Read ngando Luka 22 Bible Online

Luka 22 - ngando bible

Luka 22

¹Koko elambedya ena mampa enefana nyango, enetangama elambedya en’Etelo, eolamaki.

²Ko nkanga ina toome l’atengi ban’ekanda baofon’etelo lacina baoyake; lacin’oka baangaki bato.

³Koko Satana aotua eneyali Yudasa (onotangama ona Keliota), onoyaaki en’oloi bona jo l’afe.

⁴Ko aocoa oyesola la nkanga ina toome ko la capitaines ina soldats, bokotua bonongi’nd’olekya Yesu eneyal’iyo.

⁵Iyo baonyangela, ko bamoteela lisangya oka bangofuta francs.

⁶Ko aimedya; ko aofon’etelo oleky’ende eneyal’iyo en’esike enefan’ato meho.

⁷Ko bina bona mampa enefana nyango boya, nko bina bonayak’iyo mpate en’elambedya en’Etelo.

⁸Ko Yesu aotoma Petelo la Yoane, ate, Bocoaka, botokoedya elambedya en’Etelo, tole.

⁹Ko bamufola, iy’ate, Olanga tokodya meya?

¹⁰Amasumola, ate, Lenda, eneng’in’otua en’onyanga, bongukana l’oto onoyatole ekucu en’asi; bokile en’otumba bonongi’nd’otua.

¹¹Ko bosumola mene’otumba, Mbo Bolaki ate, Etenyi en’efenda eneng’emi l’akili’anami ola elambedya en’Etelo eyali meya?

¹²Ko ende angokotum’ino etenyi emoi ena nkolo ena liko, emosila litandama; bokodya elambedya nko meho.

¹³Ko iyo baocoa, ko baosungya nk’eyok’onoki’nd’oasumolaka; ko baokodya elambedya en’Etelo.

¹⁴Ko eneki esike oyelaka, aokisase ena mesa, ende l’akili jo l’afe.

¹⁵Ko amalokwela, ate, Emi ndangaki la mposa mene lacina nde elambedya ene en’Etelo, emi l’ino, kuma ntene bino binami;

¹⁶lacin’oka lakosumol’ino, Mpit’ola eho lakina, yengoko kum’eho eakolana ena lifoka lina Yakomba.

¹⁷Ko aotamba ekala, aokanga Yakomba lokango, ko amasumola, ate, Botamba ekal’ene, ko bokafa eneyal’inoamene;

¹⁸lacin’oka emi lakosumol’ino, Mpit’omela lakina basi ban’emamo ben’ekoli bena vina, yengoko kuma lifoka lina Yakomba yoya.

¹⁹Ko aotamba mampa, ko aokanga Yakomba lokango, aokes’eho, ko amafa, ate, Ene nko yonge linami lineyofama lacin’enino: bilaka yoi line ena liofwa linami.

²⁰Nk’osamb’oho, ena mbusa ena toma ndaka, aotamb’ekala, ate, Ekal’ene nko lisangya lina litoto lin’akil’anami, banutelama lacin’enino.

²¹Koko lenda, likasa linande ononjangela liyali l’emi ena mesa.

²²Koko Bon’on’oto ayacu, solosolo, yok’onoki yoi oangamaka eango; ohonde bino eneyali boto’oho onomoangela.

²³Ko baomatsa yufolana boto’oniyo onosokoila yoi line.

²⁴Ko baatana ntango lacin’ena boto’oniyo onongotangama yok’iyome.

²⁵Ko amasumola, ate, Bafoka bana Befenda batumanya bato’aniyo; ko bato’aniyo banayali ena lifoka baotangama Bamene’isei.

²⁶Ohonde ino bofayali yok’oho: ende onoyali yok’iyome eneyali ino ayalamake yok’akune; ko onoyali en’oso, ayalamake yoka bosali.

²⁷Onoleki oka nai, yomb’ende onokisase ena mesa ena toma, yomb’ende onosala mesa? Ef’ende onokisase ena mesa? Ohonde emi njali ena ntoto enino yoka bosali.

²⁸Koko ino boyali nk’anayaaki l’emi ena mmeko inami;

²⁹ko lakof’ino lifoka, nk’eyok’onoki Bafango’onami ompak’emi lifoka,

³⁰lacin’eho bole ko bomele ena mesa enami ena lifoka linami; ko bongokisase ena toeko tona bafoka, ko bongotend’akambo bana beloi bena Yisalaele jo l’efe.

³¹Koko ate, Simona, Simona, Satana alombaki etelo nko ndomba mene lacina akoate, akofifedya yoka bopunga;

³²koko nkoondelaki, otongoyind’imeedyo; ko e, eneng’ohelengwa lakina, kikya bifili bine.

³³Ate, Nkolo, nkoli lacina ncu emi l’e l’en’otumba bon’enyolo l’en’ewedi mene.

³⁴Amosumola, ate, Petelo, lakosumol’e, nkoko ena mpame efekaki bon’in’one, yengoko kum’e oangan’oka onjey’emi beangana besaso.

³⁵Ko amaufola, ate, Eneki’m’okotomak’ino, efana bofalusi, efana ntombe ena francs, efana tombwaku, ino bindaki nde iyema imoko? Iy’ate, Efan’iyema.

³⁶Nkwaho amasumola, ate, Nd’esik’ene, ende onoyali la ntombe ena francs aambol’eho, ko la bofalusi nk’osamb’oho; ko onofana lokula lon’ita, atekyake esenda enande, ko asombe lokula.

