yelusalema en’esike en’elambedya en’Etelo.

⁴²Eneki’nd’otundaka mbula jo l’ife, baocoa meho en’esike en’elambedya, yok’onoki bokotua bon’elambedya oyalaka;

⁴³ko eneki bina ben’elambedya okalaka, bautwa, koko bonome’oka Yesu aocikala ena Yelusalema. Yosefa la nyango enande batey’oka amocikala,

⁴⁴koko baokanel’oka ayacu l’iyo en’ondongo, ko baocoa bokita bona bin’omoko; ko bamofona eneyali bais’ola baniyo ko l’eneyali bifili biniyo.

⁴⁵Koko eneten’iyo ende, bautwa la mbusa ena Yelusalema oyofona.

⁴⁶Koko eneki bin’esaso oetaka, bamosungya en’otumba bona Yakomba, kuma ayakisase ena ntoto en’alaki, ayalofe baoyi’aniyo, ko amaufol’iyo biufo.

⁴⁷Ko bato bahatu banokak’ende baofefa la nnonganya enande ko l’okotua bonoki’nd’okutolaka nkuto.

⁴⁸Ko eneki bafango la nyango oenaka, baofefa, ko nyango enande amolokwela, ate, Bona, otilelak’one lacina nai? lenda, iso l’afango’one tokofonaka la lokeseli mene.

⁴⁹Ko ende amasumola, ate, Bomponak’emi lacina nai? Ino boteya nde akoli eneyal’emi nkambe bikambwa bin’afango’onami?

⁵⁰Koko iyo batanonganya yoi linaliki’nd’oasumolaka.

⁵¹Ko aocoa l’iyo, ko aoya ena Nazaleta, ko amafika lifiko; ko nyango enande aomonya baoyi’ane bahatu en’otem’onande.

⁵²Ko Yesu aofula la bomwu, ko l’efulelo ena yonge, ko la lokumo eneyali Yakomba l’eneyali bato.