Read ngando Luka 24 Bible Online

Luka 24 - ngando bible

Luka 24

¹Koko en’ina bon’oso bon’eyenga, nko la mbia, baoya ena nketa, baoya la toumba tatok’iy’okodyaka.

²Ko baosungy’oka lufe limuma ena nketa nko la nkilimodya.

³Baotua, koko batasungya boduo bona Nkolo Yesu.

⁴Koko enek’iy’okandakandaka la yoi line, lenda, mpame ife baemala mbolimboli l’iyo la bisenda bina teele.

⁵Bayato baoka losomo mene, ko baosunya bete’eniyo ena loko, koko mpame ih’ife bamalokwela, iy’ate, Bofon’ende onoyaike ena ntoto eniy’anawaki lacina nai?

⁶Afayali mendo: amoletwa en’ewedi; bofwaka bokotua bonoki’nd’okosumolak’ino kum’ayali ena Ngalilaya,

⁷ate, Akoli eneyali Bon’on’oto lacina alekyame en’akasa ban’ato’owe, ko ayakame en’ekulusu, ko aetwa en’ewedi en’ina bon’esaso.

⁸Ko baofwa baoyi’anande,

⁹baocika nketa, bauta la mbusa, ko baosumola ba-jo l’omoko ko l’ato bahatu banayaaki meho baoyi’ane bahatu.

¹⁰Banasumolaki bikima baoyi’ane nko Malia Mangandala, la Yoana, la Malia nyango ena Yakobo, l’ayato’amoi banayaaki l’iyo.

¹¹Koko baoyi banak’iy’otendaka baokana eneyali bikima yoka botendatenda kei, ko iyo batimedya tu.

¹²Koko Petelo aemala, ko aocoa la laango ena nketa; ko eneki’nd’osunamaka, aena bisenda bina mbenza biambi meho nko biho kei; ko aocoa en’ol’onande, ko aofefa la yoi linilamaki.

¹³Ko lenda, bamoi’aniyo bafe baocoa bin’oho en’onyanga bonotangama Emao, bonoyaaki bosana la Yelusalema yoka kilometres jo l’ife.

¹⁴Ko baesola lacin’en’aoyi bahatu banilamaki.

¹⁵Koko enem’iy’oesola ko baotendana baoyi, Yesu mene aolama, ko aambana l’iyo.

¹⁶Koko baiso’aniyo baosukama, batongoyey’ende.

¹⁷Ko amaufola, ate, Baoyi’ane banesol’ino eneyakend’ino ko boyoke lokeseli baka nai?

¹⁸Ko omoi’oniyo, lina linande Keleopa, amokutwela, ate, E kei kongokisase yok ofenda ena Yelusalema, ko ofeya baoyi banilamaka meho en’ina bene?

¹⁹Ate, Baoyi baka nai? Ko ende aila, ate, Baoyi bana Yesu bise Nazaleta, onoyalamaki bosumoli ona locili l’en’i’kambwa l’ena yoi en’oso bona Yakomba l’en’oso bo’n’ato bahatu;

²⁰ko l’okotua bonoki nkanga ina toome la bafok’aniso olekyak’ende lacina atomame en’ewedi ko baoyakaki en’ekulusu.

²¹Koko iso tolengedyaki’oka angoyala nk’ende onongotungola Yisalaele. O koko bin’one nko bina bon’esaso ena mbusa enek baoyi’ane oilamaka.

²²Koko yoi limoi, noka, bayato’amoi ban’oloi’oniso baotokaimodya:

²³baocoa ens nketa l’ikulukulu mene, koko batena boduo’onande, ko baoy’otosumol’oka bamen’enelo ena bikima bina loola banasumolaki, iy’ate, Ende ayaike.

²⁴Ko bamo: banayaaki l’iso baocoa ena nketa, ko baosungya nk’eyok’onoki bayato otendaka; ohonde bateen’endamene

²⁵Ko amasumola, ate, O bato baninda lokanyi, la betema beneseki lokuta ena likambo lina njimedya en’aoyi bahatu banaki basumoli otendaka!

