Read ngando Luka 20 Bible Online

Luka 20 - ngando bible

Luka 20

¹Koko en’in’omoi, enem’end’olak’ato en’otumba bona Yakomba, ko amasumola bosimo bon’olotsi, nkanga ina toome l’atengi ban’ekanda baoy’eneyal’ende, iyo la bingambe bin’ato,

²ko bamufola, iy’ate, Otosumole, oila baoyi’ane la lifoka lika nai? Ko onokofaki lifoka line oka nai?

³Ko amakutwela, ate, Emi nkoho nongokufol’ino yoi, ko bonsumole:

⁴inelo ena Yoane, eyaaki yoi lin’ato, yombo yoi lina loola?

⁵Ko baosumolana, Mbo yombo tila, Ekambwa ena loola, ende angotila, ate, Ino botiimedya lacina nai?

⁶Koko lakina, yombo tila, Ekambwa en’ato vo…; bato bahatu bangotofusela baufe; lacin’iyo baimedy’oka Yoane ayaaki bosumoli.

⁷Ko baokutol’oka bafanonganya eneki inelo enande oyaka.

⁸Ko Yesu amasumola, ate, Ko l’emi nkoho mpakosumol’ino lifoka linakamb’emi baoyi’ane.

⁹Ko aomatsa lisumol’ato ekolanya ene: ate, Boto’omoi afusaki lisala lina bekoli bena vina, ko aosombya liho eneyali batombanyi, ko aocoa okinda elela en’onyang’omoi.

¹⁰Ko en’esike en’enukelo aotomela batombanyi boombo lacina baofe bemamo bena lisala; koko batombanyi bamofoma la mpomi, ko bamutodya bototoloto.

¹¹Ko lakina ait’otoma boombo’omoi; ko iyo bamofoma nk’osamb’oho, ko bamiilela bokotua bona nsoi mene, ko bamutodya bototoloto.

¹²Ko lakina aotoma boombo bon’asaso; koko baok’ende mpota, ko bamiitanya.

¹³Mene lisala aila, ate, Njila v’oya? nongotoma bon’onami ona nganji; yombo enen’iyo ende bangofika.

¹⁴Koko eneki batombanyi oenak’ende, baotendana, iy’ate, One nko bosangoli; mbo toyake, lacina lisango liyalame nko liniso.

¹⁵Ko bamofodya ena lisala lina bekoli bena vina, ko bamoyaka tutu. Mene lisala lina bekoli bena vina angailel’iyo bokotua’oya?

¹⁶Angoya, ko angoyaka batombanyi’aho, ko angosombya bakin’ato lisala liho lina bekoli bena vina. Ko enek’iy’ookaka yoi liho, baila, iy’ate, Yoi liho litilamake!

¹⁷Koko amalenda ta, ko aila, ate, Iya, yoi line linalitengi liyali’oya, Lufe linaliki bafaki ofengolaka, Liho limoyalama lin’oso lina likoka?

¹⁸Boto l’oto onokwela lufe liho angomunya; ohonde boto onongi lufe liho okwela, lingominyaminy’ende yoka lofucifuci.

¹⁹Ko nkanga ina toome la batengi ban’ekanda baofon’etelo oyund’ende ena heure eho; koko baang’ato; lacin’iyo baofokol’oka atendaki ekolanya ene lacin’eniyo.

²⁰Ko bamotakamela, ko baotoma baongi banafot’oka bayali bato bana mbongi, lacina baong’ende longo en’etendelo enande, lacin’eho baate etelo oyoleky’ende eneyali lifoka nko gouverneur.

²¹Ko bamufola, iy’ate, Bolaki, iso tomey’oka e otenda ko olaka nko cilili, ofatambe boto la likai, ohonde olaka mboka ena Yakomba nko la solosolo;

²²noka, enafut’iso Kaisala mpuci, yoi liho likoli yombo lifakoli?

