Read ngando Luka 7 Bible Online

Luka 7 - ngando bible

Luka 7

¹Eneki Yesu okadyaka bitendelo binande bihitu en’atoi ban’ato, aotua ena Kapalanauma.

²Ko bosali’ona capitaine emoi, onoki’nd’ookaka nganji, ayaaki la nkangi, ko aolama l’ewedi.

³Ko eneki’nd’ookaka lokumo lona Yesu, amotomela bingambe bina Ba-Yuda, amoonda lacina ayi oyikya bosali’onande.

⁴Ko enek’iy’oyelaka eneyali Yesu, bamoonda nko mbonda, iy’ate, Ende akoli lacina okambele yoi line;

⁵lacina ende alanga bonyang’oniso, ko amotofakela sunagoga eniso.

⁶Ko Yesu aocoa l’iyo. Ko eneki’nd’oolamaka l’otumba, capitaine amotomela bifili bimoi lacina baosumole, iy’ate, Nkolo, eyalake; lacin’emi mpakoli lacin’e otua en’otumb’onami;

⁷koko la ncina eho, ntayokanel’emamene yoka boto onokoli lacina nje eneyal’e; ohonde tenda yoi kei, ko bosali’onami angika.

⁸Lacin’emi nkoho, kanga bamoi bayali ena liko linami, njali la soldats banayali ena lifoka linami; ko lasumol’one, Coaka, ko aocoa; ko lasumol’okina, Yaka, ko aoya; ko lasumola boombo’onami, lia yok’one, ko ail’oho.

⁹Ko eneki Yesu ookaka baoyi’ane, aofefa, ko aohelengwa, ko aolokwela bato’aho bik’ike banokilaki, ate, Lakosumol’ino, ntene imeedyo ena Yisalaele inileki ine tu.

¹⁰Ko iy’anatomamaki, enek’iy’outwaka en’otumba, baosungya bosali kum’aika.

¹¹Koko efan’olingolingo ena mbus’eho, aocoa bonyang’omoi bonotangama Naina; ko bike bon’akili’anande baocoa l’ende, la bato bik’ike nkoho.

¹²Ko eneki’nd’oolamaka l’ofolo bon onyanga, lenda, baofola en’anza kuma bayakumbe boduo bon’oto, nko bon’ona mpame ona likinda ona nyango enande, ko ende ayaaki boweli; ko bik’ike bon’ato bon’onyang’oho boyaaki l’ende.

¹³Ko eneki Nkolo oenaka boyoto’oho, amookamel’isei, ko amosumola, ate, Talelake.

¹⁴Aolama, ko aosuka ntamba, ko banakumbaki ntamba baemala nkwaho. Ate, Bofenga, lakosumol’e, Etwa.

¹⁵Koko boto onowaki aetwa, ko aomatsa litenda. Ko Yesu amofa nyango enande.

¹⁶Ko losomo lomakwel’iyatu, ko baokumya Yakomba, iy’ate, Bosumoli on’okolo amenya eneyal’iso; ko Yakomba amokanedya bato’anande.

¹⁷Ko lokumo lonande lolinda ena Yudea endotu l’en’enyanga behetu benoli la Yudea.

¹⁸Ko bakili bana Yoane bamosumola baoyi’ane bahatu.

¹⁹Ko Yoane aelela bakili’anande bafe, ko amatoma eneyali Nkolo, lacina baoufole, Mbo E onde ende onoyayi, yombo tolengedya nde okina?

²⁰Ko eneki bato’aho oyelaka eneyal’ende, baila, iy’ate, Yoane Bini aototomaka eneyal’e, akufola, ate, Yomb’oyali Ende onoyayi, yombo tolengedy’okina?

²¹Nkwaho, en’esik’eho, aoikya bato bike ena nkangi la njoci la bafoi bana nsefo, ko aofa bato bike banodyaki’aiso nko njena lakina.

²²Koko amakutwela, ate, Bocoaka, bosumole Yoane baoyi banam’in’oenaka l’anam’in’ookaka: banodyaki baiso bayene, bitumbe bayakende, ban’aise’ekenge baokulwa, banitaki’atoi bayoke, banawaki nko tu baetwa, ko bosimo bon’olotsi bosekodyama eneyali bato biinda.

²³Ko boto onofene ncina en’ekumbelo eneyal’emi aosakelama bosako.

²⁴Ko eneki bikima bina Yoane oumaka, Yesu aomatsa lilokwel’ato lacin’ena Yoane, ate, Onok’in’ocoaka ena sengelenge oyena oka nai? bokombi fo bonoyalile la lofongo?

²⁵Nde bocoaki oyena nai? Boto onolota bisenda bin’okoka? A koko, iy’analota bisenda bin’okoka ko l’iy’anala toma tonet’olotsi bayali en’etumba ben’afoka.

