Read ngando Luka 6 Bible Online

Luka 6 - ngando bible

Luka 6

¹Koko aotianya basala bana basongu en’ina bona Sabata; ko bakili’anande baonukola basongu, ko baonokola baino ban’asongu l’akasa, ko baola en’onyua.

²Koko bamoi ban’afalusi bamaufola, Mbo ino bokamba yoi linalifakoli la boeka bona Sabata ncina eka nai?

³Ko Yesu amakutwela, ate, Ino botaanda nde yoi linaliki Dawidi okambaka, eneki’nd’owaka la njala, ende l’iy’anayaaki l’ende?

⁴bokotua bonoki’nd’otuaka en’otumba bona Yakomba, ko aotamba ko aola mampa in’oeka, ko aof’iyo banayaaki l’ende, mampa inifalama l’ato tu, yengoko la nkanga kei?

⁵Ko amasumola, ate, Bon’on’oto ayali Nkolo ena Sabata.

⁶Koko en’in’omoi bona Sabata aotua ena sunagoga, ko aolak’ato; ko boto’omoi ayaaki meho, likasa linande y’ome yonyelala.

⁷Ko batengi ban’ekanda la Bafalusi bamotakamela, yombo angiikya en’ina bona Sabata; lacin’eho baakol’ende yoi.

⁸Koko ende aeyaki nkanyi in’etem’eniyo, ko aolokwela boto on’ise likasa lineyonyelala, ate, Emala ko yala ena ntoto. Ko aetwa ko aemala nkwaho.

⁹Koko Yesu amalokwela, ate, Nongokufol’ino bufo: la njila en’olotsi la njila en’owe; mbikya yombo njaka: ekambwa enekoli la boeka bona Sabata eya?

¹⁰Ko amalenda, iyatu; ko aosumola boto, ate, Nanola likasa line. Aonanola liho, ko likasa linande yiika.

¹¹Koko iyo baolola la bolema; ko baoufolana bokotua bonong’iy’oilela Yesu yoi.

¹²Koko en’ina beho aocoa ena lingonji oyonda boondo; ko aokadya boco nko tu kum’ayaonde Yakomba.

¹³Ko eneki bina okyaka, aelela bakili’anande; ko aosona eneyal’iyo bato jo l’afe, banaki’nd’otangaka Bikima:

¹⁴Simona, onoki’nd’ofaka lina lika Petelo, la Andelo onotwaki l’ende, la Yakobo la Yoane, la Filipo la Balutolomayo,

¹⁵la Matayo la Toma, la Yakobo bon’ona Alafayo, la Simona onotangama Zelote,

¹⁶la Yuda bakune’ona Yakobo, la Yudasa bise Keliota onoangelaki.

¹⁷Ko aokita l’iyo, ko aemala en’edye ena tandala, ende la bik’ike bon’akili’a nande, ko la bik’ike bon’ato banayaki ena Yudea endotu la Yelusalema, ko l’ena Tula la Sidona banoli la lose l’okwa, bato bike banayaki lacina baolofamele ko baikyame ena nkangi iniyo;

¹⁸ko iy’anayaaki la bafoi bana nsefo baikyama.

¹⁹Ko bato’aho bik’ike baofon’etelo lacina baosuke, lacin’oka mpamba eofola eneyal’ende, ko amaiky’iyatu.

²⁰Ko aenol’aiso’anande eneyali bakili’anande, ko aila, ate, Ino bana biinda bokik’ekiko; lacina lifoka lina Yakomba liyali nko linino.

²¹In’anoka njala isanga bokik’ekiko; lacin’ino bongokinda. In’analela mposoli isanga bokik’ekiko; lacin’ino bongoseka tolo.

²²Yombo bato bakook’ino bowe, ko bakotembol’ino, ko bako tang’ino lotango, ko baumola lina linino yok’iyema in’owe, nko lacin’ena Bon’on’oto, ino bokik’ekiko.

²³Bonyangela en’ina beho, ko bosola bendembi nko l’enyanga; lacin’oka boluko’onino bond’okolo ena loola; lacin’eneki bafango’aniyo oilelaka basumoli nko baoyi’aho.

²⁴Koko bino eneyal’ino batuki! lacin’oka ino bomosila litamba ekikedyo enino en’otema.

²⁵Bino eneyal’ino banakinda liota isanga! lacin’ino bongowa la njala. Bino eneyal’ino banaseka tolo isanga! lacin’ino bongokesela lokeseli, ko bongolela mposoli.

²⁶Bino eneyal’ino, enengi bato okokumy’ino bolotsi! lacin’oka bafango’aniyo bailelaki basumoli bana mpoci nko baoyi’aho.

