Read ngando Luka 8 Bible Online

Luka 8 - ngando bible

Luka 8

¹Koko efan’olingolingo ena mbus’eho, aotianya benyanga behetu la bicimo bihitu, kum’ayalake bato ko ayasumole bosimo bon’olotsi bona lifoka lina Yakomba, ko ba-jo l’afe bayaaki l’ende,

²ko la bayato’amoi banaki’nd’oikyaka ena bafoi l’ena nkangi: Malia onotangama Mangandala, onoki bademona nsambo ofolaka,

³ko la Yoana booli’ona Kuza, botombanyi bona toma tona Elode, ko la Susana, ko l’an’amoi bike, iyatu bamokambya la toma toniyo.

⁴Eneki bik’ike bon’ato osolonganaka, ko ban’amoi baoya en’enyanga l’enyanga, amasumola ekolanya, ate,

⁵Bofusi aocoa oyofusa beona benande; ko enem’end’ofusa, bemoi beokwa ena bokenge bona mboka; ko bato baikamel’eho l’akaka, ko mpulu ina liko yotona beho.

⁶Ko bemoi beokwa ena baufe; ko eneki beho omelaka beonyelala, lacina enetaata beho basi.

⁷Ko bemoi beokwa ena ntoto ena beenge; ko beenge beomela l’eho la laanda lomoko, ko beoyaka beona la nkaka.

⁸Ko bemoi beokwa en’ekongo bena lilemwa, ko beomela, ko beota bemamo yok’okam’okama. Ko eneki’nd’otendaka baoyi’ane, aelela, ate, Onoyali l’atoi lacina aoke, aongya lilofa.

⁹Ko bakili’anande bamuufola ncina en’ekolanya ene.

¹⁰Ko aila, ate, Emofama eneyal’ino lacina beye baoyi ban’ofisafisa bana lifoka lina Yakomba; ohonde eneyali bakin’ato nko la bikolanya; lacin’eho balende koko bafene, ko balofe koko bafoke.

¹¹Ncina en’ekolanya eh’ene: Beona nko yoi lina Yakomba.

¹²Ko beho beneyaaki en’okenge bona mboka nk’iy’anoka, koko lakina Satana aoya, ko amakumola yoi en’etem’eniyo, batongoyimedya, ko batongoyika.

¹³Ko beho beneyaaki ena lufe nk’iy’anoka, ko baotamba yoi nko l’ekiko; koko bato’ane bainda biulu, ko baimedya isisali, koko en’esike ena losinganya bauma.

¹⁴Ko beho benekwaki ena ntoto en’eenge, nk’iy’anoka, ko enaco’iyo mboka iniyo, baowa la nkaka ena bekaokando l’ena lituka ko l’ena bikiko bina loko lone, ko bafoote’emamo benakolana.

¹⁵Ko beho beneyaaki en’ekongo bena lilemwa nk’iy’anoka yoi, ko baundamela liho en’otem’oniyo bona solosolo l’on’olotsi, ko baot’emamo nko la ncindelana.

¹⁶Enafets’oto mwinda, afakunde eho la mpoke, ko afile eho en’ase’a ntange: ail’eho nk’en’ilelo ena mwinda, lacin’eho iy’anatua baene fololo.

¹⁷Efana yoi linalifisi linalifeyanaki linga; ko efana yoi linalikunji linalifakundwaki linga, ko lifenyaki ena fololo.

¹⁸Bosisolaka bokotua bonok’ino; lacin’oka bamoi bangofama eneyal’ende onata, koko bangokumol’ende onofana nko baho banasokokanel’ende ate aata.

¹⁹Ko nyango enande l’akune’anande baoya eneyal’ende, ko batayelisa eneyal’ende lacin’ena ekami en’ato.

²⁰Ko ban’amoi bamosumola, Mbo nyango ene l’akune’ane baemali en’anza, balang’oka bakeena.

²¹Koko amakutwela, ate, Boyango’onami l’akune’anami nk’iy’anoka yoi lina Yakomba ko baila liho.

²²Koko en’in’omoi aotalama en’atu, endamene la bakili’anande, ko amasumola, ate, Toleke en’ili bona lose; ko baosemwa.

²³Ko enem’iy’ocoa aetama nk’ilo; ko ngembe ena lofongo eokumba ena lose; ko boatu bomatsa lilola l’asi, ko iyo baen’ino mene.

²⁴Ko baoya eneyal’ende, bameetola, iy’ate, Nkolo, Nkolo, iso towa! Ko ende aetwa, ko aofekya lofongo ko l’afukumo ban’asi, ko baho baosila, ko baoyalama nko mwi.

²⁵Ko amaufola, ate, Imeedyo inino iyali meya? Ko iyo baoka losomo, ko baofefa, iy’ate, Boto’one ande nai? lacin’ende aosumola nko le mpongo ko l’asi, ko bamimedya.

²⁶Ko baoyela en’onyanga bana Ba-Ngelasa, bonolendana la Ngalilaya yoka ndendana.

²⁷Ko eneki’nd’otefwaka en’okili, boto’omoi en’onyang’oho, onoyaaki la bademona, aukana l’ende, koko elela mene atalota bisenda, ko atakisase en’otumba, aoyaela nk’ena nketa.

²⁸Ko eneki’nd’oenaka Yesu, aololua, aokwa en’oso’onande, ko aotenda la lofoso lona lokolo, ate, Emi l’e, Yesu Bon’ona Yakomba Onoleki nko Ndeka, tond’oya? Lakoond’e tansisodyake!