²⁶Iya etakolana nde la Masiya aene bino l’aoyi’ane ko atua ena bokonde bonande?

²⁷Ko aomatsa la Mose ke l’asumoli bahatu, ko amasakitwela baoyi banatengamaki ena bitengelo bina Yakomba bihitu lacin’enande

²⁸Ko baolama l’onyanga bonok’iy’ocoaka; ko ende aila yoka angofolanya.

²⁹Koko iyo bamosimbya, iy’ate, Yala l’iso, lacina esike ena likolo emoyela, ko bin’omila. Ko aotua okisase l’iyo.

³⁰Koko enem’end’okisase l’iyo ena mesa ena toma, aotamba mampa ko aosak’osako, ko aokesa eho ko amafa.

³¹Ko baiso’aniyo baolifwa ko bameeya; koko auma eneyal’iyo nko nsiela.

³²Ko baotendana, iy’ate, Betem’eniso betafeta nde ena ntundulu eniso yoka nkoi, eneki’nd’otendaka l’iso ena mboka, ko eneki’nd’otoumbwelaka bitengelo bina Yakomba?

³³Ko baemala nkwaho ena heure eho, ko bautwa la mbusa ena Yelusalema, ko baosungya ba-jo l’omoko l’amoi banayaaki l’iyo basolonganyi;

³⁴iy’ate, Nkolo amoletwa nko solosolo, ko amenya eneyali Simona.

³⁵Koko iyo bamasumol’aoyi banilamaki ena mboka, ko l’okotua bonoki’nd’oeyanaka l’iyo en’ekeselo ena mampa.

³⁶Nk’enem’iy’otenda baoyi’ane, Yesu mene aemala ena ntoto eniyo, amasumola, ate, Mwi eneyal’ino.

³⁷Koko iyo baokaimwa, ko baoka losomo, ko baokanel’oka bamena lifoi.

³⁸Ko amasumola, ate, Ino bokandakanda, ko betem’enino beyali la bekalokalo lacina nai?

³⁹Benaka bakas’anami l’akak’anami, one nk’emamene; bommete, ko bena, lacin’oka lifoi afana bonufo la biuha, yoka bosamb’on’en’ino oka emi laata.

⁴⁰Ko eneki’nd’otendaka yoi line, amatuma bakasa l’akaka.

⁴¹Ko enetimedy’iyo isanga lacin’en’ekiko, ko baofefa, amaufola, ate, Boyali nde l’iyema ina ndaka mendo?

⁴²Ko bamofa etenyi ena nse enokangamaka.

⁴³Aotamba, ko aola en’oso’oniyo.

⁴⁴Ko amasumola, ate, Bane nko baoyi’anami banaki’m’okosumolak’ino kuma njali l’ino, eneki’m’oilak’oka ekoli lacina baoyi bahatu banatengi en’asangya bana Mose, l’en’asumoli, l’ena Njembo, lacin’enami, bailame.

⁴⁵Nkwaho aofoladya lokanyi loniyo lacina banonganya bitengelo bina Yakomba;

⁴⁶ko amasumola, ate, Yoi litengamaki yok’one, noka, Masiya angen’ino, ko angetwa lakina en’ewedi en’ina bon’esaso;

⁴⁷ko bosimo bona njosuma la ntungola en’ato en’aoyi’owe bosekodyamake ena lina linande ena benyanga behetu, mmatsa nk’ena Yelusalema.

⁴⁸Ino boyali temoins ina baoyi’ane.

⁴⁹Ko lenda, nongokotomel’ino esemba ena Bafango’onami; ohonde ino boyalamaka en’onyanga bona Yelusalema, yengoko eneng’in’olotsama la mpamba enengoya ena liko.

⁵⁰Ko amatola ena mbiolo, nk’ena mbolimboli la Betania; ko ailedya bakas’anande ko amasakela bosako.

⁵¹Koko, enem’end’oasakel’osako, aalana l’iyo, ko aotolama ena loola.

⁵²Iyo bamokumya, ko bauta la mbusa ena Yelusalema l’ekiko mene.

⁵³Ko baoyalama en’otumba bona Yakomba bina l’ina, bayakumya nko Yakomba.