²⁷Koko lakosumol’in’anandofa, Boka baokyi’owe’anino nganji, ko bokamb’olotsi eneyal’iy’anakok’ino bowe;

²⁸bosakel’iyo banakotol’ino betoli bosako, ko boondel’iyo banakonyom’ino.

²⁹Nko boto akofoma ena litama limoi, ohalingwele likina nkoho; ko yomb’oto akokumola bokoto bona liko, ofe boho bona ntundulu nkoho, tafedyake.

³⁰Faka boto l’oto onokolomba; ko yomb’oto atamba toma tone, telelake toho lakina.

³¹Ko bokotua bonalang’ino lacina bato bakilel’ino, bilelak’iyo nk’okotu’oho.

³²Yombo bato bakook’ino nganji, ko ino boka nko bato’aho nganji, boluko bonat’ino boka nai? lacin’oka le bato ban’owe baokana nganji l’iyo banaok’iyo nganji.

³³Ko yombo bokambel’iyo baoyi ban’olotsi banakokambel’ino baoyi ban’olotsi, boluko bonat’ino boka nai? lacin’oka le bato ban’owe baila yok’osamb’oho.

³⁴Ko yombo bosombya nko bato’aho banalengedy’ino oka bangokosombwela lakina, boluko bonat’ino boka nai? lacin’oka le’bato ban’owe basombyana, ko basombwelana yok’osamb’oho.

³⁵Koko ino, bokaka baokyi’owe’anino nganji, ko bakambele bolotsi, ko bosomby’ato, efana nkanedya ena esombwelo; ko boluko’onino bongoyala bokolo, ko ino bongoyala ban’anande Onoleki nko Ndeka; lacin’ende akamba baoyi ban’isei eneyal’iyo banafoke isei ko l’eneyali bato ban’owe.

³⁶Lacin’eho, bokak’ato isei, yoka bosamb’onoka Bafango’onino isei.

³⁷Botakoedyake bato baoyi, ko ino bofakoedyamaki baoyi; botakoiyake bato likambo, ko ino bofakoiyamaki likambo; botungol’ato, ko ino bongotungwa.

³⁸Bofaka, ko engofama eneyal’ino: bangokof’ino ena ntolo enino lelelo lon’olotsi, lonelonyetama, lonelofukusama, ko lonelofukumwa. Lacin’iyo bangokeeledy’ino nko la lelelo lonelok’in’oeledyaka.

³⁹Ko amasumola ekolanya, ate, Onody’aiso alondisa nde okina onody’aiso? bafakwaki nk’iy’afe ena lifoku?

⁴⁰Bokili afaleki bolaki’onande; ohonde boto l’oto, enengi’nd’oongyama, angoyala yoka bosambo bonoyali bolaki’onande.

⁴¹Koko olenda lofumbwu loneloyali ena liso lin’efili ene, koko ofakanele botondo bonoyali ena liso lineamene lacina nai?

⁴²Iya, osumola efili ene, ate, Tike, mango, nkofoedya lofumbwu loneloyali ena liso line, kum’eamene ofene botondo bonoyali ena liso lineamene, bosamb’oya? E bosimo, fodya botondo bonoyali ena liso lineamene boso, nkwaho ongena fololo lacina ofodya lofumbwu loneloyali ena liso lin’efili ene.

⁴³Lacina efaate bote bon’olotsi bonota bemamo ben’owe, ko efaate bote bon’owe bonota bemamo ben olotsi.

⁴⁴Lacin’oka bote l’ote beyana nko l’emamo benandamene: bato bafanuke bateli ena bafengolankoi, ko bafanuke bemamo ben’ekoli bena vina nk’ena beenge.

⁴⁵Boto’on’olotsi afodya yoi lin’olotsi ena lituka lin’aoyi ban’olotsi lin’otem’onande; ko boto’on’owe afodya yoi lin’owe ena lituka lin’aoyi ban’owe lin’otem’onande: lacina bonyua botenda nk’en’efulelo en’otema.

⁴⁶Ko bombelel’emi Nkolo, Nkolo, koko bofakambe baoyi banatend’emi ncina eka nai?

⁴⁷Boto l’oto onoya eneyal’emi, ko aoka baoyi’anami, ko ail’aho, mpokotum’ino ekolanya enande:

⁴⁸akolana l’oto onofakaki’otumb’onande, ko aocima nginda mene, ko aofak’otumba ena lufe; ko eneki efela oyaka, ko basi baofoela botumb’oho la locili mene, batalidyisa boho tu, lacin’oka boho bofakamaki la locili mene.

⁴⁹Koko ende onoka baoyi’anami koko afile’aho, akolana l’oto onofakaki botumba en’ekongo bena bolu’olu, efan’ekikedyo bolotsi; basi ban’efela baofoela botumb’oho, ko isasanga boho bokwa; ko eehedyo en’otumb’oho eoyalama bokolo mene.