²⁹Nko lacina eneki Yesu otomaka lifoi lina nsefo afole eneyali boto’oho. Lacin’oka lifoi liho yuundaki ma-ma, ko baotombanyaki kum’atungi en’enyolo l’ena bifoke, koko lakina aolaki bayaka nko mbola, ko demona aotolaki ena sengelenge.

³⁰Ko Yesu amuufola, ate, Lina line lika nai? Ko ate, Lina linami lika Bik’ike (lacin’oka bademona bike batuaki’ale eneyal’ende).

³¹Ko baho bamoonda ataatomake lacina bacu en’ili bona Abuso.

³²Ko botonga bona nsombo bike boyaaki meho, iyale toma ena lingonji; ko bademona bamoonda, afe etelo lacina batua eneyali nsombo iho. Ko amaf’etelo.

³³Ko bademona baofola eneyali boto’oho, baotua eneyali nsombo; ko botonga bona nsombo bokilimwa ena lingonji nko la laango, bokwela lose, ko nsombo yowa nk’en’asi.

³⁴Ko enek’iy’analeyaki nsombo toma oenaka yoi lineyokambamaka, baolota, ko baosumola yoi liho en’onyanga l’en’engili.

³⁵Ko baofola lacina bayene yoi lineyokambamaka; ko baoya eneyali Yesu, ko baosungya boto onoki bademona ofolaka, ayalote bisenda, ko lokanyi lonande nko nnongana bolotsi, ayakisase en’akaka bana Yesu; ko iyo baoka losomo.

³⁶Ko iy’anenaki ekambwa eho, bamasumola bokotua bonoki boto onoyaaki l’ademona oikaka.

³⁷Ko bato bahatu ban’onyanga bona Ba-Ngelasa en’edye eho bamoonda lacina aume eneyal’iyo; lacin’oka iyo baokaki losomo mene; ko aotalama en’atu, ko autwa la mbusa.

³⁸Koko boto onoki bademona ofolaka aonda Yesu lacina ayalama nko l’ende; ohonde amotoma, ate,

³⁹Utwa en’ol’one, ko sumol’ato bikambwa bin’ikolo biniki Yakomba okokambelak’e. Ko aocoa, ko aolinza en’onyanga bohotu baoyi ban’akolo banaki Yesu okambelak’ende.

⁴⁰Koko eneki Yesu outaka, bik’ike bon’ato bamosangela nko l’enyanga, lacin’oka iyatu baolengedyaki.

⁴¹Ko lenda, boto’omoi aoya, lina linande lika Yailo, nko chef emoi ena sunagoga; ko aokwa en’akaka bana Yesu, ko ameelela ayi en’otumb’onande;

⁴²lacin’oka ayaaki l’on’on’oyoto ona likinda, mbula inande yoka jo l’ife, ko aolama l’ewedi. Ko aocoa; koko enem’end’ocoa, bik’ike bon’ato baokama eneyali ende ekami mene.

⁴³Ko boyoto onoyaaki la nkangi, bakil’anande baetaki mbula jo l’ife, ko akafaki toma tonande tohatotu eneyali mpanji ina benganga, koko efana nko l’omoko’oniyo oniikyaki,

⁴⁴ende aoya ena mbusa enande, ko aosuka boseleka bon’okoto’onande, ko isasanga etelo en’akil’anande eosila,

⁴⁵Ko Yesu aila, ate, Ononsukaka? Ko eneki bato bahatu oanganaka, Petelo aila, ende l’iy’anayaaki l’ende, Mbo Nkolo, bik’ike bon’ato baocindana eneyal’e ko baokokama ekami mene, ko oit’oyufola Ononsukaka!

⁴⁶Yesu ate, Boto’omoi aonsukaka, lacin’oka emi ley’oka mpamba eofolaka eneyal’emi.

⁴⁷Ko eneki boyoto oenak’oka atafisamisa, aoya nko la mbilima, aokwa en’oso’onande, amosumola en’oso bon’ato bahatu ncina eneki’nd’osukaka, ko l’okotua bonoki’nd’oikaka nkwaho.

⁴⁸Ko amosumola, ate, Bona, imeedyo ine imokiikya; coaka nko l’olotsi.

⁴⁹Nk’enem’end’otenda, boto’omoi aoya en’otumba bona chef ena sunagoga, aila, ate, Bon’one on’oyoto amowa; tasengenyake Bolaki.

⁵⁰Koko Yesu aoka yoi liho, ko amokutwela, ate, Taangake, imedya nko njimedya, ko angikyama.

⁵¹Ko eneki’nd’oyelaka en’otumba, atimedya boto’omoi atua l’ende, yengoko Petelo la Yoane la Yakobo, l’afango la nyango en’onome’oho on’oyoto.

⁵²Ko bato bahatu baolelaki, ko baofom’efwi; koko Yesu aila, ate, Botalelake; atawu, aeci nk’en’ilo.

⁵³Koko iyo bamoseka nko nseka, enek’iy’oeyak’oka amowa nko tu.

⁵⁴Ko ende amafody’iyatu, aounda likasa lin’onome, ameelela, ate, Bonome’on’oyoto, etwa.

⁵⁵Ko bolimo’onande bouta, ko aetwa nkwaho, ko amasumola baofe toma tona ndaka.

⁵⁶Ko bafango la nyango enande baofefa; koko amafekedya, batasumolake boto’omoko yoi linilamaki.