²⁶Koko bocoaki oyena nai? Oyena bosumoli? O, ko lakosumol’ino, aleki bosumoli.

²⁷One nk’ende onok’iy’otengelaka, iy’ate, Lenda, latom’ekima enami en’oso bon’elongi ene, Ende angokoongedya mbok’ene en’oso’one.

²⁸Lacin’oka lakosumol’ino, L’iyatu banotwaki l’ayato, efan’osumoli onoleki Yoane Bini; ohonde oninda lokumo ena lifoka lina Yakomba aleki ende.

²⁹Enek’iy’ookaka, le bato bahatu le basusanyi bana mpuci, baolongya Yakomba, enek’iy’oinamaka l’inelo ena Yoane.

³⁰Ohonde Bafalusi la basakitoli bana basangya baotembola eango ena Yakomba lacin’en’iyoamene, enetinam’iyo la Yoane.

³¹Ko Nkolo ate, Nsokokolanya bato ban’eotwelo ene la nai? ko basokokolana la nai?

³²Bayali yoka banatome banakisase en’edye ena limbongo, ko baelelana, Mbo tokofomelak’ino, koko botina boina; tokoleelak’ino lilelo, koko botafom’efwi.

³³Yoane Bini ayaki, ko atala mampa ko atamela vina, ko ino bila, Ayali la demona.

³⁴Bon’on’oto amoya ayale ko ayamele; ko ino, Mbo lenda, boto onoseki’opomo la bomeli’on’aana, efili en’asusanyi bana mpuci l’en’ato ban’owe.

³⁵Ohonde bomwu bolonga la ban’anande bahatu.

³⁶Koko Bofalusi’omoi ameelela oyola toma l’ende; ko eneki’nd’otuaka en’otumba bon’ofalusi, aokisase ena mesa ena toma.

³⁷Ko lenda, boyoto’omoi on’owe ayaaki en’onyang’oho; eneki’nd’oeyak’oka amokisase ena mesa ena toma en’otumba bon’ofalusi, aoya la likoko lin’alabasitolo lin’auta bana mpimbo en’olotsi mene,

³⁸ko aemala ena mbusa, nk’ena mbolimboli l’akak’anande, kum’ayalele, aomatsa likul’akak’anande la mposoli, ko aolifol’aho la lifo lin’ote’onande, ko aoleya bakak’anande belumba, ko aohinya baho l’auta bana nsole en’olotsi.

³⁹Eneki Bofalusi oneelelaki oenaka yoi liho, aila en’otem’onande, ate, Nko boto’one ayali bosumoli, tumbe asokoeya bokotua bon’oyoto’one onomosuka, lacina ayali boyoto’on’owe.

⁴⁰Ko Yesu amokutwela, ate, Simona, njali la yoi lacina nkosumol’e. Ate, Bolaki, onsumole.

⁴¹Ate, Bosombi’omoi ayaaki l’ato’afe banayaaki l’esilo eneyal’ende; omoi ayaaki l’osilo bona francs bekam’etano, ko okina francs ntuk’itano.

⁴²Ko enetaat’iyo bosolo lacina bakadya besilo, amaiky’iy’afe. L’iy’afe, onongook’ende nganji eneleki oka nai? onsumole.

⁴³Simona aokutola, ate, Lakanela nk’ende onoki’nd’oikyaka en’osilo bonoleki. Ate, E, omokodya nko cilili.

⁴⁴Ko aohelengwa eneyali boyoto, ate, Simona, oena nde boyoto’one? Lotuaka en’otumb’one, otampa basi ban’akak’anami, ohonde ende amosonga bakak’anami la mposoli inande, ko amolifola baho la lifo lin’ote’onande.

⁴⁵Otansangela la bolumba, ohonde ende ataledya lileya bakak’anami belumba nk’eneki’m’otuaka.

⁴⁶Otahinya bote’onami l’auta, ohonde ende amohinya bakak’anami l’auta bana mpimbo en’olotsi mene.

⁴⁷Lacin’eho lakosumol’e, kanga baoyi’owe’anande band’ike, anotungwa ena baho, lacin’oka amoka nganji bike; ohonde onotungwa ena baoyi’owe banafan’ike, angoka nganji nk’enefan’ike.

⁴⁸Ko aosumol’oyoto, ate, Omotungwa en’aoyi’owe’ane.

⁴⁹Ko iyo banakisak’ase l’ende ena mesa ena toma baomatsa yila eneyal’iyoamene, iy’ate, One onotungol’ato en’aoyi’owe ayali nai?

⁵⁰Ko aosumol’oyoto, ate, Imeedyo ine imokiikya; coaka nko l’olotsi