Read ngando Luka 3 Bible Online

Luka 3 - ngando bible

Luka 3

¹Ena mbula ena jo l’itano ena lifoka lina Tibelia Kaisala, kuma Pontio Pilato ayali gouverneur ena Yudea, ko Elode vice-gouverneur ena Ngalilaya, ko Filipo, bakune’onande, vice-gouverneur ena Itulaya l’ena Tulakoniti, ko Lusania vice-gouverneur ena Abilene,

²kuma Ana la Kayafa bayali nkanga ina toome menenk’ena mbula eho yoi lina Yakomba yoya eneyali Yoane, bon’ona Zekelaya, ena sengelenge.

³Ko ende aocoa en’enyanga behetu benoli la Yoladane, ayalake lilako lin’inelo ena njokanya lacin’en’etungwelo en’aoyi’owe;

⁴yok’onoki yoi otengamaka en’okanda bon’aoyi bana Yesaya bosumoli, Efodya en’oto’omoi onololua ena sengelenge, ate, Boongya mboka ena Yawe, Bonanola mboka inande.

⁵Befoku behetu bengosakedyama, Ko bangonji bahatu la bekonji behetu bangokitsama, Ko bakoto bangonanwa cilili, Ko mboka ina batuku’atuku ingoyala nko tandala;

⁶Ko bato bahatu bangena liiko lona Yakomba.

⁷Ko aosumola bik’ike bon’ato banacoaki oyinama l’ende, ate, Ino ban’ana njua! onokolakak’ino lacin’eho bolote nkele enengoya oka nai?

⁸Bootaka bemamo benekoli la eumbelo en’aoyi’owe; ko botamatsake yila en’etem’enino, Mbo toyali l’afango’oniso oka Abalayama; lacin’emi lakosumol’ino, Yakomba akolana yemadya ban’ana Abalayama nko la baufe bane.

⁹Isanga liswa limilama en’iulu bin’ete; lacin’eho, bote l’ote bonofote bemamo ben’olotsi bokotama, ko bookama ena nkoi.

¹⁰Ko bato’aho bik’ike bamufola, Mbo iso tongil’oya?

¹¹Ko amakutwela, ate, Ende onoyali l’eketo befe, af’ende onofaate; ko ende onoyali la toma tona ndaka, aile nk’osamb’oho.

¹²Ko basusanyi bana mpuci baoya oyinama nkoho; ko iyo bamufola, iy’ate, Bolaki, iso tongil’oya?

¹³Ko amasumola, ate, Takumolake bato mpuci eneleki eho enek’in’okoedyamaka.

¹⁴Ko soldats bamufola nkoho, iy’ate, Iso fo, tongil’oya? Ko amasumola, ate, Botenyake bato bino, ko botafotake bato, ko botapomake mpuci inino bopomo.

¹⁵Ko eneki bato olengedyaka, ko baokandakanda ena betem’eniyo lacin’ena Yoane, yombo ayali Masiya,

¹⁶Yoane mene amasumol’iyatu, ate, Solosolo, emi lakin’ino en’asi; ohonde onondek’emi la locili ayayi; ko emi mpakolana lacina nditole nko le bekoli bena sapata inande: Ende angokin’ino ena Bolimo bon’olotsi l’ena nkoi.

¹⁷Ifofo inande iyali ena likasa linande, ko angosukola botumba bonafof’ende bopunga nko nsukola mene; ko angosusanya bepunga en’otumb’onande bon’emonyedyo; koko angotumba mposo ena nkoi inifalimale tu.

¹⁸Koko aosumol’ato bosimo bon’olotsi l’aoyi’ane koko la balako’amoi bike.

¹⁹Koko eneki Elode, nko vice-gouverneur, ofelamaka l’ende lacin’ena Elodia, booli bon’akune’onande, ko lacin’ena baoyi bahatu ban’owe banaki Elode okambaka,

²⁰Elode aokokya yoi limoi ena liko lin’aoyi’aho bahatu, eneki’nd’okombaka Yoane en’otumba bon’enyolo.

²¹Eneki bato bahatu oinamaka, Yesu ainama nkoho; koko enem’end’oonda, loola lokombwa,

²²ko Bolimo bon’olotsi bokita eneyal’ende l’okotua bona yonge yok’ekoso, ko lofoso lookana ena loola, ate, E onde Bon’onami ona nganji onoinbatel’emi enyanga.

²³Eneki Yesu mene omatsaka ekambwa enande, mbula inande iyaaki yoka ntuku isaso, ko ayaaki (yok’onok’iy’okanelaka) bon’ona Yosefa, bon’ona Eli,

²⁴bon’ona Matata, bon’ona Lewi, bon’ona Meleki, bon’ona Yanai, bon’ona Yosefa,

²⁵bon’ona Matatia, bon’ona Amosa, bon’ona Nauma, bon’ona Elesi, bon ona Nanga,

²⁶bon’ona Mata, bon’ona Matatia, bon’ona Simi, bon’ona Yoseke, bon’ona Yoda,

²⁷bon’ona Yoana, bon’ona Lesa, bon’ona Zelubabela, bon’ona Salatiele, bon’ona Neli,

²⁸bon’ona Meleki, bon’ona Adi, bon’ona Kosama, bon’ona Elamadama, bon’ona Ele,

²⁹bon’ona Yose, bon’ona Eliezala, bon’ona Yolima, bon’ona Matata, bon’ona Lewi,

³⁰bon’ona Simona, bon’ona Yudasa, bon’ona Yosefa, bon’ona Yonama, bon’ona Eliyakima,

³¹bon’ona Melea, bon’ona Mena, bon’ona Matata, bon’ona Natana, bon’ona Dawidi,

³²bon’ona Yisai, bon’ona Obede, bon’ona Boaza, bon’ona Salamona, bon’ona Nasona,

³³bon’ona Aminadamba, bon’ona Aluni, bon’ona Eselone, bon’ona Pelese, bon’ona Yuda,

³⁴bon’ona Yakobo, bon’ona Isaka, bon’ona Abalayama, bon’ona Tela, bon’ona Naola,

³⁵bon’ona Selunga, bon’ona Lu, bon’ona Pelenge, bon’ona Ebele, bon’ona Sela,

³⁶bon’ona Kenana, bon’ona Alufakasada, bon’ona Seme, bon’ona Noa, bon’ona Lemeke,

³⁷bon’ona Metusela, bon’ona Anoka, bon’ona Yelede, bon’ona Malalele, bon’o na Kenana,

³⁸bon’ona Enosa, bon’ona Sete, bon’ona Adama, bon’ona Yakomba.