Read ngando Luka 5 Bible Online

Luka 5 - ngando bible

Luka 5

¹Koko eneki bik’ike bon’ato ocindanaka l’ende lacina balofe yoi lina Yakomba, ende aemala en’oseleka bona yembo lina Ngenesaleta;

²ko aena biatu bife bisemi en’oseleka bona yembo; koko bakembi bana nse bamosila yuma ena biatu, ko bayakule basangi’aniyo.

³Ko ende aoyookela en’atu’omoi bona bih’ife, nko boho bona Simona, ko amuufola lacina asemodya boatu isisali. Ko ende aokisase ko aolak’ato’aho bik’ike nk’en’atu.

⁴Koko eneki’nd’okadyaka litenda, aosumola Simona, ate, Botoma boatu en’asi bana nginda, ko bokitsa basangi’anino, bounde nse.

⁵Ko Simona amokutwela, ate, Nkolo, iso tomofona boco tu, ko totaunda nko le nse; ohonde la yoi line nongokitsa basangi.

⁶Ko enek’iy’oilak’oho, baokomba bik’ike bona nse en’asangi, ko basangi’aniyo baomatsa yatsa;

⁷ko baeiela l’akasa bifili’iniyo banayaaki en’atu’omoi, bayi oyakambya. Iyo baoya, ko baolodya biatu bih’ife nko to la nse, ko biatu biomatsa yina.

⁸Eneki Simona Petelo oenaka yoi liho, aokwa nko mbosama en’aongo bana Yesu, ate, Nkolo, uma eneyal’emi, lacin’emi nde nde boto’on’owe.

⁹Lacin’oka aofefa, ende l’iy’anayaaki l’ende, lacin’ena nse bike inik’iy’oundaka.

¹⁰Koko Yakobo la Yoane, ban’ana Zebedayo, banambanaki la Simona en’ekembelo ena nse, baofefa nkoho. Ko Yesu aosumola Simona, ate, Taangake; esik’ene ongunda nko bato.

¹¹Ko enek’iy’osemyaka biatu biniyo ena bokili, baumbela toma tohatotu, ko bamokila.

¹²Eneki’nd’oyalaka en’onyang’omoi, noka, boto’omoi ayaaki meho, yonge linande lihalitu nko mbeha l’okenge; ko eneki’nd’oenaka Yesu, aokwa en’elongi enande mbosama, ko amoonda, ate, Nkolo, yomb’olanga, onkulisa.

¹³Ko aonanola likasa linande, amosuka, ate, Lalanga; kulwaka. Ko isasanga bokenge buma eneyali ende.

¹⁴Ko amosumola, Tasumolake boto’omoko; koko coaka, oyotum’eamene eneyali nkanga, ko lekya nganji lacin’en’esongelo ene, nko nganji iniki Mose okodyaka, yoka ndembi eneyal’iyo.

¹⁵Ohonde lokumo lonande lolinda nko ndinda mene; ko bik’ike bon’ato baosolongana lacina baolofamele, ko lacina baikyame ena nkangi iniyo.

¹⁶Koko ende aoyosuma, ko aocoa ena sengelenge oyoonda meho.

¹⁷Koko en’ina bomoi, kum’ayalake lilako, Bafalusi la balaki ban’asangya baokisase meho, banayaki ena bicimo bina Ngalilaya bihitu ko la bicimo bina Yudea, ko l’ena Yelusalema; ko mpamba ena Yawe eyaaki l’ende lacina aiky’ato.

¹⁸Ko lenda, bato’amoi baoya, bayakumbe boto onoyaaki la nkangi ena nkenyenyala nk’ena ntange; ko baofon’etuelo en’otumba l’ende, oyamby’ende en’oso’onande.

¹⁹Koko eneten’iyo etuelo lacin’en’ekami en’ato, baanda ena nsamba en’otumba, ko enek’iy’otoholaka nsamba en’otumba, bamokitsa ena ntange enande ena ntundulu en’otumba en’oso bona Yesu.

²⁰Koko eneki’nd’oenaka imeedyo iniyo, amosumola, ate, Boto, omotungwa en’aoyi’owe’ane.

²¹Ko batengi ban’ekanda la Bafalusi baomatsa likandakanda, Mbo boto’one onokadya Yakomba likai and’oya? Okina onokolana litungolisa bato en’aoyi’owe oka nai, yengoko Yakomba kei?

²²Koko Yesu aofokola bekandokando beniyo, ko amakutwela, ate, Baoyi banakandakand’ino baka nai?

²³La njila, Omotungwa en’aoyi’owe’ane, la njila, Etwa, ko kenda: yoi linalileki locili en’etendelo lika nai?

²⁴Koko lacin’eho ino bey’oka Bon’on’oto ayali la mpamba ena loko oyiky’ato en’aoyi’owe (aosumola boto on’ise nkangi ena nkenyenyala), Lakosumol’e, etwa, ambola ntange ene, ko coaka en’otumb’one.

²⁵Isasanga aemala en’oso’oniyo, aambola itunda iniki’nd’oetamaka, ko aocoa en’otumb’onande, kum’ayakumya Yakomba.

²⁶Ko iyatu baofefa, ko baokumya Yakomba; ko baolola la losomo, iy’ate, Tomena baoyi ban’okotu’okina bon’in’one.

²⁷Ena mbusa en’aoyi’ane, aofola; ko aena bosusanyi bona mpuci onotangama Lewi, ayakisase en’edye enafut’iyo mpuci; ko amosumola, ate, Onkil’emi.

²⁸Koko ende aumbela toma tohatotu, aemala, ko amokila.

²⁹Ko Lewi amofumbela elambedya ena nkolo mene en’otumb’onande; ko bik’ike bon’asusanyi bana mpuci l’ato’akina baokisase l’iyo banalaki toma.

³⁰Ko batengi ban’ekanda la Bafalusi baoningelaningela bakili’anande, Mbo ino bola ko bomela la basusanyi bana mpuci ko l’ato ban’owe lacina nai?

³¹Koko amakutwela, ate, Bato banakika locili bafalele mpanji: banalela mpanji nk’anawa nkangi;

³²emi ntaya oyelela bato bana mbongi: moya oyelela bato ban’owe lacina baumbele baoyi’owe.

³³Ko iyo bamuufola, iy’ate, Bakili bana Yoane bakila toma bekila bike, ko baonda beondo, ko bakili bana Bafalusi nkoho; koko bakili’ane bala toma ko bamela lanai?

³⁴Amakutwela, ate, Bongokidya nde bifili bina nsongi ena booli toma kuma nsongi ayakisase l’iyo?

³⁵Koko bina bengoya benengi nsongi oumolama eneyal’iyo: bangokila toma nk’en’esik’eho.

³⁶Ko amasumola ekolanya: ate, Efan’oto onokes’etenyi en’esenda ena ntoto lacina atele eho en’esenda enekindaki; yombo aila yok’oho, amokambola esenda ena ntoto, koko lakina etate en’esenda ena ntoto efambane l’esenda enekindaki.

³⁷Koko baana ban’atoto bafangolama ena bikoto bin’alale. Yombo aila yok’oho, tumbe baana ban’atoto bangola bikoto nko mbola, ko baana mene bangutsa, ko bikoto bingeha.

³⁸Koko baana ban’atoto bailama ena bikoto bin’itoto.

³⁹Koko efan’oto onomelaki baana banakindaki ko aut’olanga baana ban’atoto; lacin’oka aila, Mbo banakindaki baleki’olotsi.