Read ngando Luka 4 Bible Online

Luka 4 - ngando bible

Luka 4

¹Ko Yesu aolola la Bolimo bon’olotsi, ko auta ena Yoladane, ko aotolama l’olimo ena sengelenge,

²ko aomekama la Satana bekolo ntuk’inei. Ko ena bina beho ende atal’iyema tu; ko eneki bin’eho okalaka, aoka njala.

³Koko Satana amolokwela, ate, Yomb’oyali Bon’ona Yakomba, sumola lufe line lihalingwa nko mampa

⁴Ko Yesu amokutwela, ate, Yoi limotengama, Boto afaike la mampa kei.

⁵Ko Satana amotola ena lingonji lina litale, ko amotuma bafoka bahatu bana loko lohalotu nkwaho.

⁶Ko Satana amosumoia, ate, Emi nongokofa lifoka line lihalitu, ko la lokumo lona bafok’aho; lacin’oka lifoka liho limompam’emi, ko emi lafa boto onalang’emi njofe.

⁷Koko e, nk’ombosamel’emi, lifoka line lihalitu lingoyala nko line.

⁸Koko Yesu amokutwela, ate, Yoi limotengama, Kumya Yawe Yakomba ene, ko okambele nk’ende kei.

⁹Ko amotola ena Yelusalema, ko amilia ena liko lina botumba bona Yakomba, nk’ena nsoli; ko amosumola, ate, Yomb’oyali Bon’ona Yakomba, oyofus’eamene mendo en’ase;

¹⁰lacina yoi limotengama, Ende angotoma bikima binande bina loola, lacina bakomonya;

¹¹koko Bangokotola en’akas’aniyo, Likaka line litongofomana la lufe.

¹²Koko Yesu amokutwela, ate, Yoi limotengama, Tamekake Yawe Yakomba ene.

¹³Ko eneki Satana okadyaka nsinganya ihatu, auma eneyal’ende yengoko esike emoi.

¹⁴Koko Yesu autwa ena Ngalilaya la locili lona Bolimo; ko lokumo lonande lolinda en’enyanga beho behetu.

¹⁵Ko aolaka ena basunagoga baniyo, ko aokumyama l’iyatu.

¹⁶Ko aoya ena Nazaleta, nk’onyanga bonok’iy’oololaka; ko en’ina bopa Sabata aotua ena sunagoga, yok’onoki bokotu’onande oyalaka, ko aemala oyand’okanda.

¹⁷Ko bamosukya bokanda bona Yesaya, bosumoli; ko eneki’nd’oumbolaka bokanda, aena edye enetengama baoyi’ane:

¹⁸Bolimo bona Yawe boyali eneyal’emi, Lacin’oka amonjokya bauta lacina nsekodya bosimo bon’olotsi eneyali bato beinda; Amontoma lacina nsekodya bosimo bon’etungwelo eneyali basungu, Ko l’enelo eneyali banodyaki’aiso, Ko ntungole iy’anenyama bino;

¹⁹Ko nsekodya bosimo bon’esike enetangam’olotsi la Yawe.

²⁰Ko eneki’nd’oumbak’okanda, autodya boho eneyali bosali, ko aokisase. Ko bato bahatu banayaaki ena sunagoga bamolenda l’aiso ta:

²¹Ko aomatsa yasumola, ate, Bon’in’one etengelo ene emilama en’atoi’anino.

²²Ko iyatu bamolofamela; ko baofefa la baoyi ban’isei banofolaka en’onyu’onande; ko baila, Mbo one afayali nde bon’ona Yosefa?

²³Koko amalokwela, ate, Solosolo, ino bongonjila lisai line, Mpanji en’enganga, oyoiky’eamene: baoyi’aho banak’is’ookaka iy’ate bami lama ena Kapalanauma ilaka baho nko mendo ena bonyang’oneamene nk’osamb’oho.

²⁴Ko ate, Solosolo, lakosumol’ino, bosumoli afakumyama en’onyang’onandamene;

²⁵ko solosolo lakosumol’ino, bayato ban’eweli bayaaki bike ena Yisalaele, en’esike ena Eliya, eneki loola okombamaka mbula isaso la nsenza botoa, eneki loci lona njala okwelaka bonyanga bohotu;

²⁶ohonde Eliya atatomama eneyali omoi’oniyo: atomamaki nk’ena Salepata, en’onyanga bona Sidona, eneyali boyoto’omoi onoyaaki boweli.

²⁷Ko bato ban’ekenge bayaaki bike ena Yisalaele en’esike ena Elisa, bosumoli; koko efan’omoko’oniyo onokulwaki: onokulwaki nko Namana ona Sulia kei.

²⁸Ko bato bahatu banayaaki ena sunagoga baolola la nkele enek’iy’ookaka baoyi’ane;

²⁹ko baemala, ko bamofodya ena mbiolo ena bonyanga, ko bamotola ena nsoli ena lingonji linaliki bonyang’oniyo ofakamaka, lacina baofuse en’ase nko nkilimodya la nkele.

³⁰Koko ende aofolanya ena ntoto eniyo, ko aocoa.

³¹Ko aokita ena Kapalanauma, ecimo emoi ena Ngalilaya, ko aolak’ato meho en’ina bona Sabata.

³²Ko iyo baofefa la lilako linande, lacin’oka yoi linande liyaaki la mpamba.

³³Ko boto’omoi ayaaki ena sunagoga, onoyaaki la lifoi lina nsefo; ko aololua la lofoso lona lokolo,

³⁴ate, Cika! Iso l’e, Yesu ona Nazaleta, tond’oya? Oyaki oyoteehya. Emi mokoey’e, onde On’oeka ona Yakomba.

³⁵Ko Yesu amofela lofeli, ate, Cika lofoso, ko fola eneyal’ende! Ko eneki demona osokodyaka ena ntoto eniyo, aofola eneyal’ende, ko atilel’ende yoi.

³⁶Ko losomo lomakwela nk’iyatu, ko baufolana, iy’ate, Yoi line lind’oya? lacin’ende aosumola bafoi bana nsefo la lifoka ko la locili, ko baofola.

³⁷Ko lokumo lonande lolinda en’enyang’eho behetu.

³⁸Ko aofola ena sunagoga, ko aotua en’otumba bona Simona. Nyango en’ooli bona Simona ayaaki la nkangi en’efefe mene; ko baonda Yesu lacin’enande.

³⁹Ko Yesu aemala eneyal’ende nko mbolama, ko aofela nkangi, ko eho emocika; ko isasanga aetwa, ko amakambela.

⁴⁰Ko en’esike en’ilelo ena bina, iyatu banayaaki la bato bana nkangi ina bekotua l’ekotua, baoya l’iyo eneyal’ende; ko aotadya bakas’anande eneyali boto l’oto’oniyo, ko amaikya.

⁴¹Ko bademona baofola eneyali bato bike, kuma bayalolua, iy’ate, E onde Bon’ona Yakomba. Ko amafekya, atalanga batende tu, lacin’oka iyo baeyaki ende ayali Masiya.

⁴²Ko eneki bina okyaka, aofola, ko aocoa en’okala bona sengelenge; ko bik’ike bon’ato bamofona, ko baoya eneyal’ende, ko basokolanga baounde, atongoyuma eneyal’iyo.

⁴³Ohonde amasumola, ate, Akoli eneyal’emi nsekodya bosimo bon’olotsi bona lifoka lina Yakomba en’enyang’ekina nkoho, lacin’oka ncina eneki’m’otomamaka nd’eho.

⁴⁴Ko aokusa lisumol’ato bosimo ena basunagoga bana Ngalilaya.