³⁷Lacin’emi lakosumol’ino, yoi line linalitengi lingilama eneyal’emi, noka, Ende aalamaki l’ato banafunzafunza beeka; lacina baoyi’ane banatengamaki lacin’enami bayali l’esimbelo nk’isanga.

³⁸Iy’ate, Nkolo, ndaka nkula in’ita ife. Ate, Ikoli.

³⁹Ko aofola, ko aocoa, yok’onoki bokotu’onande oyalaka, ena lingonji lina Bilaya; ko bakili’anande bamokiela.

⁴⁰Ko eneki’nd’oyelaka en’esang’eho, amasumola, ate, Boondaka, botoyatua ena lomeko.

⁴¹Ko ende aalana l’iyo isisali, yoka bofusa bona lufe bomoko, ko aun’aongo, ko aoonda,

⁴²ate, Bafango, nk’osokoimedya, umola ekal’ene eneyal’emi; ohonde efa eango enami: eango ene eilamake.

⁴³Ko ekima ena loola eenya eneyal’ende, amokikya.

⁴⁴Ko ayaaki la bino bin’efafo mene, ko aonda nko mbonda mene; ko elungu enande eoyalama nk’eyoka bapopo ban’akolo ban’akila banakwa ena loko.

⁴⁵Koko eneki’nd’okadyaka yonda, ko aemala, aoya eneyali bakili, ko amasungya kuma baeci la lokeseli,

⁴⁶ko amasumola, ate, Betama lacina nai? Bemalaka, boondaka, botongoyatua ena lomeko.

⁴⁷Nk’enem’end’otenda, lenda, bik’ike bon’ato baoya, ko ende onotangama Yudasa, omoi ona ba-jo l’afe, ayete en’oso’oniyo; ko aolamela Yesu oyoleya bolumba.

⁴⁸Koko Yesu amosumola, ate, Yudasa, oangela nde Bon’on’oto nko la bolumba?

⁴⁹Ko enek’iyo banoli l’ende oenaka yoi linalingilama, baila, iy’ate, Nkolo, tokake bamoi la lokula?

⁵⁰Ko omoi’oniyo aoka boombo’ona nkanga iyome, ko aokesa litoi linande y’ome nko pa.

⁵¹Koko Yesu aamba, ate, Boacike. Ko aosuka litoi linande, ko amiikya.

⁵²Ko Yesu aosumola iy’anayaki eneyal’ende oyuunda, nko nkanga ina toome, la chefs ina botumba bona Yakomba, la bingambe, ate, Ino bomofola nde la nkula in’ita ko l’embele yoka bato banangund’oto’ona liya?

⁵³Eneki’m’oyalaka l’ino bina l’ina en’otumba bona Yakomba, botambunda l’akasa; ohonde heure ene eyali nk’enino, ko la locili lona liucu.

⁵⁴Koko bamuunda, ko bamotola en’otumba bona nkanga iyome. Koko Petelo amokila en’osana.

⁵⁵Eneki bato’amoi ofetsaka nkoi ena mbalasai, ko baokisase meho, Petelo aokisase ena ntoto eniyo.

⁵⁶Ko enem’end’okisase ena fololo ena nkoi, bosali’omoi on’oyoto ameena, ko amolenda ta, ko aila, ate, Boto’one ayaaki l’ende nkoho.

⁵⁷Koko ende aangana, ate, Boyoto, mpeey’ende.

⁵⁸Ko efan’olingolingo boto’okina ameena, ko aila, Mbo e nkoho ond’omoi’oniyo. Koko Petelo, ate, Boto, efana: mpayali’oko.

⁵⁹Ko eneki heure emoko osilaka, boto’omoi aokikya yoi liho la locili, ate, Solosolo, boto’one ayaaki nko l’ende, lacin’oka and’ise Ngalilaya.

⁶⁰Ko Petelo aila, ate, Boto, mpeya yoi linatend’e. Nkwaho, nk’enem’end’otenda, nkoko ena mpame eeka.

⁶¹Ko Nkolo aohelengwa, ko aolenda Petelo. Ko Petelo aokanedya yoi lina Nkolo, bokotua bonoki’nd’osumolaka, ate, Kuma nkoko ena mpame eteke bon’in’one, ongonjangana beangana besaso.

⁶²Ko aofola, ko aolela lilelo mene lina mposoli.

⁶³Koko bato banasukaki Yesu bamonyeela, ko bamofoma mpomi;

⁶⁴bamokundela baiso’anande, ko bamofoma en’elongi ko bamufola, Mbo otosumole: onokofomaka?

⁶⁵Ko bamotendela baoyi bamoi bike bana nsoi mene.

⁶⁶Eneki bina okyaka, likita lina bingambe bin’ato la nkanga ina toome l’atengi ban’ekanda baosolongana; ko baoya l’ende en’osolongano’oniyo, bamufola,

⁶⁷iy’ate, Nk’oyali Masiya, otosumole. Ohonde amasumola, ate, Kang’emi lakosumol’ino, bofimedyaki;

⁶⁸ko yombo lakufol’ino, bofaambaki.

⁶⁹Koko isanga Bon’on’oto angokisase en’ili bona likasa y’ome lina mpamba lina Yakomba.

⁷⁰Ko iyatu baila, Mbo e, onde Bon’ona Yakomba? Ende amakutwela, ate, Nk’oko bonatend’ino, njali nk’ende.

⁷¹Ko baila, iy’ate, Tokemb’ekina temoin lacina nai? isoamene tomoka nk’en’onyua bonandamene.