²³Koko ende aofokola longo loniyo, ko amakutwela, ate,

²⁴Bontume franc. Ene nk’efoya l’etengelo ena nai? Iy’ate, Ena Kaisala.

²⁵Ko amasumola, ate, Bofaka Kaisala toma tona Kaisala, ko bofaka Yakomba toma tona Yakomba.

²⁶Ko batasungya yoi en’etendelo eho linaling’iy’ounda en’oso bon’ato; ko baofefa l’okotua bonoki’nd’okutolaka, ko baoyala nko mwi.

²⁷Ko Basadoke bamoi, nk’iy’anil’oka efana eetwelo en’ewedi, baoya eneyal’ende; ko bamufola,

²⁸iy’ate, Bolaki, Mose atotengelaki’ale, ate yombo botoolo’on’oto ayali l’ooli, ko aowa, ko atacik’ona, bakune’onande atambake booli’oho, lacina aotele botoolo’onande bana.

²⁹Mpame nsambo iyaaki, nko botoolo l’akune; on’oso aotamba booli, ko aowa kum’ataote’ona;

³⁰on’afe nk’osamb’oho;

³¹ko on’asaso aotamb’oyoto’oko, ko l’iyatu nsambo yok’osamb’oho, ko baowa kuma bataote’ona.

³²Ko ena mbus mene boyoto aowa nkoho.

³³Iya, en’eetwelo en’ato en’ewedi, angoyala booli’ona nai? lacin’oka iyo nsambo baotambaki yoka booli.

³⁴Yesu amakutwela, ate, Ban’ana loko lone batamb’aali, ko balekya bana ena liala;

³⁵ohonde iy’anatangama yoka bakoli lacina bayele ena liiko loho lon’esik’eho, ko l’en’eetwelo en’ewedi, bafatambe’aali, ko bafatome bana ena liala.

³⁶Iyo bafawaki lakina: bakoli la bikima bina loola nko kocu; ko bayali ban’ana Yakomba, lacin’oka bayali ban’ana eetwelo en’ewedi.

³⁷Koko ena likambo lin’eetwelo ena banawaki, Mose mene, ena bosimo bon’itete, amotum’oka baetwa, eneki’nd’otangaka Yawe, Yakomba ena Abalayama, ko la Yakomba ena Isaka, ko la Yakomba ena Yakobo.

³⁸Ende afayali Yakomba ena bawei: ayali nko Yakomba ena banayaike; lacin’oka eneyal’ende bahatu bayali yoka bayaike.

³⁹Ko batengi’amoi ban’ekanda baamba, iy’ate, Bolaki, omotenda nk’olotsi.

⁴⁰Ko batit’oyufol’ende bufo bomoi, lacin’oka baanga.

⁴¹Koko amaufola, ate, Bato bail’oka Masiya ayali bon’ona Dawidi bosamb’oya?

⁴²lacina Dawidi’mene ailaki en’okanda bona Njembo, ate, Yawe aosumola Nkolo enami, Kisase en’ili bona likasa linami y’ome,

⁴³Yengoko enengi’m’oila baokyi’owe’ane limbolongo en’ase ban’akak’ane.

⁴⁴Yok’oho Dawidi mene amotanga Nkolo: iya, ayali bon’onande bosamb’oya?

⁴⁵Ko eneki bato bahatu olofaka baoyi’ane, aosumola bakili’anande, ate,

⁴⁶Boongya lilota bokotua bon’atengi ban’ekanda; iyo balanga lacina baete l’isenda bin’itale, ko balanga beeso en’ekala bena limbongo, ko la nkici inay’oso ena basunagoga, ko la bisanga bin’oso ena bilambedya;

⁴⁷bakumola bayato bana beweli betumb’eniyo, ko baonda beondo ben’etale nko l’okotua bon’osimo. Ekwelo eneng’iy’okwa linga likambo engoleka nko ndeka.