Read ngando Luka 21 Bible Online

Luka 21 - ngando bible

Luka 21

¹Ko Yesu aenol’aiso, ko aena bato, nko batuki bana toma, bayafuse nganji iniyo en’emonyedyo ena nganji.

²Ko aena boyoto ona boweli nkoho, ona biinda mene, onila tokakota tofe meho.

³Ko aila, ate, Solosolo, lakosumol’ino, boweli’one ona biinda amolisa nganji eneleki nganji in’iyatu;

⁴lacin’oka bane bahatu bamolekya nganji nk’ena lituka liniyo bike; ohonde boyoto’one nk’ena biinda bonande, amolisa lituka linande lihalitu.

⁵Ko eneki bato’amoi otendaka lacin’ena botumba bona Yakomba, bokotua bonoki boho okombyamaka la bokombe bona baufe banaseki’okoka ko la nganji in’oeka, ende aila, ate,

⁶Noka, bikambwa bine binalend’ino, bina bengoya benefacikalaki lufe limoi ntalama ena liko lina lufe likina linalifafusamaki en’ase.

⁷Ko iyo bamufola, iy’ate, Bolaki, baoyi’ako bangilama en’esik’eya? ko ndembi lacina baoyi’ane baolama yenya eka nai?

⁸Ko ate, Bolendaka, botokungyama; lacina bato bike bangoya ena lina linami, ko bangila, Mbo emi nk’ende; ko, Esike emololama. Botakilake bato’aho.

⁹Ko eneng’in’ooka besimo ben’ita ko l’itomoko bin’okolo, botokake losomo: ekoli lacina baoyi’ane bailam’oso, koko esimbelo etay’isanga.

¹⁰Ko amalokwela, ate, Bonyanga bongokana l’onyanga, ko lifoka la lifoka;

¹¹bililelo bina loko bingata, ko njoci ina njala l’ina nkangi ingoya en’ekala bemoi; bikambwa bina losomo la ndembi iney’okolo ingenya ena loola.

¹²Ohonde en’oso bon’aoyi’ane bahatu, bangokound’ino, ko bangokonyom’ino, ko bangokoleky’ino eneyali besolongano bena basunagoga ko l’en’etumba ben’enyolo, ko bangokotol’ino en’oso bona bafoka bana rois ko la gouverneurs lacin’ena lina linami.

¹³Baoyi’ane bangoyala eneyal’ino yoka ndembi.

¹⁴Lacin’eho, bokitsa betem’enino en’ase, lacina bofakandakanda en’oso bokotua bonong’in’okutola;

¹⁵emamene nongokof’ino bonyua ko la bomwu, ko baokyi’owe’anino bahatu bafinyaki likutola ko bafinyaki yatsa boho ntango.

¹⁶Ohonde bafango la banyango’anino, l’iy’anotwa l’ino, la bemboi, la bifili, bangokoleky’ino, ko bangoyaka bamoi’anino tu.

¹⁷Ko ino bongokama bowe l’ato bahatu lacin’ena lina linami.

¹⁸Ko bese bomoko bona lifo lin’ete’enino bofehyamaki tu.

¹⁹Bongata belimo’enino la mbitedya enino.

²⁰Koko eneng’in’oena Yelusalema nko nsambana la beloi bena soldats, nkwaho bongey’oka eehedyo enande emololama.

²¹Nkwaho iy’anayali ena Yudea balotake en’angonji; ko banayali ena ntundulu enande baume meho; ko iyo banayali en’enyanga batatuake meho.

²²Lacin’oka bin’ene beyali nko bina bena mbutodya ena nkele, lacin’eho baoyi bahatu banatengama bailame.

²³Bino eneyal’iy’anayali la baemi, ko l’eneyali beale en’in’eho; lacin’oka bino mene bin’okolo bingenya ena loko, ko nkele eneyali bato’ane.

²⁴Ko iyo bangokwa nko la lokula lon’ita, ko bangotolama basungu en’enyanga behetu; ko Befanda bangikamela Yelusalema, yengoko kuma bisike bina Befenda biokoka.

²⁵Ko ndembi ingenya ina bina, l’ena ngondo, l’ena tooto; ko ena loko baoyi bana bino en’enyanga behetu; bato bangotatana lacin’en elilelo en’asi la bafukumo bana lose l’okwa.

²⁶Bato bangotenya la losomo, ko la mbanga enalengedy’iyo baoyi’ane banayayi ena loko; lacina bikambwa bina loola bina locili bingolidyama.

²⁷Nkwaho bangena Bon’on’oto aoya ena lilo la mpamba la bokoka mene.

²⁸Koko enengi baoyi’ane omatsa yilama, bolenda ena liko, ko benol’ete’enino; lacina eikwelo enino eolama.

²⁹Ko amasumola ekolanya, ate, Bolenda, bote bona liteli, la bete behetu:

³⁰enamela beho tokasekase, inoamene bena, ko bey’oka esike ena biane emololama.

³¹Nk’osamb’oho, enen’ino baoyi’ane bayilame, bey’oka lifoka lina Yakomba yoolama.

³²Solosolo, lakosumol’ino, eotwelo ene efumaki yengoko kuma baoyi bahatu bailama.

³³Loola la loko banguma; koko bioyi’anami bafumaki tu.

³⁴Boyolendak’inoamene, lacina betem’enino betoyehyama lacin’ena liota lina toma linalileki bike, la ndangwa l’aana, ko la bekaokando bena loko lone, ko bin’oho botokosaimodya;

³⁵lacin’oka bin’oho bongokwela bato bahatu banatonga ena loko lohalotu, nko yok’efunwelo ena biinga.

³⁶Koko botombanyaka ena bisike bihitu, ko boondaka beondo, lacin’eho bokolane l’elotelo en’aoyi’ane bahatu banangilama linga, ko boate emaelo en’oso bona Bon’on’oto.

³⁷Ko bina l’ina aolak’ato en’otumba bona Yakomba l’ane; koko boco l’oco aofola, ko aocoa oyetama ena lingonji linalitangama Bilaya.

³⁸Ko bato bahatu baoya eneyal’ende l’okulu mene en’otumba bona Yakomba lacina balofe baoyi’anande.